ХЫСХЫ ТООЗЫЛЗОХ, ПАЗАҒЫ ХЫСХАА ТИМНЕНЕРГЕ КИРЕК
12.02.2019
Хабарлар
Пресс-конференция. Хакасия прокуратуразының устаа прокуратура органнарының 2018 чылдағы тоғыс салтарларына чарыдылған пресс-конференция иртірген.
Журналисттерге пресс-конференцияны Хакасияның прокуроры Александр Кондратьев иртірген. Ідӧк мероприятиеде араласханнар республика прокурорының пастағы орынҷызы Борис Крылов, орынҷызы Андрей Мондохонов, коррупцияа тоғырланар законодательство хайди толдырылчатханын сыныхтағда тударынҷа улуғ полысчызы Наталья Шманёва, СМИ-ларнаң палғалыстарҷа улуғ полысчызы Оксана Зайцева паза прокуратураның пасха даа пӧліктерінің устағҷылары.
Хайди Александр Кондратьев таныхтаан, пу тоғазығда ол кӧп саннарнаң майыхтырбас, че хай пірее саннар чох чоох парбас. Аның чооғынаң, ирткен чылда прокуратура органнары, сыныхтағлар иртіріп, законнар 16,5 муң хати сайбалғанын ілезіне сығарғаннар. Ол сайбағларны тӱзедердеңер 4000 представление ызылған, 1100 кізі нандырыға тартылған. Прокуратура сыныхтағлары хоостыра 45 уголовнай кирек азылған.
Уголовнай сайбағлардаңар чоохтаза, ирткен чылда санға алылған андағ сайбағлар 5,1 процентке хызырылған. Ағбаннаң, Саяногорсктаң паза Абазадаң пасха республиканың прай город-аймахтарында сайбағлар саны хызырылған. Ағбанда
наркотиктернең палғалыстығ сайбағлар кӧп пол парған, Саяногорскта оғырластар ӧзіс кӧзіткеннер, Абазада кӱҷӱрлестер паза алименттер тӧлебинчеткеннең палғалыстығ сайбағлар саны ӧс партыр.
Профилактика тоғызы чахсы апарылған сылтаанда, чазы читкелектер иткен сайбағлар саны ікі хати хызырыл парған. Че олардаң тоғыр иділчеткен сайбағлар саны ӧсче. Таштып аймаанда пӱӱл кізі хорғыстығ ниме полған, хаҷан пір частығ паланы ағазынаң
ууҷазы чох ит салғаннар.
Коррупциянаң палғалыстығ 92 сайбағ санға алылған. Парыстарынаңар декларацияларында тайма саннар кӧзіткен ӱчӱн, 16 устағҷы паза депутат тоғызынаң суурылған.
Кізілернің істеніс праволарын арачылирынҷа тоғысха улуғ хайығ салылча. Тоғынчатхан кізі чал ахчазын тузында аларға кирек. Пу сурығны правительствода кӧрчеткен комиссия чыылиина организацияларның тӧстегҷілерін, ээлерін, устағҷыларын хығыртып, оларның чоохтарын анда истердеңер чӧптіг айланысты прокуратура Хакасия пазына ызыбысхан.
Чазы читкелектернің праволарын арачылир тоғыс хоостыра ӧкістерге чурт пирер сурығ сыныхтағда тудылча. Андағы теес хызырылбинча, ӱлгӱлер ахча чидіспинчеткеніне сылтанчалар. Че ӧкістерге чурт пирер тоғыста оғырластар полча, іди андағ сурығча пис уголовнай кирек азылған. Кӧп школаа тиксі тыхтағ киректелче.
Хазых хайраллир сферада льготалығ имнер чидіспинчеткен сурығҷа прокуратуразар 300 кізі айланған, аптекаларда соона чылдырылған 11 муң рецепт чатча. Имнер алар тоғыс чахсы апарылбинчатхан ӱчӱн, 12 тоғынҷы нандырыға тартылған. Пу сферада сыныхтағлар мыннаң мындар узарадылар.
- Пылтыр прокуратура органнарынзар 14,6 муң айланыс кірген. Чурт-коммунальнай хоных сферазын алза, анда прай оборудование город-аймахтарда иргілен парған, аны нааҷылирға, тузында тыхтирға кирек. Хара тас аныпчатхан предприятиелер устағҷыларынаң чоохтазығлар апарарға, олар социальнай нандырығлығ ползыннар. Республикада ЖКХ сферазында хысхаа тимненісті чайғы тоозылчатса алай кӱскӱде пастапчалар. Хысхы тоозылзох, пазағы хысхаа тимненіс тоғыстарын пастирға кирек, -теен прокурор.
Прокуратураның устаа аймах сурығларға нандырған. Іди Ағбандағы халас итчең заводтаңар сурығча, амды анда сыныхтағ тоғызы апарылча, нандырығ полған. Ідӧк экологияҷа, сӧп-сап реформазынҷа, льготалығ имнерҷе сурығлар полған. Экологияҷа Хакасияда 100 артиинаң объект сыныхталтыр, 58 организация пу сферадағы законодательствоны сайбапча. Киині иргі котельнайлар паза частнай туралар, ідӧк транспорт кірлепче. Газнаң тузаланза ла, кирек чахсы саринзар айланар. Сӧп-сап реформазы федеральнай законнаң иртірілче. Ол ам на пасталча, аннаңар сайбағлар, читпестер кӧп сығысча.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы