КИБЕЛІС ХАЙДИ ТӦРІПЧЕ
27.02.2019
Хабарлар
Тоғазығ. Асхыста М.Е.Кильчичаковтың адынаң аймахтың ӧӧн библиотеказында хығырығҷылар чайаачыларның тоғыстарынаң танысханнар.
Библиотеканың хығырығҷылар залында чон тығырама даа полбаза, одырчыхтар пос турбааннар. Хығырығҷылар Ағбаннаң килген аалҷыларнаң тоғазарға килгеннер. Ағбаннаң Чайаачылар туразынаң, Н.Ф.Катановтың адынаң Хакас хазна университедінең аалҷылар полғаннар.
Тоғазығны пастаан паза апарған Хакасиядағы Чайаачылар туразының методизі Ирина Николаевна Юсупова. Ол 2019 чыл Хакасияда Писатель чылы тіп чарлалғаннаңар чоохтаан, аннаңар пістің кибелісчілернең, оларның тоғыстарынаң таныстырарға килтірлер.
Пастағы сӧс ХГУ-ның хакас филология кафедразының доценті, филология наукаларының кандидады Наталья Таскараковаа пирілген. Ол поэт Валерий Майнашевтің кибелістерінеңер паза аның чуртазынаңар хысхачахти чоохтап пирген. Ідӧк ол аның кибелістер чыындыларынаң хайди тоғынғаннаңар искірген. Ӱгренҷілер Валерий Майнашевтің кибелістерін ӱгренчелер, че улуғ улус кибелістерні ундут таа салған полар. Аннаңар даа прайзы Наталья Николаевнаны тынмин даа, теедег, исчеткен.
Анаң Ирина Юсупова чоохты Сибдей Томға (Сергей Александрович Майнагашев) пирген. Ол кибелістер хайди пӱтчеткеннеңер чоохтаан. Тоғазыға килген олғаннарға анзы хынығ полған полар. Олар полардаң, піс тее, улуғлар, чапсырхап искебіс. Кибелісчінің чоннаң хада сурығ-нандырығ оңдайынҷа иртчеткен чоохтазии хынығ парған. Испеен нимелерні исчезің. Ӱгренҷілерге ол пазох туза. Итсе, олғаннар пістең хай-хай чапчаңнар. Піс пілістерібісте «хасхланғанҷа», палалар сурыға нандырыбысхан полчалар. Ахсыбыс ла азынып одыр халчабыс.
Сағынчам, мындағ чоохтазығлар тузалығ. Араласчылар Чайаачылар туразы тоғынҷыларынзар мындағ тоғазығларны школаларда иртірер сурыныснаң айланғаннар. Интернет тузында оларның тузазы улуғ полар.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы