ЧОННЬҢ АМЫР ЧУРТАЗЫНЬІҢ ХАДААНДА
13.11.2018
Хабарлар
Чааӌылар частьы алнында автомобильлер тығырама чыылыс парған, постың автомашиназын турғысчаң орыннар чох полған. Тимір чол бригадазының Культура туразының залында погоннығ чон кӧп чыылған, олаңай кип-азахтығ даа кізілер асхынах полбаан. Погоннығлар - ам істіндегі киректер органнарында служба иртчеткен тоғынӌылар, олаңай кип-азахтығлар - МВД-ға кӧп чыллар пир салған ветераннар. Ідӧк камуфляж ӧңніг кип-азахтығлар кӧрінгеннер, анзылары - амғы Росгвардияа кір парған ОМОН-ның, СОБР-ның чааӌылары паза ветераннары.
Пайрамны Андрей Штарк устапчатхан оркестр, марш кӧглерін толдырып, асхан. «МВД знамязын кирерге!» команда истілген соонда, залзар парадха кисчең кип-азахтығ ӱс офицер знамяны кирген. Сценада знамя турғызылған, анаң Россияның паза Хакасияның гимннері толдырылған. Мындағ мероприятие иртірілчетсе, кізілер кӧнік парған президиум сценада чох полған. Улуғ пастыхтар залда прайзынаң хада одырғаннар.
Сценазар чыылған чонны ӱлӱкӱннең алғыстирға Хакасия пазының тоғызын толдырчатхан Михаил Развожаев сыххан. Сценазар иртчедіп, ол коляскада одырчатхан, Алтынзархы Кавказтағы чаалазығда палығладып, азахтарын чідір салған чааӌы-кинекнең хол тудып изеннескен.
- Пу залда чыылған прай кізілерге алғыстас сӧстерін читірчем, - айланған чонзар Хакасия устағӌызы. - Республика МВД-зының тоғынҷыларын, ветераннарын профессиональнай ӱлӱкӱннең алғыстапчам! Істіндегі киректер органнарына 300 азыра чыл, че хайдағ даа туста полиция тоғынҷылары чонның амыр чуртазын хадарарға тимде полчалар, сайбағлардаң тоғыр тӱзімніг кӱрезіг апарчалар. Посха айабин, чонның амыры ӱчӱн турызарға тимде полчатханнарың ӱчӱн улуғ алғыс сірерге. Хакасияның МВД тоғынҷылары Алтынзархы Кавказта террористтердең тоғыр операцияларда турыстыра араласханнар, хазна турғысхан пӧгіннерні чахсы толдырчалар. Терроризмнең тоғыр кӱрезігде республиканың МВД тоғынҷылары постарының арғыстарын Хакасияның Аарластығ пічіктерінең сыйыхтатханнар чідіргеннер, оларны піс хаҷан даа ундутпаспыс. Алынҷа алғыс сӧстерін читірчем МВД-ға кӧп чыллар пир салған ветераннарға. Олар чиит тоғынҷыларға постарының пай опыдын ам даа пирчелер, оларны чахсы тоғынарға ӱгретчелер. Ӱлӱкӱннең, аарлығ нанҷылар! Пик хазых, часка, чахсы чуртас, наа чидіглер прайзына алғапчам!
Михаил Развожаев, алғыстас чооғын тоозып, службаны чахсы апарчатхан тоғынӌыларға сыйыхтар читірген. Іди Хакас Республиканың Аарластығ пічиинең сыйыхтатханнар аразында полғаннар Хакасияӌа МВД-ның істезіг управление істезігӌізі, юстицияның подполковнигі Анна Табакова паза Ағбан пилтірі аймаанӌа ОМВД-ның уголовнай тілег пӧлиинің пастығы, полицияның майоры Сергей Кайдараков. Ідӧк Хакасия правительствозының алғыстас пічиинең сыйыхтатханнар аразында Асхыс аймаанӌа ОМВД-ның инспектор-кинологы Александр Тинников полған.
Анаң сценазар МВД тоғынӌыларын алғыстирға Хакасияның Ӧӧркі Чӧп кнезі Владимир Штыгашев сыххан.
- Прайзын пӱӱн профессиональнай ӱлӱкӱннең алғыстапчам, - айланған ол чонзар. - Россияның істіндегі киректер органнарына 101 чыл толча, полицияа - 300 чыл. Хакасияның милициязы позына салылған прай пӧгіннерні сыбыра чахсы толдырҷаң, Россияда ол тӧреміл иң артыхтар санында полған. Амғы полиция ідӧк чахсы тоғынча, сайбағларның хай пірее кӧрімнерінің саны хызырылчатханы таныхталча. Кӧзідімге, чазы читкелектер аразындағы сайбағлар саны хызырылча. Мыннаң мындар улам чахсы чидіглер поларына ізенчебіс.
Мин иргі милиционербін, 1958 чылдаң милицияда тоғынғам, участковай полғам, уголовнай тілег инспекторы полып служба ирткем, істезігҷі полғамох. Пісті службаа фронтовиктер, Илбек Ада чаа араласчылары ӱгреткеннер, оларның саны 90 процентке читчең. Ол туста кӧбізі кічіг лейтенант аттығ полҷаң, амды пресс-секретарьлар полковник аттығ чӧрчелер. Пеер ам устағҷыларны Россия ортызынаң ысчалар, амғы министрні Иванов облазынаң ысханнар. Андағ оңдайнаң пістің регионда сайбағлардаң тоғыр апарылчатхан кӱрезігні улам чахсыландырарға кӱстенче поларлар. Амғы чидіглерің ӱчӱн алғыстапчам прайзын. Сӧбірелеріңе ідӧк, сірернің хараа-кӱнӧрте тоғынчатханыңарға сыдасчатхан ӱчӱн, алғызым читірчем. Пик хазыхтығ, часкалығ полыңар! Наа чидіглер сірерге!
Чооғын тоозып, Владимир Николаевич кӧп тоғынӌаа Ӧӧркі Чӧптің алғыстас пічіктерін читірген.
Ідӧк сценазар чоох тударға, ӱлӱкӱннең алғыстирға сыхханнар Хакасияның паза Ағбанның архиепискобы Ионафан, республиканың прокуроры Александр Кондратьев паза Хакасияның МВД министрі Андрей Кульков. Прокурор паза министр чахсы тоғынчатхан полицейскайларға паза істезігӌілерге сыйыхтар читіргеннер. Ағбан станциядағы линейнай пӧлік пастығы Олег Сорокин, позының тоғынӌыларын алғыстап, оларны аймах сыйыхтарнаң таныхтаан.
Пайрамны улуғ нимес концерт узаратхан.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде