ӰЛГӰ РЕФОРМАЗЫ
21.09.2018
Хабарлар
Пӱӱн, 21 сентябрьда, Хакасияның пазы Виктор Зимин паза Ӧӧркі Чӧп кнезі Владимир Штыгашев Хакас Республиканың Конституция комиссиязының кізілерінең тоғасханнар. Чоох парған республикадағы толдырығлығ ӱлгӱ системазын алыстырардаңар.
Чон алызығлар кирексіпчеткенде, ӱлгӱ удур парча.
Пу тоғазығда Виктор Зимин Конституция комиссиязынзар республиканың толдырығлығ ӱлгӱ полномочиелерін алыстырардаңар закон сығарңаң пастағнаң сыххан.
- Аарлығ Владимир Николаевич, Конституция комиссиязының аарлығ кізілері, айланчам сірерзер мин кирчеткен чӧпке хабас пирерге, - айланған Хакасияның пазы комиссия кізілерінзер. - Пӱӱн мындағ алызығлар пістің республикаа паза чуртағҷыларға кирек тіп санапчам. Республикада полчатхан ниме халых чон политикада, кадрларда алызығлар кирексіпчеткенін кӧзітче. Чон ӱлгӱде наа, чиит паза кӱстенҷік кізілер пар поларын сағыпча. Ол санда республика правительствозында, паза ол санда правительство кнезі орнында. Олох туста санапчам: чуртағҷыларның кирексіністеріне турыстығ оңдай правительство кнезін Ӧӧркі Чӧп депутаттары таап турары полар. Піди правительство пір саринаң пірдеезінең палғалыстығ полбас, пасха саринаң анзы Ӧӧркі Чӧптегі прай политическай партияларға чол азар. Кандидатураларны олар сығар турарлар нооза.
Таныхирға кирек, мында чоох парча ідӧк Хакасияның пазының паза республика правительствозының кнезінің полномочиелерін чарардаңар. Сағам Хакасияның пазы олох туста республика правительствозының кнезі полча. Пір саңай ікі тоғысты толдырча тиирге чарир. Хайзы регионнарда хаҷаннох пу оңдайҷа тоғынчалар. Кӧзідімге алып аларбыс Хызылчар крайын, анда губернатор пір кізі, правительство кнезі, тізең, - пасха кізі.
Виктор Зиминнің искіриинең, ол мындағ чарадығны чонның кирексінізі хоостыра алған. Ағаа хоза пу ондай хоостыра Хакасияның пазына федеральнай синде регионның тиксі сурығларын пӧгерге тус хозыл парар. Республиканың істіндегі киректерҷе паза экономикаҷа правительство кнезі тоғын турар нооза.
Ӧӧркi Чӧп кнезі Владимир Штыгашев Виктор Зимин кирчеткен чӧпке хабасхан.
- Регион пазының паза правительство кнезінің полномочиелерін чарңаң практика Россияның кӧп регионнарында чахсы сарин кӧзіткен. Таныхтирға сағынчам, мындағох чӧпнең Сергей Шойгу сыххан, Москва облазының губернаторы полыбысханда. Ол политикадағы хорылыстарны чох идер паза республиканаң устир тоғысха профессиональнай нимес, хайдаң-да олаңай сығыс килген кізілер килерін тохтадар. Наа профессионаллар тӧлі тӧриріне полыс пирер сағызыңарға толдыразынаң хабасчам. Че чиит политиктернің энергиязы улуғ тӧлнің хыйға сағызынаң паза политикадағы опыдынаң пір чолңа пар турарға кирек, - таныхтаан Владимир Штыгашев.
Хакасияның Конституция комиссиязының кізілері кирілген пастаға ідӧк хабасханнар. Амды комиссия республиканың толдырығлығ ӱлгӱ системазының реформазын иртірерінңе паза Хакасияның Конституциязынзар алызығлар кирерінңе тоғыснаң айғазып пастир. Ол тоғысха 4-6 айңа кирек полар тіп сахталча.
Автор :
Альберт Толмашов
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы