ӰГРЕНҶІЛЕР - ТРАНСПОРТ ПОЛИЦИЯЗЫНЫҢ ПОЛЫСЧЫЛАРЫ
03.10.2018
Хабарлар
«ООН» отряд араласчылары
Танығлығ кӱн. Ағбандағы 30 № школаның 6 «б» класс ӱгренҷілерін транспорт полициязының кічіг полысчыларына алғаннар.
Мероприятиеде МВД-ның Ағбандағы линейнай пӧлиинің чазы читкелектер киректерінҷе инспекторлары, ветераннар чӧбінің кнезі Олег Зайцев паза Ағбандағы УГИБДД-ның пропагандам улуғ инспекторы Ирина Дельхман араласханнар. Мындағ танығлығ кӱнде ӱгренҷілерні паба-іҷелері алғыстирға килгеннер.
Мероприятие «Пістің служба - хорылыстығ паза сидік» сарын сӧстерінең пасталған. Аны Россия полициязының гимніне санирға чарир. Олғаннарның «Алынҷа кӧстегліг отрядының» («ООН») араласчылары сценаа сыхханда, школа директорының олғаннар транспорт полициязының полысчыларына алылчатханнаңар чахии хығырылған. Олғаннарны алғыстирға Олег Зайцев сыххан. Ол полған на ӱгренҷее транспорт полициязы полысчызының таниин читірген. Отряд араласчылары постың тоғызына сын поларға сӧс пиргеннер.
- Сірер Ағбандағы линейнай пӧліктің сын арғыстары поларзар. Учреждениенің ізіктері сірерге хазандаа азых полар. Ӱгредіг чылы тооза піс сірерні Ағбандағы линейнай пӧлік тархынынаң таныстырарбыс. Мында Илбек Ада чааның 30 артиинаң араласчызы тоғынған. Сірер линейнай пӧлікте тоғынчатхан службаларнаң танызып аларзар, - чооғында таныхтаан Олег Абрамович.
Ідӧк олғаннарға алғыстас сӧстерін Ағбандағы ЛО-нын пастых орынҷызы, істіндегі службаның подполковнигі Андрей Максименко читірген. Ол олғаннарға полицияның тоғызын паза пӧгінін чарыт пирген. Право хайраллаңан органнар чонның амыр чуртазын хадарчалар. Оолағас-хызыҷахтар ӧс парзалар, пу тоғыс оларның иңнілеріне артылар.
Ідӧк олғаннарзар полицияның улуғ лейтенанты Ирина Дельхман айланған. Аның чооғынаң, Ағбан городча УГИБДД-да кічіг инспекторлар отрядтары парох. Ікі отряд араласчылары пірге кӧп тоғыс толдырарлар. Халған-хызынзар олғаннарны Хызылчардағы тимір чолның істеніс инспекторы Алексей Стельмашенко алғыстаан.
Амды олғаннар арғыстарын хорғыс чох правилоларға ӱгредерлер. Тиктең нимес 30 № школаның ӱгренҷілері транспорт полициязы полысчыларына кіргеннер. Школа тимір чолдаң ырах нимес орныхча. Хайди таныхтаан Ағбандағы ЛО-ның чазы читкелектер киректерінҷе инспекторы, полиция капитаны Алексей Седов, транспорт полиция полысчыларының «ООН» отрядына 24 олған кірген. Отряд араласчылары Ағбандағы школалар ӱгренҷілерінең профилактика мероприятиелерін иртірерлер. Транспорт полициязы тоғынҷылары оларға постарынын тоғызын чарыт пирерлер. Профилактика мероприятиелерінде ідӧк тимір чол паза аэропорт тоғынҷылары аралазарлар. Олғаннар тимір чолда киненге кірбеске, посты орта тудынарға ӱгренерлер. «ООН» тиксі Россияда транспорт полиция полысчыларының пастағы отряды полча.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы