ХАЙЗЫ СУРЫҒЛАР ОРЫНДОХ ПӦГӀЛГЕН, ПАСХАЗЫНҶА ХОЗА ТОҒЫС АПАРЫЛАР
14.08.2018
Хабарлар
Пірге тоғазығ кӱні. 11 августта тиксі республикада ӱлгӱдегілернің чуртағҷыларнаң тоғасчаң пірге кӱні ирткен. Хакасияның пазы Виктор Зимин Таштыпта тоғазығлар иртірген.
Таштыптағы чииттер Дмитрий ФЕДЯНИННЕҢ Екатерина ФОМИНА Хакасияның пазы Виктор ЗИМИННЕҢ тоғазығда
Чуртагчыларнаң мындағ оңдай пастыра палғалыс тудары, оларның айланыстарын, сидіксіністерін истері паза оларны пӧгеріне хабазары Хакасияның пазы Виктор Зиминнің пастаа полча. Пастағы пірге тоғазығ кӱні 21 июльда ирткен, андада ол позының кирексінізін кӧзіткен - аймах синдегі пастыхтарзар, ол санда регион устағҷызынзар, кӧп чон айланған. Аннаңар регион устағҷызы мындағ пірге тоғазығ кӱнін ай сай иртір турарға чарадығ алған.
Чоохтирға кирек, пірге тоғазығ кӱнінеңер, хайдағ аймахта паза городта пастыхтарның хайзы тоғазығ иртірердеңер искіріглер азынадох тарадылған. Хакасияның пазы Виктор Зимин пу хати Таштып аймаа чуртағҷыларынаң тоғазығлар иртірген. Таштыптох тоғазығлар иртіргеннер пастағы орынҷызы Андрей Новосёлов паза орынҷызы Ирина Смолина. Пасха орынҷылар, министрлер паза хазна комитеттерінің устағҷылары республиканың пасха город-аймахтарда чуртағҷыларнаң тоғасханнар. Хакасия пазының администрациязы искіриинең, пу пірге тоғазығ кӱнінде республика правительствозының кізілерінзер 400 артиинаң чуртағҷы айланган.
Таштыпта Хакасия пазынаң тоғазыға 10 кізі азынада пазынған. Сурығлар аймах-пасха полған. Че кӧбізі хайдағ-да пос суриинаң на нимес, кӧп чонга теелчеткен сурыныснаң айланған. Іди пастағыларның санында пістің «Хабар» газетанын Таштып аймаанҷа хабарҷызы, Пыдырах аалның чуртағҷызы Георгий Кунучаков полған. Ол республика пазынзар аймахтың кінінзер парчатхан чолны (Харағай - Таштып) тыхтап пирерге сурыныснаң айланған. Виктор Зимин Хакасияның транспорт паза чол хонии министерствозына пу сурығны пӧгеріне хабас пирерге чахаан.
Таштыптағы спорт школазы директорының орынҷызы Наталья Кызылчакова Хакасия пазынаң тоғазыгда аймах кініндегі «Урожай» стадионға футбол ойнаҷаң арған чазы киректеңер сурығны кӧдірген. Виктор Зиминнің чахии хоостыра ол тоғыстар 2019 чылда толдырыл парарлар. Ағаа хоза пір чыл пазынаң стадиондағы чӱгӱр чӧрчең чолыҷахтарны нааҷылап пирерлер.
Арбыт аалдағы ортымах школаның ӱгретчізі, Таштып аймааның Халыхтар палатазының кізізі Владимир Медведев Арбыт аалға наа школа киректелчеткенінеңер сурыныснаң айланған. Виктор Михайлович республиканың ӱгредіг паза наука министріне ол сурығны пӧгерге чахығ пирген. Арбытта наа школаның пӱдіриин 2019 чылда пастабызарға пӧгін турғызылған. 2020 чылға, тізең, ол тимге сығар тіп сахталча.
Аңчул аал чуртағҷыларының Хакасия пазына сурынызын Анна Тибильдеева читірген. Аңчулдағыларны оларның аалында сотовай палғалыс паза Интернет чох полғаны сағыссыратча.
- Пу сидіксініс Санкт- Петербургтағы чоннар аразындағы экономика форумында «Ростелеком» ПАО, Россияның минкомсвязь паза республика правительствозы аразында иділген ӱс сарилығ чӧптезіг хоостыра пӧгілер, - чарытхан Виктор Зимин.
Ол чӧптезігҷе 2019 чыл тоозылғанҷа ізестіг палғалыс паза Интернет Таштып аймааның 6 аалында иділер: Аңчулда, Индіркі Хурлығаста, Индіркі Сирде, Индіркі Ибігде, Улуг Сииде паза Кічіг Сииде. Тиксі ол проектче Хакасияның 38 аалынзар, хайзында 250-дең 500-ке теере кізі чуртапча, палғалыс линиялары тартылар.
Ибіг аалның чуртағҷызы Татьяна Новикова Хакасия пазынаң оларның аалында Культура туразын пӱдірер тусты хати кӧрібізерге паза тоғыстарны ирте арах пастирға сурынған. Пастап Ибігде наа Культура туразын 2020 чылда пӱдіріп пастиры кӧрілген полған, амды Виктор Зимин аның пӱдіриин килер чылдох пастабызарға пӧгін турғыс салған.
Таштып аал чуртағҷызы Валентина Чернова регион устағҷызынзар Таштып аалдағы Суворовтың орамазындағы чолны, сай урып, оңдайлап пирерге сурыныснаң айланган. Чағын туста ол тоғыстар толдырыл парар.
Мадырдағыларны, тізең, оларның аалында участковай имнег туразы чабыларға итчеткені сағыссыратхан. Хакасияның пазы Виктор Зимин имнег учреждениезі, чабылбин, ідӧк ле тоғынар тіп ізендірген.
- Ағаа хоза, 2020 -2023 чылларда Таштып аймаанда ікі имнег амбулаториязын паза пис фельдшер-акушер пунктын пӱдірері кӧрілче, - таныхтаан Виктор Зимин.
Регион устағҷызынаң тоғазарға ідӧк Таштып аймааның чииттері кил парганнар. Виктор Зиминнең тоғазығда Таштып аалның Чииттер чӧбінің кізілері Екатерина Фомина паза Дмитрий Федянин полғаннар. Олар республика устағҷызына алғыстарын читіргеннер, Виктор Зимин Таштыптағы чииттернің спорт-тынағ кінін тилідеріне хабас пиргені ӱчӱн. Хакасияның пазы ол кінде пӱӱл часхызын полған. Таштыптағы чииттер, аймах-пасха гранттар марығларында аралазып, ол ахчаа тасталған подвалны тыхтап алғаннар. Іди Таштыпта чииттернің спорт-тынағ кіні тӧстелген. Сидіксініс спорт тренажерларын аларынаң паза вентиляция системазын турғызарынаң полған. Чииттер андада, полызығ сурап, Хакасияның пазынзар айланғаннар, Виктор Зимин хабас пирерге молчаан. Хайди чоохтап пиргеннер Екатеринанаң Дмитрий, наачылалған тренажер залы тӱрчедең тоғынып пастабызар, ідӧк пу чағында вентиляция системазы турғызыл парар.
- Республиканың ікінҷі пірге тоғазығ кӱні тоозыл парды. Хайзы сурығларны піс орындох пӧгіп алдыбыс, хайзыларынҷа хоза тоғыс апарарға киректелер. Че олар прайзы минің хайиимда полар. Чуртағҷыларнаң мындағ ондайлығ тоғыс апарарын узарадарбыс, - таныхтаан Хакасияның пазы Виктор Зимин, айланған кізілернең прайзынаң тоғазып алған соонаң хабарҷыларнаң чоох алызып.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы