КӀЧӀГ ААЛЛАРДАҒЫЛАР КӰСТЕРІНЕҢ СЫНАСХАННАР
22.08.2018
Хабарлар
Марығ. Ӱр ниместе Таштыпта Хакасияның кічіг ааллары аразында спорт фестивальы ирткен. Хакас Республиканың правительствозы, спорт министерствозы паза Таштып аймааның устағ-пастаа улуғ марыға аал чуртағҷыларын пазох чығдылар. Таштыпта Вячеслав Майнагашевтің адынаң спорт комплексінде республикабыстың кічіг аалларында чуртапчатхан улус аймах-пасха спорт кӧрімнерінҷе кӱзінең сынасты. Марығлар ниик атлетикаҷа, мини-футболҷа, волейболҷа, стол теннизінҷе, спортха хынчатхан сӧбірелер аразында полған. Арға-мӧрійде Орджоникидзе аймаанаң пасха прай аймахтардаң спортсменнер араласханнар.
Хакасияның кічіг ааллары аразындағы спорт фестивальын асхан республиканың спорт министрі Виктор Струков. Алғыстас чооғында ол республика пазы Виктор Зиминнің чолабидін читірген. Марыға килгеннерні чахсы чидіглерге кӧстеен. Аалҷыларны ідӧк алғыстаан Таштып аймаа пазының пастағы орынҷызы Георгий Тодинов.
Устағҷылар алғыстаан соонда марығлар пасталыбысхан. Иң пурнада пас меетке ниик атлетика араласчылары сыхханнар. Олар тӧртер кізі 100 метр чӱгӱрҷең эстафетада марығласханнар. Пу кӧрімде Шира аймаанаң килген спортсменнер утып алғаннар. Ікінҷі орынны марығ ээлері, Таштыптағылар, холға киргеннер. Асхыс аймаанаң килгеннер ӱзінҷі орында пол парғаннар.
Эстафета тоозыларға даа маңнанмаан, ікі кічіг футбол чазызына футболисттер сыға салғаннар. Марығларны тың сӧӧ тартпас ӱчӱн, оларға ойнир тусты хызырғаннар. Аннаңар тоғазығлар табырах иртіп одырғаннар. Пірее ойын аразында футболисттер тынанарға даа маңнанминчатханнар. Устары хоостыра Ағбан пилтірі, Алтай паза Таштып аймахтарының командалары кӧдіре кӧрінчеткеннер. Финалға оларох сыхханнар. Пір дее утырбаан таштыптағылар пастағы орын ӱчӱн ағбан пилтіріндегілернең тоғасханнар. Че талаан аалҷыларның саринзар айланған. Олар пастағы орынны утып алғаннар. Таштып аймааның футболисттері «кӱмӱсті» холға киргеннер. Ӱзінҷі орында Алтай аймааның ооллары пол парғаннар.
Футбол марии парчатхан туста чӱгӱрҷең чолыҷахта спорт сӧбірелері марығласханнар. Читі команда аразынаң ӱзі ле сығарға тимде полған осхас. Аннаңар олар ла удур-тӧдір ӱс сыйыхтығ орынны ӱлезіп алғаннар. Иң артых спорт сӧбірезі Таштып аймаанда чуртапчаттыр. Ікінҷі орынға Алтай аймаанаң килген сӧбіре сыххан, ӱзінҷізіне - асхыстағылар.
Тасхар марығлар хазыр парчатхан арада спортзалда стол теннизінңе устарынаң сынасханнар. Пу спорт кӧрімінде асхыстағылар пірдеезіне чиңдірбееннер, пастағы орынны холға ізестіг киргеннер. Таштып аймааның спортсменнері матабох кӱстенгеннер. Че іди дее полза, ікінҷі ле орынға турысханнар. Ӱзінҷі орынны алтай аймаандағылар алғаннар.
Постарының кӱстеріне, чапчаңнарына ізенчеткен алыптар ағас тартызарға сыхханнар. Харбазығ хазыр парған. Кӱстері читпинчеткеннері пірее сӱменен чиңіп аларға сіренгеннер.
Че мында кӧйтікнең ал полбассың: кӱзің пар полза, утарзың, чох полза, хыйа одыр саларға килісче. Илееде харбазығлар соонда иң кӱстіглер Таштып аймаанда чуртапчатханнары ілезіне сығысхан. Кӧмес кӱстері читпин халып, Асхыс чирінің алыптары ікінҷі орынға турысханнар. Боград аймаанаң килгеннер ӱзінҷізі полыбысханнар.
Аалҷыларны хонарға «Серебряный ключ» олғаннар тынанҷаң лагерьзер апарғаннар. Андох иир пазында арғамҷынаң тартызып марығласханнар. Алтай аймаанаң килген команда прайзын утхан. Ӏкінҷі орын Таштыптағыларға киліскен. Боградтағылар пу кӧрімде пазох ӱзінҷі орынға сыхханнар.
Волейболны иртен ойнааннар. Пастағы кӱнінде майых парған спортсменнерге хатабох марығлазарға кирек. Че андағ даа полза, волейболға кӱстері халтырох. Ойыннар хынығ, айа сабыстары тыҷыразында ирткеннер. Асхыстағыларға пір дее команда сыдабаан. Олар пастағы орын алып алғаннар. Ӏкінҷі паза ӱзінҷі орыннарда Таштыпнаң Ағбан пилтірі полғаннар.
Ӏди ікі кӱн спортта кӱстерін сынааннар Хакасияның кічіг аалларында чуртапчатхан кізілер. Оларны кӧріп, улуғ даа нимес аалыҷахтарда спортнаң чахсы ынағласчаттырлар тіп сағынчазың. Андағ ла ползын. Сынап таа хазии уйан кізі аар тоғысты хайди идіп алар? Аалдағыларның тоғыстары ниик нимес нооза.
Марығ салтарлары мындағ: пастағы орында - Таштып аймааның командазы, ікінҷі орында - Асхыс аймааның спортсменнері, ӱзінҷі орында - Алтай аймаанаң килген команда.
Автор :
Георгий КУНУЧАКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы