ХАКАС ТІЛІ ӰГРЕТЧІЛЕРІ ХАДА-ПІРГЕ ТОҒЫНЧАЛАР
20.02.2019
Хабарлар
Таңда - Тӧреен тілнің чоннар аразындағы кӱні. Республикада хакас тілі паза литература ӱгретчілерінің ассоциациязы ікінҷі чылы тӱзімніг тоғынча.
Ирткен чылда Тӧреен тілі кӱнінде Хакасияның ӱгредіг тилізі паза квалификация кӧдірҷең институдында «Хакас Республиканың хакас тілі паза литература ӱгретчілерінің ассоциациязы» халых пірігістің презентациязы ирткен. Андар ӱгретчілер паза пасха даа аалҷылар чыылысханнар. Оларға мында хакас тілі паза литература ӱгретчілерінің хоостарын, аймах сыйыхтарын паза методика пособиелерінің кӧзідиин кӧріп аларға оңдай полған.
Хакасияда пос тілі паза литература ӱгретчілерінің ассоциациязы 15 февральда 2017 чылда тӧстелген. Іди пір чыл аразына ассоциация араласчылары ӧӧнінде Интернет пастыра палғалызып тоғынҷаңнар. Че ирткен чылда Улуғ Сии аалдағы ортымах школада полған тоғазығда ӱгретчілер ассоциацияның презентациязын иртірердеңер чӧпке килгеннер. Ол, тізең, Тӧреен тілнің чоннар аразындағы кӱніне киліс парған. Пу кӱнде ассоциация араласчыларынзар Хакасияның ӱгредіг паза наука министрінің орынҷызы Юрий Сагалаков, Хакасияның ӱгредіг тилізі паза квалификация кӧдірҷең институдының ректоры Светлана Дмитриева чылығ сӧстернең айланғаннар. Че ӧӧн хайығ салылған пос тілі паза литература ӱгретчілерінің «Тӧреен тілім - ызых тілім» презентациязына. Анда тиксі Россияның тӧреен тілі ӱгретчілерінің мастер-класстарының чиңісчілері паза лауреаттары араласханнар.
Ассоциациядаңар чоохтаза, ол аймах-пасха кӧстеглерҷе тоғынча. Иң пастап хайди амғы туста пос тіліне паза литературазына ӱгреділчеткені істезілче паза ӱгредіг-методика пособиелері тимнелче. Школаларға хакас тілінҷе паза литературазынҷа ӱгредіг-методика материалларын тарадарынҷа республика ӱлгӱзінең тоғыс апарылча. Ідӧк пірігіс хакас тілі ӱгретчілеріне аймах чыылығлар, кӧзідіглер, наука-практикалығ конференциялар, «тегілек столлар» паза даа пасха мероприятиелер иртірче. Ағаа хоза ӱгретчілер Хакасияның, Туваның, Алтайның ӱгретчілерінең паза пасха даа специалисттернең пик палғалыс тутчалар.
Пір сӧснең чоохтаза, ӱгретчілернің ассоциациязы хакас тілінің паза литературазының тилізіне чахсы оңдайлар тӧстепче. Аның ӧӧн пӧгіні - республиканың ӱгредіг организацияларында пос тіліне паза литературазына ӱгредер синні кӧдірері, ӱгретчілерге, тізең, тоғыс узын тыыдар оңдай пирче.
Автор :
Надежда МАМЫШЕВА, ХакИРОиПК-ньщ поликультурнай ӱгредіг кафедразының хакас тілінӌе паза литературазынӌа методизі
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде