ТАЛАНТТЫҒ АРТИСТ, ЧАХСЫ ФЕРМЕР
15.02.2019
Хабарлар
Сағысха киріп. Ах чарыхтаң сын чирзер парыбысты Чоғархы Асхыс аалның фермері, пістің нанҷыбыс паза уғаа чахсы кізі Арнольд Казагашев.
1973 чылның орғах айының 2-ӌі кӱнінде Чоғархы Асхыс аалда чурттығ Аверьян Ананьевич паза Анна Михайловна Казагашевтернің оолағас тӧреен. Чиит ирепчі тун палаа Арнольд ат пирген. Че ағаа алты час полғанда, сӧбіре пазы ӱреп парған. Ипчізі Аннаа Арнольдты паза аның туңмазын ӧскірерге туғаннары полысханнар.
Арнольд кічігдӧк кӱр оолах полған. Ағаа хоза поғда паза кӱстіг ӧс парған. Аннаңар даа, Ағбандағы национальнай школаны тоозып, Ленинградтағы театральнай академиязар ӱгренерге кірібіскен. Анда ол профессор Владимир Васильевич Норенконың холында ӱгренген.
Ӱгренізін тоозып, Ағбанзар айланған. Пастап национальнай драма театрында, анаң «Читіген» театрда тоғынған. Іди «Чингис ханның хынызы» ойында Джучинің рольын ойнаан. «Икентийнің иреелестері» ойында ідӧк ӧӧн матырның омазын чайаан. Арнольд Казагашев пасха даа ойыннарда кӧп араласхан.
Че пістің оолға ниме-де читпинчеткенге тӧӧй полған. Ол кресен-фермер хониин тӧстирге чаратхан. Чоғархы Асхыс аалзар айланып, «Хайрахан» КФХ-ны асхан, інек мал ӧскіріп пастаан. Аал хонии оой тоғыс нимес, кӱннең кӱнге малнаң хада поларға кирек. Іди полбаза, хоных кӧдірілбес. Пірсінде мин Арнольдтаң хонииңнаңар газетаа пазыбызим тіп сурғам. «Чох-а, - тидір ол. - Кӧмес азахха турып алим, андада ла чоохтазарбыс».
Тӱрчедең Арнольдтың хонии азахха турып пастабысхан. Ол, інектер санын ӧскіріп, хоза чылғы мал, хойлар тут сыххан. Ипчізі Зинаида Петровна ағаа матап хабасхан. Мал саны ӧсчеткенде, пістің оол хоза чирлер алып алған. Іди «тӱлгӱ кірчең» орында от сапчаң чирлері полыбысханнар. Арнольд ол орында аалдағыларға ідӧк ле от саап алар оңдай пирчең.
Оймах чазының пулиинда малға азыхха сула салған. Ферма устағҷызы Арнольд ол хыраны кизерге Константин Чочиевтең сурынған. Чир-суғҷызы комбайннаң тоғысты толдыр пирген. Соонаң Арнольдтаң сула салчазың ма тіп сурғам. «Пір чыл ӧсчеткен эспарцет отты салғам, малға тосхымнығ от полтыр», - нандырған ол.
Арнольдтың кресен-фермер хониинда поларға киліскен. Илееде тоғысчы полған анда. Ізе, малны хадарарға, хазаалар арығлирға, малға азых чайарға кирек. Тоғыс читче. Пір сӧснең, нинҷе кізее тоғыс пирген ол!
Казагашев ирепчі тӧрт пала ӧскір салған. Тарина Москвада хирург-офтальмолог полып тоғынча. Аяс, Томсктағы политехническай университетті тоозып, пабазының хониинда тоғынча. Азар Кемеровтағы имнег академиязында 3-чi курста ӱгренче. Алмас Хакас гимназиязында 8-ҷі класста ӱгрен парча. Оолағас кӱреснең айғасча. Асхыста марығлар полза, Арнольд палазына «ағырарға» полған на сай килчең. Анда піс тоғасчаңмыс.
Сағынчам, хайдағ даа сидік полза, Арнольдтың туған-чағыннары аның сӧбірезін, палаларын тастабастар. Іҷезі Анна Михайловна, ипчізі Зина, хайдағ даа ачығ полза, тудыныңар. Арнольдтың палалары халған нооза.
Автор :
Михаил ИДИМЕШЕВ
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
