«ТАМЫРЛАРЫН ТУДЫБЫЗИМ»
26.02.2019
Хабарлар
Кӱлімзірес. Хайдағ даа тустарда чон хормачыланыстар чох чуртабинча.
Чииттерні хондырып, сас тойын идіп тоостылар. Ам чараснаң парарға кирек. Тимненіп, чолға сығыбыстылар. Парчатханнарның аразында кӱр оңдайлығ ипчі полған. Чолға сығар алнында, чииттер хайдағ чылда тӧрееннерін сурып алтыр. Хыс сосха чылында, оол адай чылында тӧріптірлер.
Чарас идер чирге читкеннерінде, пудурғы ипчі тіпче осхас: «Сағыңар мині, амох «тамырларын тудыбызим». Ізік тохладып, иркін алтап, изеннезіп, суртыр:
- Сірернің сосха чітпеен?
- Чох, пістің сосхаларыбыс пиктегде.
- Кӧргемӧк чи, сірернің сосхаңар, сығара ойлап, піссер кире ойлабысхан. Адайыбыс аның хулахтарын чара тартхлабысхан.
- Пар, кӧрібіс, арса сых парыбысхан! - ипчі апсаана тіпче.
- Ол пісти нимес! - апсаа, кір киліп, ниик тыныбысхан.
- Чох, ол сірерни!
- Пір дее сосха чітпеен!
- Хайди чітпеен? Сосхаларыңны санап полбинчазар ба? Пір сосха сірернің читпинче.
- Ол сосханы нимее піске сыындырчазар?
- Чіткен сосхаңар пістің адайнаң хон салғаннар. Чараснаң килдібіс. Кірерге чарир ба?
- Пістің хызыбысты сосха тіпчезер! Піс сірерге сосхабыс па?
- Чох-чох, хызыңар сосха чылында тӧреен нооза!
Автор :
Елена ТАГИРА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде