ӦӦН ПӦГӀН - ЛИТЕРАТУРАНЫ ТИЛІДЕРІ
01.02.2019
Хабарлар
Культура. Хакасияда 2019 чыл Писатель чылы тіп чарлалған. Ол республиканың писательлер пірігізінің 70 чылына паза драматург Михаил Еремеевич Кильчичаковтың 100 чазына чарыдылча.
Пу неделяда республиканың культура министерствозында пресс-конференция ирткен. Хабарҷыларнаң культура министрінің тоғызын толдырчатхан Леонид Ерёмин, Хакасия писательлері пірігізінің кнезі Альбина Курбижекова, аның орынҷызы Юрий Иванов, Чайаачылар туразының директор тоғызын толдырчатхан Надежда Бурнакова тоғасханнар.
Пастап сӧс алған Леонид Ерёмин. Ол чоохтаан: «2019 чыл Хакасияның культуразында танығлығ пайрамнарға пай. Че Писатель чылын чарлап, піс иң пурун Хакасияның писательлер пірігізінің 70 чылын паза саблығ драматург Михаил Еремеевич Кильчичаковтың 100 чазын таныхтирға пӧгінгебіс. Пайрамнарға удур піс марығлар чарлаабыс, чыл тооза аймах мероприятиелер иртірілер. Ол тоғыста республиканың прай культура учреждениелері аралазар. Ідӧк ізенчебіс, Писатель чылында литератураа хынчатхан улустың саны хозылар, пістің хоос сӧстің чайаачылары, тізең, хығырығҷыларны наа тоғыстарынаң ӧріндірерлер».
Альбина Курбижекова пресс-конференция алнында архив пічіктерін істестір. Чайаачы устың таниинаң, Хакас автоном облазында писательлернің пастағы пірігізі 1935 чылда тӧстелген. Ол Писательлер бюрозы адалған. 1937 чылда Хакас автоном облазында хоос сӧс чайаачыларының чыылии ирткен. Анда хакас литератураның ағырсымнығ сурығлары ӱзӱрілгеннер. Че олох чыл бюро араласчыларының кӧбізі репрессияа хабылған. Іди дее полза, Хакасияның писательлер пірігізі тархынын 1930 чыллардаң апарча. Пічіктер хоостыра СССР-ның Писательлер пірігізінің орындағы пӧлии 1949 чылда часхызын тӧстелген. Аның пастағы кізілері Николай Доможаков, Иван Костяков, Иван Котюшев паза Иван Кычаков полғаннар.
1974 - 1990 чылларда организациянаң драматург Михаил Кильчичаков устаан. Тӧӧ чирінең сыххан чайаачы ус Хакасияның чонына паалап полбас хозым иткен. Аның «Абалығ хол» пьесазы СССР-ның 94 театрында турғызылған, произведениелері 12 аймах тілге тілбестелген. Пӱӱл М.Е.Кильчичаковтың 100 чазы алғым таныхталар. Хакасияның писательлері анда ӧткін аралазарлар.
Альбина Курбижекованың чооғынаң, пӱӱнгі кӱнде хоос сӧс чайаачыларының пірігізінде 33 кізі саналча. Олар Хакас чирін ырахха сабландырчалар. Кӧзідімге, Наталья Ахпашеваның паза Алексей Козловскийнің кибелістерін республикада ла нимес, СНГ-зар кірчеткен хазналарда хынып хығырчалар. Драматург Илья Топоевтің пьесалары пастыра пістің театрларда илееде ойын турғызылған. Ідӧк Илья Прокопьевич «Библияны» хакас тіліне тілбестеп, улуғ тоғыс ит салған. Писатель Анатолий Султрековтың чайаачызы чир-суғҷыларына чарыдылған. Саблығ кізі 20 артиинаң кинде чарыхха сығарыбысхан.
Альбина Васильевнаның улуғ ӧрінізі чиит авторлар полчалар. «Піс таланттығ оол-хыстарға хабазарға кӱстенчебіс. Тус читсе, олар писательлер пірігізінзер кірерлер, аннаңар таңдағызынзар ізеніснең кӧрчебіс», - теен тахпахчы.
Писатель чылында иртер мероприятиелердеңер Надежда Бурнакова искірген. Пайрамнарға тимненіп, Чайаачылар туразы азынада ікі марығ чарлаптыр. Пастағызы «Таланттарның тигір хуры» адалча, анда чиит авторлар устарынаң сынасчалар. Иң артых тоғыстар алынҷа чыындыда сығарыларлар. Ідӧк 2018 чылның 3 декабрьынаң пасти ӱгренҷілернің аразында «Син хығырчазың, мин хығырчам, прай Хакасия хығырча» марығ парча. Марығ салтарлары апрельде искірілер. Кибір хоостыра чайғызын регионнар аразындағы литература лагерьі тоғынар. Пӱӱл аның тоғызы драматург Михаил Кильчичаковтың 100 чазына чарыдылар. 4 сентябрьда, Хакас тілі кӱнінде, тізең, улуғ литература марафоны полар. Писательлер, студенттер, республика чуртағҷылары, ол акцияда аралазып, Михаил Еремеевичтің чайаачы тоғыстарын тыыда хығырарлар. Саблығ драматургтың чайаачызына пістің кізілер хынчалар, аннаңар марафон пӧзік синде иртер тіп ікінҷілес чоғыл.
Писатель чылының халғанҷызында регионнар аразындағы улуғ форум иртірері кӧріл парған.
Министр тоғызын толдырчатхан Леонид Ерёминнің таниинаң, Хакасияның чуртағҷыларын культура мероприятиелеріне пай чыл сағыпча, аннаңар ол хынчатхан писательлернің чайаачызын сағысха кирерге, посха ӧткін аралазарға хығырған.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы