НАА ЧЫЛДА - НАА АРҒЫС
11.01.2019
Хабарлар
Данил кӱҷӱгезінең паза пабазы А.В.БОЛТА
Президенттiң сыйии. Хакасияның правительство туразында Данил Болтаа Россия президенті Владимир Путиннің адынаң французскай бульдог породалығ кӱҷӱгесті сыйлап пиргеннер
Хайди чонда тидірлер, Наа чылда полған на чазыттығ сағыс толча. Амды анзын Харатас городтың кічіг чуртағҷызы Данил пілче. Ол кӱҷӱгесті сыйыхха алып аларға хаҷанох сағынған. Андағ сурыныснаң Данил президент Владимир Путинге пічік пас салған. Ағбанзар правительство туразынзар 10 частығ оолағас пабазы Александр Вячеславовичнең, іҷезі Олеся Валериевнанаң паза тӧрт частығ туңмазы Ярославнаң хада килген. Паба-іҷезі хайдағ кирекнең Ағбанзар парчатханнарын оолларынаң халғанҷызына теере чазырғаннар. Хакасия пазының орынҷызы Татьяна Курбатова оларны чылығ удурлаан. Ол Данилдең сурған: «Хайдағ синің иң чазыттығ сағыс?» Данил нандырған: «Хазна президентінең сыйыхха кӱҷӱгесті алып аларға».
- Мин чахсы ӱгренчем. Пу чылны саңай ла «пистерге» тоос салғам. Дзюдонаң айғасчам, - чоохтаан Данил.
- Сағыстар хаӌан даа толарға киректер. Владимир Владимирович Путин сағаа сыйиин читір пирерге чахаан. Піс аның чахиин толдырчабыс, - таныхтаан Татьяна Курбатова.
Олох туста пасха пӧліктең кӱҷӱгесті сығар килгеннер. Ол ікі ле айлығ. Оолағастарның ӧрінгені харахха тасталған. Данил кӱҷӱгесті, холға алып, хуҷахтабысхан. Палаларның сағызы толарына ідӧк Хакасия пазы Валентин Коновалов паза республиканың аң-хусты паза чир-чайаанны хайраллирынҷа хазна комитедінің кнес тоғызын толдырчатхан Владимир Лебедев хабасханнар.
- Мин мындағ породалығ адайларға уғаа хынчам, олар уғаа хынығлар. Ідӧк олар хыйғалар паза сіліглер. Мин пу адайлардаңар кӧп кинде хығыр салғам. Олар кізінің чооғын исчелер. Оларны чахығлар толдырарға ӱгрет саларға чарир. Мин аны кинологтар чӧптері полызиинаң ӱгредерге сағынчам, - чоохтаан Данил.
Наа ээзі кӱҷӱгесті Тайсон адап салған. Аның чооғынаң, ол уғаа сіліг ат полча.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы