ПІСТІҢ ПІР ЛЕ ПАРТИЯ - ХАКАСИЯНЫҢ ЧОНЫ
19.11.2018
Хабарлар
Пайрамнығ чыылығ. Киӌее Хакасияның Ӧӧркі Чӧбінің улуғ залында ирткен табығларда чиңіс тутхан Валентин Коновалов Хакасия пазының - Хакасия Правительствозының кнезі тоғызына кірчеткеніне чарыдылған чыылығ ирткен.
ӦӦРКІ ЧӦПТІҢ УЛУҒ ЗАЛЫНЗАР РЕСПУБЛИКАДАҒЫ ПРАЙ ХАЗНА ОРГАННАРЫНЫҢ, ХАЛЫХ ПІРІГІСТЕРІНІҢ, МУНИЦИПАЛИТЕТТЕРНІҢ УСТАҒҶЫЛАРЫ, ДЕПУТАТТАР ПАЗА ПАСХА РЕГИОННАРДАҢ ААЛҶЫЛАР ЧЫЫЛЫСХАННАР. ТАБЫҒЛАРДА ЧИҢІС ТУТХАН ВАЛЕНТИН КОНОВАЛОВ ХАКАСИЯ ПАЗЫНЫҢ - ХАКАСИЯ ПРАВИТЕЛЬСТВОЗЫНЫҢ КНЕЗІ ТОҒЫЗЫНА КІРЧЕТКЕНІНЕ ЧАРЫДЫЛҒАН ПАЙРАМНЫҒ ЧЫЫЛЫҒ АЗЫЛЧАТХАННАҢАР ЧАРЛАЛҒАН.
ТРИБУНАЗАР РЕСПУБЛИКАНЫҢ ТАБЫҒ КОМИССИЯЗЫНЫҢ КНЕЗІ АЛЕКСАНДР ЧУМАНИН ХЫҒЫРТЫЛҒАН. ОЛ ИРТКЕН ТАБЫҒЛАРНЫҢ САЛТАРЛАРЫНАҢАР ИСКІРГЕН. ТАБЫҒ КОМИССИЯЗЫНЫҢ 13 НОЯБРЬДА АЛЫЛҒАН ЧАРАДИИНАҢ, ТАБЫҒЛАРДА ВАЛЕНТИН КОНОВАЛОВ ЧИҢІС ТУТХАНҒА САНАЛҒАН. АЛЕКСАНДР ЧУМАНИН ВАЛЕНТИН КОНОВАЛОВХА ХАКАСИЯ ПАЗЫ ПОЛЧАТХАНЫН КИРЕЧІЛЕПЧЕТКЕН УДОСТОВЕРЕНИЕ ЧИТІРГЕН. КОНСТИТУЦИЯ ХООСТЫРА ВАЛЕНТИН КОНОВАЛОВХА ПРИСЯГА АЛАРҒА КИРЕКТЕЛГЕН, АННАҢАР ОЛ ТРИБУНАЗАР ХЫҒЫРТЫЛҒАН.
Хакасия пазына табылған Валентин Коновалов, холын Россияның Конституциязына салып, присяга алған. Ол, Хакасия пазының тоғызына кірчедіп, чонға сыннаң служба апарарға, Россияның паза Хакасияның Конституциялары, законнары хоостыра тудынарға, Хакасия пазына салылған тоғысты чахсы толдырарға сӧс пирген.
Россияның паза Хакасияның гимннері толдырылған соонда, трибуназар Ӧӧркі Чӧп кнезі Владимир Штыгашев сыххан.
- Аарлығ нанҷылар! Россияда сӧӧ тартылған табығлар тоозыл парды. Хакасия пазының тоғызын толдырарға Валентин Коновалов кірібісті. Ол чонның пӧзік киртінізіне турызарына ізенчем. Амды ағаа, Ӧӧркі Чӧпнең чахсы палғалыстар тудып, чоныбыстың чуртазын турыстыра кӧдірерге кирек полар. Піс ол тоғысха хозым идербіс. Ам правительство тӧстирге, бюджет аларға кирек. Прай ол тоғысты хада толдырарбыс. Чуртағҷылар пістең чахсы тоғыс сағыпчалар. Ам прай кӱзібісті республиканың чуртазын чахсыландырарына саларбыс. Хакасияның наа пазына пӧзік чидіглер алғапчабыс. Пирілген прай молчағлар, сӧстер толдырылзын. Ӧӧркі Чӧп Правительствонаң хада тоғынар. Валентин Олеговичке наа тоғыста пӧзік чидіглер алғапчам, - теен Ӧӧркі Чӧп кнезі.
Трибуназар алғыстас сӧстерінең кӧп кізі сыххан. Іди Хакасияның паза Ағбанның архиепискобы Ионафан Москваның паза прай Русьтың Патриархы Кириллнің алғыстазын читірген. Россияның Хазна Думазының депутады Николай Арефьев коммунисттернің чидіглерінеңер чоохтаан. Иркутск облазының Законодательнай чыылииның кнес орынчызы Ольга Носенко коммунист устапчатхан регионның чуртазынаңар искірген. Новосибирск мэрінің орынҷызы Артём Скатов, коммунист-мэрнің алғыстазын читіріп, ам Коноваловха пір ле партия - Хакасияның чоны - полар теен. «Хакасияның муниципальнай пӱдістері чӧбі» ассоциация кнезінің тоғызын толдырчатхан Абрек Челтыгмашев аалларға улуғ хайығ саларға киректеңер чоохтаан. Ідӧк Хакасия пазын Россия правительствозынаң паза Кремльнең чахсы палғалыстар тударға алғаан.
Хакасияның наа пазы Валентин Коновалов чооғында республиканың прай чуртағҷыларын, ол санда табығларда ӱннерін ағаа пиргеннерні, тоғыр полғаннарны, табығларға килбееннерні дее алғыстаан. Ідӧк ол позына хабасхан коммунисттерге алғызын читірген. Олар табығларда істеніс ӧмелерінең, пасха даа чоннаң тоғасханнар, амды оларның чахығларын толдырарға кирек полар.
Хайди Валентин Коновалов таныхтаан, ам ол чонның хабазарына ізенче, регионның устағҷызы полып, ол прай чонның кирексіністері ӱчӱн турызар. Хакасия пазының тоғызын толдырған Михаил Развожаевке улуғ алғызын читірген. Ол мында кӧп тоғыс толдырыбысхан. Ам республикада чонның киртінізіне турысчаң правительство тӧстелер, андар пӧзік профессионаллар ла алылар.
Мыннаң пайрамнығ чыылығ тоозылған. Пайрамнығ мероприятие тоозылғанда, Валентин Коновалов Хакасия правительствозының чыылиин пастағызын на иртірген. Ол, иргі правительствоның тоғызын пӧзік паалап, ағаа алғызын читірген, анаң иргі правительство отставкаа ызылчатханнаңар чарлаан. Ідӧк кадрлар сурығларынаңар искірген: Хакасия пазынын пастағы орынҷызына Андрей Асочаков турғызылған, Хакасия пазының администрация паза кадрлар сурығларынҷа орынҷызына - Богдан Павленко. Ідӧк республика устағҷызы чуртас-экономикаа теелчеткен соона чылдырылбас сурығларҷа кирек чахығлар пирібіскен.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы