САБЛЫҒ ДРАМАТУРГКА ЧАРЫДЫП
13.11.2018
Хабарлар
Фестиваль. Шира аймаанда саблығ драматург, ӱгретчі, кибелісчі, тілбесчі Александр Топанов тӧреен-ӧскен. Пӱӱл ағаа 115 час толарӌых. Аның чарых омазына «Ине тілі» фестиваль чарыдылған.
Тимур АРЫШТАЕВ
Александр Топанов Кӧл пилтірі аалда тӧреен.
Аның іӌезі абыстың ӧӧй хызы полған. Пабазы Михаил Павлович (чон аразында Порис) абыстох ӧскен. Анда ол пічікке ӱгреніп алған. Аннаңар палазын ӱгредерге сағыс тутхан. Ипчізі пала тӧреен соонда ӱр чуртабаан. Шурик кічігдӧк іӌезінең ӧкіс халған. Че Порис чалғыс палазына прай ниме ал пирӌең, чахсы тонандырӌаң.
Ӧс парғанда, Шурик Хызылчарда паза Иркутскта ӱгренген. Чир-суунзар айланып, ӱгретчі полған, пастағы хакас букварьын тӧстеен. Че ол театр тоғызына тартылған, ол ағаа хынығ пілдірген. Александр Михайлович Топанов прай чирде туза идерге харасхан. Хакас театрын тӧстирінде араласханох. Амғы туста Хакас драма театры аның адын ал чӧрче.
Шира аймаанда Тӱрк пічиинің кӱннері тоозылчатханына Ширадағы культура туразында Александр Топановтың хумартхызына чарыдылған «Ине тілі» фестиваль паза палаларның «Минің чир-суум» хоостар марии ирткеннер. Анда олған садтарының палаӌахтары, ӱгренӌілер паза улуғ кізілер араласханнар. Фестивальны алғыс сӧстерінең асхан Шира аймаандағы Улуғлар чӧбінің кнезі Николай Абдин.
Анаң Тоғыр чулдағы ортымах школаның ӱгренӌілері Александр Топановтың чуртазынаңар улуғ нимес ойын турғысханнар. Анда араласханнар 1011 класстың ӱгренӌілері Кристина Абдина, Михаил Азаров, Василий Батандаев, Диана Кунучакова, Иван Сенинг, Кристина Младенцева, Анна Чустеева. Ӧӧн рольны (Александр Топановты) Александр Ульчугачев паза 6-ӌы класста ӱгренчеткен оолах Володя Коков толдырғаннар. Пос тілліг школадағы олғаннар ойынны хакас тілінең турғысханнар. Оларнаң хада ойында ӱгретчілер Галина Николаевна Тюдешеванаң Николай Михайлович Котюшев араласханнар.
Фестивальда ікі номинацияӌа марығ полған: «Кибеліс» паза «Тахпах». Прай 20-ӌе кізі араласхан. «Кибеліс» номинацияда 6 - 10 частығ сигіс пала полған. Оларның аразында пос тілін чахсы пілчелер: Тимур Арыштаев, Настя Амзаракова, Алтынай Тюньдешева, Дарья Кокова, Маша Байдошева. 11 - 17 частығлар аразында пис кізі араласхан. Иң пӧзік синні кӧзіткен
Анна Чустеева, Тоғыр чулдағы ортымах школаның ӱгренӌізі. Ол Семён Прокопьевич Кадышевтің «Алтын Арығ» нымағының чардығын хығырған. Кристина Абдина паза Диана Кунучакова олох школада ӱгренчелер. Олар пос тілін чахсы пілчеткен ӱчӱн дипломнар алғаннарох. Тоғыр чулдағы 10-11 класстар олғаннары хығырған кибелістеріне презентация тимнеп салтырлар.
Татьяна Ильинична КОНГАРОВАНАҢ жюри кнезі
Клавдия Даниловна ТАйДОНОВА
«Тахпах» номинациядаңар чоохтаза, Мария Ивановна Зелеева позы пасхан тахпахтарны пархазы Маша Байдошеванаң толдырғаннар. Таныхтирға кирек, М.И.Зелеева тахпахтарны палаларға пасча. Вера Александровна Арыштаева ікі пархазы Алинанаң Ангелина Алановтарнаң аныңох тахпахтарын толдырғаннар. Улуғ частығларның аразында Вера Иосифовна Арыштаеванаң Татьяна Ильинична Конгарова араласханнар. Олар пістің аймахты прай республикаа сабландырчалар. Вера Иосифовна республика айтыстарында ікі хати пастағы орынға турысхан, холодильник паза телевизор сыйға алған. Татьяна Ильиничнаның сіліг ӱні прай кізінің кӧңніне кірче. Ол аймах Шира ӱннерінең тахпахтапча.
Чарғыӌылар чӧптезерге парыбысханнарында, Шира аймааның ікі ӧмезі, Азах Сӧӧт аалдағы «Таныӌах» чон ӧмезі паза Чоохчылдағы «Бисеринки» теелбек ӧмезі, сценаа сыххан. «Таныӌах» ӧме хакас сарыннарны толдырған. «Бисеринки» хакастарның стилизованнай кип-азаан паза «Ымай», «Чоохчылдағы хыстар» теелбектерні кӧзіткеннер.
Шира чирінде пастағызын на ирткен «Ине тілі» фестиваль чыылған кізілернің кӧңніне тың кірген. Пістің аймаабыста хакас чон асхынах чуртапча. «Пос тілі чітпес ӱчӱн, андағ фестивальларны иртірерге кирек», -тееннер кӧрігӌілер.
Автор :
Надежда СОЛОМАЧЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы