ӦДӀСТЕРНӀ ТӦЛИРӀНЕ - 2 ЧЫЛ
11.01.2019
Хабарлар
Виталий ИВАНОВНАҢ Валентин КОНОВАЛОВ тоғазығ салтарларын искірчелер.
Ӱлгӱде. Киӌее Хакасия пазы Валентин Коновалов паза правительство кізілері «Сибирь МРСК-зы» компанияның ӧӧн директоры Виталий Ивановнаң тоғасханнар.
Устағӌылар Хакасияда чурт-коммунальнай хоныхтағы киректерні паза чылығ пирӌен тус хайди иртчеткенін ӱзӱргеннер, ідӧк чарытхы пааларына теелгеннер. Тоғазығ салтарлары хабарӌыларға искірілген.
- Иң пастап Хакасия пазына кӱскӱ-хысхы хайди иртчеткеннеңер искіргем, - чарытхан «Сибирь МРСК-зы» компанияның ӧӧн директоры Виталий Иванов. - Тоғысха чахсы паалағ пирілген, саайлар саны 15 процентке хызырылған, чарытхы читірері тӱзімніг парча. Ікінӌізін піс чарытхы тартарын, пааларны сыныхтағда тударын, чурт-коммунальнай хоныхтағы ӧдістерні ӱзӱргебіс. Ӱзӱріге ідӧк «Цифровая трансформация 2030» проект сығарылған, ол хазнаның ӧӧн проекттерінің пірсі полча (проект чарытхы сетьтерін тиксі нааӌылирына кӧстелген, нааӌылағ цифровой технологияларӌа толдырылар, че алызығлар чарытхы пааларына теелбестер - Ред.). Аны Россия президенті чаратхан. «Россети» компаниялар ӧмезі «Сибирь МРСК-зы» пастыра Ағбан пилтірі аймаандағы чарытхы сетьтерінде пастағы проекттерні чуртасха кирер. Улуғ инвестициялар кӧрілче - 300 миллион азыра салковайға.
Хакасия пазы чарытхы пааларын 10 чылға кӧр саларын ӱзӱрерге чаратхан, Сибирьдегі федеральнай округта піс мындағ пір дее чӧптезігде хол салғалахпыс. Сағынчам, пӱӱл февраль-мартта пастағы чӧптезіг Хакасиянаң хада полар. Пӧгін - пааларны 10 чылға кӧр саларға. Хазна синінде пу тоғыс 2020 чылдаң сығара апарылар. Одістерні алза, социальнай учреждениелерде пу сурығ пӧгіл парған тіп санапчам. ЖКХ-да пу сурығ хаӌаннаң турча, ӧдістер чыылча, ағаа хоза тӧлеглер ам иртчеткен чылығ пирчең туста тӧлелбинче. Наа ӧдістер сині 300 миллион салковайға чит парир. Тоғазығда тӧлеглерні сыныхтағда тутчаң тоғысчы ӧмені тӧстирге чарадылған. Компания чурт-коммунальнай хоных системазындағы ӧдістерні ікі чыл аразына тӧлебізерге тус пирерге чӧпнең сыххан, сынап теестегі тӧлеглер тузында кірзе. Сағынчам, пу чарадығӌа пастағы чӧптезіглер ікі неделя пазынаң тимнелер.
- Тоғазығ чахсы иртті, сурығларны хада-пірге пӧгер оңдайлар табылған, - хозылған Хакасия пазы Валентин Коновалов. - Виталий Валерьевич оларның ӧӧн чардығын чарыт пирген. Хомзынысха, ЖКХ системазында тӧлелбинчеткен тӧлеглер пар. Одістер нинӌе-де чыл аразына чыыл парғаннар, ол санда алынӌа, муниципалитет паза бюджет предприятиелерінің. Республика ӱлгӱлері сурығны пӧгерге прай оңдайларны тілир, чардыхти тӧлирге полызар. Пу сурығда піс энергетиктернен пілісчебіс. Социальнай пӱдіріглер чарытхы чох паза артызылбастар. Мыннаң мындар ЖКХ сурығларын пӧгерге кӱстенербіс. Правительство кізілері дее пілінчелер, энергетиктер дее анзын таныхтапчалар: ЖКХ системазына хайығ саларға кирек, ол прайзына тузалығ полар. Пааларны алза, пілдістіг, правительство республика чуртағӌыларынаңар сағыссырапча, ол - пааларны пір синде тудары, тың ӧскірбезі, олох туста піс оңарчабыс - энергетиктер ӱрегліг тоғынмастар. Мында прайзына чахсы сарин тілирбіс.
Автор :
Пазып алған Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы