НАА ЫРӋЫЛАР, МУЗЫКАНТТАР АРАЛАСТЫ
04.07.2018
Хабарлар
Асхыс Орда-2018. Асхыста хас пазында музыка фестивальы ирткен.
Валерия КЫРЖИНАКОВА.
Тун пайрам таңдади Асхыс суғ хазындағы хас пазында ырҷылар, кӧг тиріглерінең ойнапчатхан чииттер, постарының устарын кӧзідіп, пастағы орын ӱчӱн кӱрестілер.
Иирде кидертін хара пулуттар сых килгеннер, фестиваль полбас тіп сағын турбын. Тигір сатырап, чил кӧдірілібіскен, наңмыр чабысхан. Пір саринаң наңмыр кирек, прай ниме ізіге кӧйче, чазыдағы оттар хурупчалар.Че чилге наңмыр пулуттары саптыр чӧрібіскеннер. «Мындағ даа хомай кӱннерде ойыннар турғысчабыс», - чоохтанып ала, Андрей Асочаков тимненіп пастабысхан.
Фестиваль пасталыбысты. Марығ араласчыларын адапчалар. Кічіг олғаннардаң пасти улуғларға теере устарын кӧзідерге илееде кізі тимнен килтір.
Пастап кічіглер, сарназып, теелбектенгеннер. Мындох оларның устарын чарғыҷылар паалааннар. Піс, олаңай кізілер, хайдаң пілербіс кем артых сарнапчатханын, че чарғыҷылар - музыка киреен ӧтіре пілчеткен улус. Олар Асхыстағы искусство школазында тоғынчалар. Неля Иптышева, Мария Миндибекова паза даа пасхазы. Че піске чапсых наа ырлап пастапчатхан олғаннарны кӧрерге. Олаңай даа ипти сарнап теелбектенчеткен палаларны кӧрерге уғаа чахсы. Тың ачыныстығлар нооза.
Сыйыхтар читірер тус читкен. Леся Гаврилова кӧрігҷілернің кӧңніне кірген ӱчӱн сыйых алған. Ӱзінҷі орынны Кызластаң килген теелбекчілер ансамбльы алған. Ікінҷі орында - Изольданаң Анна Шалгиновалар. Олар дуэтнең сарнааннар. Пастағы орынны Екатерина Кызласова холға кирген.
Леся Гавриловадаңар чоохтап пирим. Ол іҷе-пабазынаң Москвада чуртапча. Іҷезі - Ольга Сербигешева, Раиса Сербигешеваның хызы. Раиса Егоровна Калининдегі школада тоғынча, пос оңдайынаң олғаннарны сарынға ӱгретче. Катя Кызласова - аның ӱгренҷізі. Леся ууҷазында пір ай чуртап парир. Ағаа тӱрчедең 7 час толар. Хакас сарыннарын матап сарнап парча. Морсымнығ даа Москвада чуртапчатхан хызыҷах хакас тілінең чоохтанчатханын паза сарнапчатханын истерге.
Кічіглер соонаң сценаа улуғлар сыхханнар. Мында саңай пасха ырлапчатханнар паза кӧг тиріглерінең ойнапчатханнар. Піске, тізең, кӧрігҷілерге, хандыра музыка хоостыра теелбектенерге. Чарғыҷылар тіпчелер: «Сірерге баллар турғызарғох па?» Орыннарны піди ӱлескеннер. Кӧрігҷілер кӧңніне кірген ӱчӱн сыйыхты вокал дуэді алған. Валерия Топоеванаң Ольга Мистрикова - абахай .ӧӧрелер. Пірееде мин оларны пиҷелер чіли кӧрібісчем. Ӱзінҷі орынны Дмитрий Сафьянов устапчатхан ансамбль утхан. Ікінҷі орынны Алексей Казагашев алған. Пастағы орынны Валерия Кыржинакова холға кирген. Ол Асхыстағы искусство школазында ӱгренген. Амды сизінчем, Валерияның ӱні саңай тыып парыбыстыр. Аны ӱгреткен ӱгретчілерге, іҷезіне, ууҷазына улуғ алғыс. Гран-при Орджоникидзе аймаанзар чӧрібіскен. Аны Татьяна Балахчина апарыбысхан.
Тӱгенҷізінде наа ансамбльдаңар чоохтирым килче. Ол «Асхыс Орда» адалча. Аның тӧстегҷізі паза устағҷызы - Олег Асочаков. Мин аны чахсы таныпчам. Ол музыканаң айғаспиныбысхан полған. Амды Олегтің, ансамбльнаң устап, хада ойнапчатханын кӧріп, морсынғам. Алғыс сағаа, Олег! Кӧрігҷілернің кӧңні толған, ансамбльның ойынын кӧріп, истіп.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы