ӰГРЕТЧІЛЕРНІҢ ПОҒДАРХАЗЫ - ӰГРЕНҶӀЛЕРІ
21.11.2018
Хабарлар
Амғы чуртазы. 100 чыл аразына Чоғархы Асхыстағы ортымах школа нинҷе пілістіг тӧлні сығар салған, нинҷе чайаачы усты чонға кир салған.
Аның пӱӱнгі чуртазынаңар ӱгредіг киреенҷе директорның орынҷызы Татьяна Юрьевна Межекова чоохтап пирген. Ол 20 чыл ӱгредіг киреенде істенче. 2000 чылдаң сығара Чоғархы Асхыстағы школада тоғынып пастаан, 2012 чылдаң директор орынҷызының тоғызын апарча.
Татьяна Юрьевна, школаның пӱӱніі чуртазынаңар чоохтап пиріңер.
- 2013 чылдаң ала Чоғархы Асхыстағы ортымах школанаң Вадим Константинович Мамышев устап парча. Аннаң хада ӱгретчілер ӧмезінде 26 кізі саналча. Олар - Россия Федерациязы ӱгредиинің аарластығ тоғынҷылары, чыл кізізі - 2017, пӧзік категориялығ ӱгретчілер паза чиит специалисттер.
Пасталығ класстағы ӱгренҷілернең тоғыс апарчалар: Инна Ивандаева, Диана Топоева, Ирина Сунчугашева, Гертруда Толмашова, Руфина Бурнакова, Олег Сунчугашев паза Диана Чочиева. Хакас тілі паза литература ӱгретчізі Анжела Миягашеваның уроктары хаҷан даа хынығ иртчелер. Тӧреен тілі уроктарына ӱгренҷілернің прайзы чӧрче. Орыс тілі паза литература ӱгретчілері Людмила Бурнакованаң Татьяна Толмашова оолағас-хызыҷахтарны орта паза хоос чоохтанарға ӱгретчелер. Іди полған на ӱгретчі позының предмедінҷе олғаннарның кӧрізін алғытча паза сағызын пайытча. Олар - математика ӱгретчілері Лариса Окунева паза Юлия Сайбаракова, англия тілі ӱгретчілері Нина Амзаракова, Тамара Майнагашева, биология паза химия ӱгретчізі Дина Сунчугашева, география ӱгретчізі Ольга Сунчугашева, тархын ӱгретчізі Эдуард Тахтобин, физкультура ӱгретчілері Виктор Тодинов паза Евгений Мамышев. Хазии уйан ӱгренҷілернең Елена Окунева тоғынча. Библиотека тоғынҷызы Галина Толмашова, тізең, полған на палаа чахсы книга таап пирерге тимде. Ағаа хоза улуғ тоғыс толдырчалар
Прай ӱгретчілер хада ынағ тоғын парчалар. Ідӧк хайди даа Алефтина Дмитриевна Чугунековадаңар чоохтирға кирек. Ол, амды тынағда даа полза, прай чуртазын школаа пир салған. Халғанҷы чылларда олғаннарны ЕГЭ -ға тимнирге чахсы полысхан.
- Амғы туста школада нинче олған ӱгренче? Оларның ӱгредии хайди парча?
- Пістің ӧӧн ис-пайыбыс - ол ӱгренҷілер. Амғы туста школада 150 олған саналча. Ол - Чоғархы Асхыстағы школа ӱгренҷілерінең пасха, олған садындағы 25 пала паза школаа парарға тимненчеткен группазар чӧрчеткен 12 олған. Ідӧк Казанов аалдағы пасталығ школа пістің филиалыбыс полча, анда 8 ӱгренҷі ӱгренче.
Оларның ӱгредіг синінеңер чоохтаза, ол 30 - 40 %-ке тиңнелче. Ортымахти алза, 10 паланың аразында тӧрті «4» - «5»-ке ӱгренче. Ӱгренҷілер чылдаң аймах наука конференцияларында, олимпиадаларда араласчалар. Школада олған асхынах, аннаңар оларға нинҷе-нинҷе предметче олимпиадаларда аралазарға килісче. Кӧзідімге, Алина Чанкова 2016 чылда тоғыс предметче олимпиадаларда араласхан. Хызыҷах тӧрт чирде чиңіске турысхан, ағаа хоза ікі предметче сыйыхтығ орыннар алған. Андағлар пістің илееде.
Амғы тустағы ӱгретчілер ӧмезі
Ідӧк олғаннар спорт саринаң сабланчалар. Мында тренерлернің тӱзімніг тоғызынаңар чоохтирға кирек. Евгений Мамышев оолағас-хызычахтарны футболға паза хоккейге кӧніктірче. Оларның чидіглерін санап таа полбас (хатхырча. - Авт.). Геннадий Бурнаков грек-рим кӱрезін апарча. Ӱр ниместе Катанов аалзар кӱрес мариина пар килгеннер, чиңіс паза сыйыхтығ орын ағылғаннар. Виктор Тодинов ӱгренҷілернің чааҷы-патриотизм кӧңнілерін кӧдір парча. Аның ух атарынҷа секциязынзар олғаннар хынып чӧрчелер. Іди ӱгренҷілер, аймах марығларда аралазып, чахсы чидіглер кӧзітчелер.
- Школа тоосханнарның чуртазын хайығда тутчазар ба?
- Піс прайзын хайығда тутчабыс. Чоохтирға кирек, школа тоосхан оол-хыстарның кӧбізі вузтарзар кіріп алча. Кӧзідімге, 2015 чылда школаны сигіс кізі тоосхан, оларның алтызы институтсар кіріп алған. Олар прайзы чахсы ӱгрен парчалар. Пістің чииттер Хызылчарда, Томскта, Новосибирскте, Саратовта паза пасха даа городтарда аймах специальностьтарға ӱгренчелер.
Чиит специалисттер аалзар тоғынарға килчеткені ӧріндірче. Часхызын пір ӱгретчі ағырыбысхан, пірсі тоғыстаң парыбысхан. Хайдаң специалисттер табарбын тіп сағыссыраам. Че олар постары килгеннер. Халғанҷы туста Чоғархы Асхыстағы оол-хыстар ӱгретчі специальнозына ӱгренерге кірбинібіскені сағыссыратча. Пісті алыстырар кізі поларға кирек, ол пістің школаны тоосхан полза, улам на чахсы.
Таныхтирға кирек, пістің школабыс улуғ даа полбаза, мыннаң кӧп саблығ кізілер сыхханнар. Ниме ӧріндірче, олар школаны ундубинчалар, пос кӧңнінең удаа килчелер. Ӱгренҷілернең тоғазып, школа тузынаңар, хайдағ чидіглерге читкеннерінеңер чоохтап пирчелер. Минің кӧрізімнең, олар, мындағ оңдайнаң школаа алғызын читіріп, ӧсчеткен тӧлні чахсы чидіглерге кӧніктірчелер.
- Сизінгенде, Чоғархы Асхыстағы ӱгренҷілер прай даа саринаң кӱстенӌіктер. Хайди сағынчазар, ол ӱгретчілер тоғызынаң палғалыстығ алай сірер іӌе-пабаларнаң тоғыс апарчазар?
- Аалдағы чоннаң палғалыстығ полар тіп сағынчам. Пістің школада наа ӱгретчілер тоғынчалар. Мағаа олардаң мында тоғынарға паза чуртирға истіг теенін удаа истерге килісче. Сынап таа, пістің олғаннар хыйғалар, амырлар, іче-пабалар даа школазар хырыс-табыснаң айланминчалар.
Піс іҷе-пабаларнаң хада тоғынчабыс. Пістің пiр пӧгін нооза - палаларға чахсы ӱгредіг пирері. Ӱгренҷілер постары даа кӱстенчіктер. Мының алнында аалда илееде «сидік» сӧбірелер полған. Че амды чонның сағызы алысча. Прайзы чахсы чуртирға кӱстенче. Олғаннар даа тамкы тартарға паза ачығ суғ амзирға тартылбинчалар. Амды ол модада нимес тіпчелер. Олар ӱгреніске, спортха паза хазых чуртасха ӧӧн хайығ салчалар.
- Хайдағ даа тӱзімніг тоғыста сидіксіністер поладыр. Чоғархы Асхыстағы школаның ӧӧн ағырсымнығ сурии нименең палғалыстығ?
- Пістің аалдағы пасталығ класстар ӱгренчеткен школа уғаа иргі. Ағаа пӱӱл 100 чыл толча. Піс анда тыхтағ тоғыстарын идерге кӱстенчебіс, че аның тузазы ӱрге нимес. Итсе-де, ортымах школа даа иргі. Мында тиксі тыхтағ тоғызы толдырыл парғанда, ол сала иптіг кӧрінче, че мында кабинеттер чидіспинче. Аннаңар амғы туста пістің ӧӧн сағыссыразыбыс - наа школа пӱдірері. Ол сурығнаң піс кӧп чирзер айланғабыс. Халғанҷы туста наа школа пӱдіриинеңер чоох пар сыхты. Аалдағы даа ӱгренҷілер чахсы оңдайларда ӱгренерге турыстығлар нооза. Ідӧк школаны наа технологияларнаң пайыдарға кирек.
- Школаның таңдағы чуртазын хайди кӧрчезер?
- Прай ниме чахсы поларына ізенчем. Ӱгренҷілер чахсы ӱгреніп одырзыннар, хазых ползыннар. Аалға, тізең, наа школа пӱдір пирзіннер.
Автор :
"Хабар"
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы