ХАКАСИЯНЫҢ МАТЫР ООЛҒЫ
16.01.2019
Хабарлар
Хумартхылас. Чечнядағы пастағы чаалазығ араласчызы, Россия Матыры Игорь Ахпашевтің хумартхызына чарыдылған мероприятие Ағбандағы 1 № школада ирткен.
Мероприятие пасталчатханда, юнармеецтер актовай залзар Россия флагын пайрамни киргеннер. Анаң Россия паза Хакасия гимннері ойнадылған.
Хайди таныхтааннар, пістің чир-суғҷыларыбыс чаалазығлар тузында хазна турғысхан пӧгіннерні турыстыра толдырғаннар, че піреезі аның ӱчӱн иң аарлығ нимені, чуртазын, пир салған. Матырлар амғы чииттерге кӧзідім полчалар. Андағ матырларның пірсі - Игорь Николаевич Ахпашев. 13 январьда 1995 чылда Грозныйда полған чаалазығ тузында аның танкы иң пастағыларның санында Министрлер Чӧбі туразынзар сыххан, 10 орыннаң атчатхан ыырҷыларны чох идіп, мотострелковай паза десант чааҷыларына чол асхан. Ыырҷылар Игорь Николаевичтің танкын гранатометтаң атыбысханда, ол, пленге кірбес ӱчӱн, аннаң андар чааласхан. Че чаа машиназы кӧйчеткенде, аның істінде полған снарядтар чара чачырааннар. Экипаж ӱреен.
Россия президентінің 15 майда 1995 чылда алылған указы хоостыра гвардияның улуғ лейтенанты Игорь Николаевич Ахпашевке Россия Матыры ат пирілген. 24 чыл ирт парған даа полза, аның махачы омазын 1 № школаның полған на ӱгретчізі паза ӱгренӌізі чӱреенде ал чӧрче.
2013 чылда кизек чаалазығларда чат халған Хакасияның оолларына чарыдылған Хумартхы кинде чарыхха сыххан. Андар 66 кізінің ады кирілген. Аны тимнирінде Республиканың чааҷы комиссарының полысчызы Олег Пагельс ӧткін араласхан.
- Кизек чаалазығларда чат халған Хакасияның оолларына чарыдылған Хумартхы кинде осхас тоғыс Россияда хаҷан даа сыхпаан. Мында піс оолларның чуртас чолын толдыразынаң чарыт саларға кӱстенгебіс. Иң сидік оларның туған-чағыннарынаң, олар ӱгренген ӱгредіг учреждениелер устағҷыларынаң палғалызары полған.
Ідӧк піс ооллар олаңай чуртаста хайдағ полғанннарын чарыдарға харасхабыс. Ачырғасха, ИлбекАда чаа соонда пірее орыннарда чаалазығлар тохтадылбаан.
Че пӱӱнгі кӱнге ол сан алыс парған. Димитриевскай субботада піс 76 оолны сағысха кирчебіс. Ізенчем, ол сан паза алыспас.
Оолларыбыстың махачы хылии амғы паза пазағы толлерге кӧзідім ползын, - таныхтаан Олег Игоревич. Ідӧк хумартхылас мероприятиеде Чечняда полған чаалазығның араласчызы, Игорь Ахпашевнең хада служба апарған подполковник Олег Солодкий чоох тутхан:
- Ол хорғыстығ киректерні сағысха кирерге уғаа аар. Полған на чаа - улуғ чобағ. Игорь Ахпашевтің чарых омазы сағызыбыста хаҷанға даа халар. Чааҷылар пістің сағызыбыста чуртапчалар.
Игорь Ахпашевтің пабазы Николай Гаврилович, хазых полғанда, оолғы ӱгренген 1 № школазар удаа кил турчаң. Ол ӱгренчілернең чоохтазығлар кӧп апарҷаң. Игорьның олған тузынаңар, хайди ол ӱгренгеннеңер чоохтаҷаң. 1 № школаның ӱгренҷілері паба-іҷее оолғын чідіргені хайдағ улуғ чобағ полғанын пілчелер. Школада Россия Матырына чарыдылған хумартхылас пулуңы тимнелген. Мероприятие тузында юнармия пірігізінің араласчылары андар чахайахтар салғаннар. Матырны хумартхылап, ӱгретчілер паза ӱгренҷілер пір минута сым турғаннар.
Казаньдағы танковай училищені тоозып, Игорь Ахпашев служба иртерге Юргазар ызылған. Хумартхылас мероприятиеде аның пастағы командирі Сергей Кибирев полған.
- Игорь Т-80 танкнаң чӧрерге ӱгренген. Че пістің полкта Т-72Б танктар полған. Анда пасха тиріглер паза оборудование турча. Че Игорь ол танкнаң чӧрерге табырах ӱгреніп алған. Мин аны мӧңіс кӧңніліг хачан даа кӧрбеем. Игорь, пірее ниме толдыр полбин, хырыстырчатса даа, аның харахтары чылтырасханнар. Ол уғаа пик сындырлығ полған. Ағаа ізенерге хаҷан даа чарир полған, алай хайди тіпчелер, мин аннаң хада разведкаа парарчыхпын, - сағысха кирген Сергей Васильевич.
Хумартхылас мероприятие соонда ӱгретчілер ӱгренҷілерінең хада сыыратсар чол тутханнар. Анда олар Игорь Ахпашевтің сӧӧгінзер чахайахтар паза веноктар салғаннар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы