ПІРДЕЕЗІНЕҢ ПАЛҒАЛЫСТЫҒ ПОЛБАЗЫН
15.02.2019
Хабарлар
Ӧӧркі Чӧп. Хакасияның Ӧӧркі Чӧп кнезі Владимир Штыгашев президиум чыылиин иртірген.
Ӧӧн сурығлар бюджет кредидінең паза идінҷектер праволарын арачылирынҷа уполномоченнайнаң палғалыстығ полғаннар
Пастап Ӧӧркі Чӧп президиумы Хакасияның пазы Валентин Коновалов кирген закон проектін ӱзӱрген - «Федеральнай бюджеттең Хакас Республика бюджедіне бюджет кредидін пирерінҷе чӧптезіглерге хоза чӧптезіглерні чарадыға алардаңар». Закон проектінең Хакасияның финанстар министрінің орынҷызы Игорь Тугужеков таныстырған. Хайди ол чарытхан, мында чоох парча бюджет кредидін тӧлир оңдайлар нииктелчеткенінеңер. Мының алнында федеральнай бюджетсер айландырҷаң ахчаны кӧрілген кӱнге ыспааны ӱчӱн улуғ хатығластар кӧрілҷең полза, амды федеральнай законча ахча тӧлеҷең тусты 14 кӱнге узарадыбызарға чарадылча осхас. Че анзына хоза чӧптезіглер идерге кирек паза оларны субъекттің законынаң тыыт саларға.
Республика правительствозы Россияның финанстар министерствозынаң 2018 чылның 28 декабрьында андағ хоза чӧптезіглер ит салтыр. Амды, 3 ай ирткенҷе, закон алып, ол чӧптезіглерні тыыт саларға кирек тіп таныхтаан Тугужеков.
Ӧӧркі Чӧп кнезі Владимир Штыгашев бюджет кредидін тӧлир оңдайлар нииктелчеткенінеңер закон проектін чағынғы сессияның ӱзӱриине сығарарға чӧп пирген. Президиумдағылар чарас салғаннар.
Хайығ тартхан сурығларның санында «Хакасияның идінҷектер праволарын арачылирынҷа уполномоченнайының институдын чахсыландырары хоостыра алынҷа законодательнай акттарзар алызығлар кирердеңер» закон проекті полған. Хайдағ алызығлар кирілчеткенінең экономика политиказынҷа, промышленностьча, пӱдірігҷе паза транспортча комитет кнезі Василий Шулбаев таныстырған. Ӧӧн алызығ - Хакасияның идінҷектер праволарын арачылирынҷа уполномоченнайын турғысчаң оңдай алыстырылчатханы. Чоох ӧӧнінде уполномоченнайны турғызар полномочиелерні Ӧӧркі Чӧптің холына пирердеңер паза уполномо-ченнайның позының аппарады полардаңар парча. Амғы туста ол полномочиелер Хакасия пазының холында: регион устағҷызы Россияның идінҷектер праволарын арачылирынҷа уполномоченнайы кандидатураа чарадығ пиргенінең паза республикадағы идінҷектер пірігістерінің сағыс-кӧрізін санға алып, уполномоченнайны турғысча. Позы уполномоченнай, тізең, республиканың экономика министерствозы хойнында тоғынча. Чарыда чоохтаза, ӱлгӱнең палғалыстығ пол парча.
- Піс мында кізі праволарынҷа, пала праволарынҷа уполномоченнайларны чіли итчебіс, - таныхтаан Владимир Штыгашев. - Идінҷектер праволарын арачылирынҷа уполномоченнай ідӧк пірдеезінең палғалыстығ полбасха кирек.
Владимир Николаевичтің чооғынаң, закон проектін тимнирінде пасха регионнарның опыды санға алылған. Іди Россияның 20 регионында идінҷектер праволарын арачылирынча уполномоченнайны закон сығарҷаң органнар турғысчаттыр. Таныхтирға кирек, Хакасия пазының уполномоченнайға кандидатура сығарҷаң правозы халча.
Че закон проекті республика бюджедінең хоза ахча кирексир - 2 миллионҷа салковай. Идінҷектер праволарын арачылирынҷа уполномоченнайның позының аппарады полар тіп кӧрілче нооза. Аннаңар пу закон проектіне Хакасия правительствозының ӱндезии киректелче тіп хоза танығ иткен Ӧӧркі Чӧп кнезінің пастағы орынҷызы Юрий Шпигальских. Правительство, тізең, пу кирекке ахча табар алай чох чоохтирға сидік. Республика бюджеді ідӧк тее улуғ дефициттіг нооза.
Амғы туста Хакасияның идінҷектер праволарын арачылирынҷа уполномоченнайы Василий Кудашкин полча. Аның полномочиелері, тізең, майда тоозылча. Аннаңар Ӧӧркі Чӧпке пу сурығҷа маңзырирға килісче.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде