ӦӦНІ - ТОҒЫСТАРНЫ ТУЗЫНДА ТОЛДЫРАРЫ
20.02.2019
Хабарлар
Чыылығ. Хакасия пазы Валентин Коноваловтың устаанынаң республика правительствозында моногородтар тилізі ӱзӱрілген.
Хайди тиліпче республиканың пір профильліг орыннары? Хайдағ сидіксіністерге урунчалар? Хайдағ хабазығ киректепчелер? Пу паза пасха даа сурығларға нандырығ пирілген 18 февральда Хакасия правительствозында ирткен чыылығда, хайдар пір профильліг орыннар пастары паза устағ-пастағ кізілері хығыртылғаннар. Ікі час аразына чыылығ араласчылары пір профильліг орыннарда алындағы ікі чыл апарылған паза пу чылға кӧрілген тоғыстарны ӱзӱрібіскеннер.
- Пір профильліг орыннарның тилізі Хакасияда улуғ хайығда, промышленность сығарызынын 80% анда орныхча. Оларның чуртас-экономика ондайлары ӧӧн предприятиенің тилізінең пик палғалыс парғаннар. Ол палғалысты «позыдарына» хазна программазы тимнелген. Піске ол программаларда ӧткін аралазарға кирек, - пу сӧстернең Валентин Коновалов искіріглернең танызып пастирға сӧлеен.
Чоохтирға кирек, Хакасияда пір профильліг 6 орын саналча: Абаза, Саяногорск, Сорығ, Тойым, Тӧӧ пазы паза Харатас. Кічіг республикаа ол кӧп тиирге чарир. Че пу орыннарның экономиказы совет тузындох тӧстелген, андада пір орынның тиксі чуртас-экономика оңдайлары промышленность предприятиезінең пик палғалыста кӧрілген. Андада ол чахсы даа полған полар, амды, тізең, предприятиелер тилізі рынок оңдайларынаң палғалыстығ. Пу орыннарға экономика кризистері, сығарчатхан алай аныпчатхан ниме-нооға тилекей рыногындағы пааларның, кирексіністің тӱскені хорғыс ағылча. Аныңох сылтаанда Тойымда ӧңніг металлардаң ниме-ноолар сығарчатхан завод чабыл парған, Тӧӧ пазында - рудник. Аннаңар пу орыннарның чуртас-экономиказын ӧӧн предприятиелернің «пик хучаанаң» позыдарға кирек.
Ниме иділ парған пу чылларға? Пу орыннарны тиксі тилідерінҷе улуғ тоғыс 2017 чылда пасталған. Хакасияда «Моногородтарның тиксі тилізі» регион программазы тоғынып пастаан, Россияда «Моногородтар тилізінің чыындызы» тӧстелген. Оларның полызиинаң моногородтарда инфраструктура тилізіне, чол хониина, социальнай пӱдіріглерге улуғ хайығ айландырылған.
Хакасияның экономика министрінің тоғызын толдырчатхан Николай Евдокимовтың искіриинең, 2017-2018 чылларда республика программазынча моногородтар тилізіне 450 миллион салковай позыдылған. Ол ахчаа моногородтарда ӧӧн орамаларда чоллар наачылалған, ибіркі чирлер иптелген, имнег оборудованиезі алылған, Абазадағы 49№ школада столовай паза актовай зал пӱдірілген.
Че олох туста сидіксіністер сығысхан. Кӧзідімге, чоллар тоғыстарын толдырарына ыраххы город-посёлоктарзар подрядчикті таап аларға сидік, аннаңар пірееде ахча тузаланылбин халча. Сорығ город пазы Владимир Найденов пӱӱл пазох ахчаны айландырарына хорғыс пар теен. Хакасия пазы Валентин Коновалов орындағы устағҷыларны сидіксіністерні кӧстегліг министерство-ведомстволарнаң хада-пірге пӧгерге сурынған паза хазна программаларынҷа, уламох национальнай проекттерҷе, кӧрілген тоғыстарны тузында толдырарға киректеен.
Сидік сурығлар санында чурт-коммунальнай хоных инфраструктуразы, школаларда, олған садтарында иргі кӧзенектер, социальнай учреждениелер тиксі тыхтағ киректепчеткені, аптекалар сурии паза даа пасхазы. Кӧстегліг министерстволар пу сурығларҷа амох тоғынчалар. Пӱӱл моногородтар тилізіне республика программазында кӧрілген хабазығдаң пасха, ідӧк «Кічіг паза ортын пос кирее паза идінҷектің алынҷа пастаана хабазығ» нацпроектче 110 миллион салковай кӧріл парған.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы