НАА КӦСТЕГЛЕР - НАА ТИЛІС ЧОЛЛАРЫ
06.02.2019
Хабарлар
Нацпроекттер. Хакасияда нацпроекттерні чуртасха кирерінҷе тоғыс хайди парчатханы правительство чыылиинда ӱзӱрілген.
Россия президенті 2018 чылның майында пирген чахығларха национальнай проекттер тимнелген. Регионнар халғанҷы чарым чыл, оларны тӱптестіріп, постарының тиліс чолларын тӧстепчелер. Хакасия, пасхазының соона халбин, федеральнай синде пос проекттерін арачылапча. 4 февральда Хакасия пазы Валентин Коноваловтың устаанынаң правительствоның алынҷа чыылиинда тӧрт нацпроектче - «Цифровой экономика», «Кічіг паза ортын пос кирее паза идінҷектін алынҷа пастаана хабазары», «Істеніс сығарызы паза чонға тоғыс табарына хабазығ» паза «Чоннар аразындағы кооперация паза экспорт» - республиканың тоғызы паза кӧстеглері ӱзӱрілген. Чыылыға кӧстегліг министерство устағҷылары паза город-аймахтар пастары хығыртылғаннар. Министрлер национальнай проекттердеңер паза оларны хоостыра чуртасха кирілер регион проекттерінеңер алғыда искіргеннер.
Кӧзідімге, тӧрт нацпроекттің прайзы даа Хакасияның экономика тилізі министерствозына теелче. Оларның ӧӧні - «Кічіг паза ортын пос кирее паза идінҷектің алынҷа пастаана хабазары». Аны хоостыра тӧрт кӧстегҷе тоғыс апарылар: пос киреенең айғазар оңдайларны чахсыландырарынҷа, ӧдіске ахчаны аларын нииктирінҷе, пос киреен табырах тилідерінҷе паза пос киреенең айғазарын сабландырарынҷа. Пу кӧстеглерҷе идінҷектерні хайдағ наа нимелер сағыпчатханнаңар толдыра искіріг Хакасияның экономика тилізі министерствозының департамент пастығы Анастасия Ходьконаң чоохтазығда пирілген («Хабар» газетаның 2018 чылның 26 декабрьында сыххан алай газетаның сайтында (http:// khakaschiry.ru) «Экономика» пӧлиинде табарзар.
Чоохтирға кирек, Хакасия пазы Валентин Коновалов чаратса, ирткен чылда пастағызын на ирткен бизнес-форум пӱӱл паза пазағы чылларда иртіріл турар. Форум пос киреенең айғасчатханнарның кӧңніне кірген. Тиксі алза, пу национальнай проект полызиинаң республикада пос киреенең айғасчатханнар саны 13 муң кізее хозыл парарға кирек: 2018 чылдағы 59 муң кізідең 2024 чылда 72 муң кізее теере. Чыылығда республиканың экономика тилізі министрінің тоғызын толдырчатхан Николай Евдокимов Хакасия пазынаң «Минің пос киреем» кінде тоғынар улусха республика бюджедінде 7 миллион азыра салковай паза Ағбанда кінге 500 квадрат метр улуғ тура табарға полызығ сурған.
Аал хонииның алынҷа кӧстегліг национальнай проекті чоғыл, аннаңар Хакасияның аал хонии паза ас-тамах министерствозы ікі нацпроектте тоғынар кӧстеглерге хозылча: пірсі - «Кічіг паза ортын пос кирее паза идінҷектің алынҷа пастаа» паза «Чоннар аразындағы кооперация паза экспорт». Оларны хоостыра «Фермерлерге хабазар оңдайлар паза аал хонии кооперациялар тилізі» регион проекті тимнелген. Аны хоостыра республикада Компетенция кіні тӧстелер, фермерлерге паза кооперацияларға гранттар паза субсидиялар кӧрілче. Алты чыл аразына федеральнай бюджеттең 140 миллион салковай паза республика бюджедінең 1 миллион 770 муң салковай пирілері кӧрілче.
«Цифровой экономика» национальнай программаҷа тимнелген регион проекттерінеңер искірген Хакасия правительствозының тоғызын тӧстирінҷе управление пастығының орынҷызы Екатерина Кузьмина. Оларны хоостыра республикадағы социальнай учреждениелерзер Интернет читірҷең сетьтер тартарына федеральнай бюджеттең илееде ахча пирілері кӧрілче. Аннаң пасха, ӱгредіг, имнег паза пасха учреждениелерге, ідӧк ӱлгӱ органнарына сайттар тимнелер. Чыылчатхан искіріг тарадылбас ӱчӱн алынҷа проект тимнелген. Пуох программаҷа «Хыйға город» наа устағ оңдайы чуртасха кирілер.
«Істеніс сығарызы паза чонға тоғыс табарына хабазығ» нацпроектче регионның ӱс проекті тимнелген. Оларның ікізі - «Істеніс сығарызын ӧскірерінҷе тиксі хабазығ оңдайлары» паза «Предприятиелерде істеніс сығарызын ӧскірерінҷе алынҷа хабазығ» (2021 -2024 чыллар) - Хакасияның экономика тилізі министерствозының холында, пірсі - «Чонға тоғыс табарына хабазары паза істеніс сығарызының ӧзізі ӱчӱн істеніс рыногын чахсыландырары» (2022-2024 чыллар) - тізең, Хакасияның істеніс паза чонға тоғыс тапчаң министерство холында. Ахчалығ хабазығ специалисттерні ӱгредеріне кӧрілче. Оларҷа ам даа тимнегліг тоғыстар парча, че предприятиелер, хайзылары тоғынҷыларны постарында тимнирге тимделер, амох табыл парғаннар: «Стальконструкция», «МаВР», «Абазадағы рудник» паза «СаянАл».
Алынҷа чоох экспорттаңар парған. Хакасияда пӱӱл экспорт хабазии кіні тоғынып пастир. Хазна регионға улуғ пӧгіннер турғысча: 2024 чылға республикада сығарылған ниме-нооның экспортха садии 7 миллион долларға чит парарға кирек. Чоохтирға кирек, Хакасияның министерстволары нацпроекттер пӧгіннері толдырыларына ікінҷілебинчелер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы