ТАРХЫНҒА ПАЗА ПІР КӰН КИРІЛ ПАРДЫ
28.11.2018
Хабарлар
Пайрам. Асхыс аймааның Чоғархы Асхыс аалдағы школаның 100 чылы алғым таныхталды.
Чоғархы Асхыстағы ӱгретчілер ӧмезі пайрамда сарын толдырча.
Школаны мындағ пайрамынаң алғыстирға чон орындағы клубха толдыра чыылысхан. Аалҷыларның санында Асхыс аймааның устағ-пастаа, ветеран-ӱгретчілер, школаны аймах чылларда тоосханнар полғаннар. Алғыс сӧстерін паза сыйыхтар читірерге ідӧк Ағбаннаң килгеннер. Олар - Хакасияның ӱгредіг паза наука министерствозының национальнай пӧлиинің ӧӧн специализі Анна Танбаева, национальнай паза территориальнай политика министрінің орынҷызы Нина Челтыгмашева, Ӧӧркі Чӧп депутады Геннадий Канзычаков.
- Аарлығ арғыстар! Улуғ алғыс прайзына, піссер килгеніңер ӱчӱн. Школа - ол пістің ікінҷі ибібіс нооза. Пастағы уроктар, пастағы ӱгретчілер сағызыбыста хаҷанға даа халчалар. Аннаңар, чылығ сӧстеріңе айабин, пӱӱн оларны читірерзер тіп ікінҷілебинчем. Ӱгренҷілерібіс, тізең уламох чахсы чидіглерге чит турзыннар, - пайрамны піди асхан Чоғархы Асхыстағы школаның устағҷызы Вадим Мамышев.
Хайди таныхтаан Асхыс аймааның пазы Абрек Челтыгмашев, устағҷы, чиит тее полза, школа чахсы чидіглерге читче. «Чоғархы Асхыстағы школа ӱгретчілері олғаннарын пірге хазна сыныхтағларына тимнепчеткенін Асхыстағы лицей-интернаттағыларнаң тиңнестірерге чарир. Сағынчам, олар аннаң андар ідӧк ле тоғынарлар. Паза ниме чоохтирға сағынчам? Асхыс аймаандағы пасха школаларны алза, оларда ӱгренчеткен палаларны іче-пабалары Асхыстағы лицей-интернатсар пирібізерге кӱстенчелер, пӧзік пілістер алып алзыннар тіп. Че Чоғархы Асхыстағыларны андар ыспинчалар. Мында ӱгретчілер чахсы пілістер пирчелер нооза», - теен Абрек Васильевич.
Паза Абрек Челтыгмашев мағаа пу кӱнде тың уйадыстығ теен. «Школаның 90 чылын таныхтапчатханда, мин аның 100 чылын наа турада таныхтирбыс тіп молчаам, - чарытхан ол. - Че ол сурығ табырах пӧгілбинче. Піс пу тусха Ис пилтірі, Катанов аалларда наа школалар пӱдір салғабыс. Национальнай проекттер хоостыра Чоғархы Асхыста наа школа 2021-2022 чылларда ла пӱдірілері кӧрілче», - чарытхан устағҷы. Сағынчабыс, пу пайрамда ол иң ӧӧн искіріг полған. Чоғархы Асхыстағылар наа школаны хаҷаннаң сағыпчалар.
Пу кӱнде Асхыс аймааның пазы ідӧк Чоғархы Асхыстағы школада тоғынчатхан улусха принтер сыйлап пирген. Паза ол школаны арығ паза чылығ тутчатханнарға Аарластығ пічіктер читірген.
Александр Окунев сағам Чоғархы Асхыс аал чӧбінің кнезі полча. Че аның алнында ол 20 чыл пу школанаң устаан. Асхыс аймааның пазы ағаа ідӧк алғыстас пічиин читірген. Александр Кимович, тізең, аал чӧбі пазы адынаң Чоғархы Асхыс аалдағы школаа оргтехника сыйлап пирген.
Тиксі алза, пайрамда алғыстастар кӧп полған, сыйыхтар ідӧк асхынах нимес иділген. Математика ӱгретчілері Алефтина Чугунекованаң Лариса Окунева ӱр чыллар тоғынчатхан ӱчӱн, Хакасияның ӱгредіг министерствозының алғыстас пічіктерін алғаннар. Оларны Анна Танбаева читірген.
Нина Челтыгмашева, тізең, Хакасияның национальнай паза территориальнай политика министрінің адынаң алғыстас сӧстерінең пасха, школа устағҷызына хазна символын аларға сертификат сыйлаан.
Хакасияның Ӧӧркі Чӧп депутады Геннадий Канзычаков, школаның спорттағы, ӧӧнінде футболча, чидіглерін паалап, физкультура ӱгретчізіне аймах меспектер сыйлап пирген. Ӧӧркі Чӧптің алғыстас пічіктерін ол школа устағҷызының орынҷызы Татьяна Межековаа, англия тілі ӱгретчізі Нина Амзараковаа, математика ӱгретчізі Алефтина Чугунековаа читірген.
Асхыс аймааның ӱгредіг устанызының пастығы Ирина Кучугешева алғыстас пічіктерін чиит ӱгретчілерге читірген. «Оларның тоғынар кӧңні уламох кӧдірілзін», - теен ол. Чоохтирға кирек, пӱӱнгі кӱнде Чоғархы Асхыстағы школа ӱгретчілерінің кӧбізі - чииттер!
Асхыс аймаандағы школалар устағҷылары, прайзы хада сценаа сығып, наа школа пӱдір пирзіннер тіп алғааннар. Піс, Чоғархы Асхыстағы школаны тоосхан улус, ідӧк наа школаны чидікпин сағыпчабыс. Теестегі пайрамны анда таныхтирына тың ізенчебіс.
СӦС СОО: Чоғархы Асхыстағы школаның 100 чылына удур «Хабар» газетада 21 паза 23 ноябрьда хабарлар сыхханнар. Хынчатхан школабыстаңар материалларны прай кӧңнібіснең тимнеен дее ползабыс, алӌаастар сығарыбох салтырбыс. Мина Макаровна орнына Нина Макаровна сых партыр. Зинаида Никифоровна Пакачакованың фамилиязы Патачакова тіп сых партыр. Пу алӌаастар ӱчӱн пыросынчабыс.
Автор :
Александра СУНЧУГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде