«АҒБАН» СУУ ЧИҢІСКЕ АҒЫЛЧА
01.03.2019
Хабарлар
Спорт. Суғҷа чӱзерінӌе Сибирьдегі федеральнай округтың чемпионадында паза первенствозында пӱӱл кӧп кізі араласча. Амды марығларның пастағы кӱннерінің хай пірее салтарларынаң таныстырчабыс.
Спорт. Суғҷа чӱзерінӌе Сибирьдегі федеральнай округтың чемпионадында паза первенствозында пӱӱл кӧп кізі араласча. Амды марығларның пастағы кӱннерінің хай пірее салтарларынаң таныстырчабыс.
Пазох кӧгліг хысхырыза тӱстілер. Анаң ӱр нимеске сым пол парчалар. Мына пазох кӧгліг табыстар. Сығыртостарның ӧтіг ӱннері ӱр нимеске дее тохтабинчатханға тӧӧй. Анзы мині пастағы туста матап чапсытчаң - ноға іди кизекти хысхырыза тӱсчелер? Пасха спорт кӧрімнерінңе марығ иртчетсе, кӧгліг суум-саам ӱр нимеске дее тохтабинчатханға тӧӧй.
- Кізінің пазы суғ алтында полза, нинҷе дее хысхырчат, ідӧк тее испес. Хаӌан ол пазын суғдаң сығар килзе, адын адап, тыыда хысхырарға кирек, - чарытчалар марығ араласчылары.
Оларның сӧстерінең, хайдағ даа спортсмен тренерінің сығыртозын ӱні хоостыра таныпча. Аны истіп, ол сизінче - азах меетке кӧп халбады, уламох табырах чӱзерге киректелче. Постарының аттарын адапчатсалар, чиңіске кӧӧктірчеткенін таныхтапча. Аннаңар кӧңнілері кӧдірілче, сыйыхтығ орын ӱчӱн пар-чох кӱс салылча. Тиктең нимес тиң частығлар, піреезін иңнінең сапхлап, піс полбаан ползабыс, пу марығда кӱмӱс медальны холға кирбесчіксің дее тіпчелер.
- Хакасия ӱчӱн пу марығда ӧӧнінде чииттер араласчалар. Аннаңар сыйыхтығ орынға сых полбинчалар. Чир-суғӌыларыбыстың піреезі позының иргі кӧзідім-чидіглерін илееде ас парыбысча, - чоохтапча Хакасияның суғңа чӱзерінҷе піріктірілген командазының ӧӧн тренері Сергей Бережной.
Сергей Вадимовичтің сӧстерінең, пу марығ тузында Фёдор Киргинеков суғҷа чӱзерінҷе спорт узының кандидат нормативін толдырыбысхан. Чир-суғңыбыс Хакасияның ӧӧн городында иртчеткен марығларда сыбыра араласча, маңат тимненіс кӧзідерге, сыйыхтығ орынға сығып аларға харасча. Амды Ағбандағы суғңа чӱзерінҷе олғаннар спорт школазында Фёдор Киргинековнаң хада спорт узына кандидат полчатхан читі кізі саналчатханнаңар искірче тренер.
СФО мариинда аралазарға Новосибирск облазынаң кӧп кізі килтір - 100 артиинаң. Арға-мӧрій оңдайлары хоостыра пір командада 50 - 100 кізі поларға чарадылча. Че Омск облазынаң килген спортсменнер уғаа маңат тимненіс кӧзітчелер. Анзы таңнастығ нимес. Сибирьде 50 метр узун бассейн иң пастап Омск городта пӱдірілген нооза. Аның илееде соонда Ағбанда андағ бассейн тимге сыххан. Пасха городтарда 25 метр узун бассейннер тоғынчалар. Ол даа сылтағнаң, неке, Омсктаң килген спортсменнер сыйыхтығ орыннарға сыхханнар санында удаа адалчалар.
Іди суғҷа чӱзерінҷе чоннар аразындағы класстығ спорт узы Мартин Малютин баттерфляй паза пос оңдайларнаң 100 метрге чӱзерінде ізестіг чиңістер тутхан.
Итсе, сағам хайдағ команда алнында парчатханын ікінҷілес чох таныхтирға сидік. Сыйыхтығ орыннарға сыхханнар санында хайдағ даа команданың спортсменнері адалчалар. Ағаа хоза арға-мӧрійнің пірее араласчылары суғңа чӱзерінҷе пасха-пасха кӧрімнерде сыйыхтығ орыннарға сығып алчалар. Пірдең, чииттер СФО первенствозында даа, чемпионадында даа аралазарға маңнанчалар, маңат тимненіс кӧзітчелер. Аннаңар командалар аразындағы кӧзідімнер саннар хоостыра табырах алызып одырчалар.
«Ағбан» спорткомплекстегі бассейнде пӱӱл пастағызын на 5000 метрге чӱзіп марығластылар. Итсе, анда Новосибирск облазынаң на килген спортсменнер араласханнар: ӱс ирен паза ӱс ипчі. Чиңіс тутхан Сергей Семёнов пу марығда узын сынирға ӧнетін тимненгенін чазырбинча. Аның кӧзідімі - 57 минута. Ол наа рекорд турғызыбысхан. СФО марии тузында иң артых чидіг 65 минута полған. Спорт узы Сергей Семёнов аймах марығларда мыннаң даа артых синге чӱзерге килісчеткенін искірче.
Суғҷа чӱзерінҷе Хакасияның піріктірілген командазының ӧӧн тренері Сергей Бережнойның сӧстерінең, пістің чииттерібіс, эстафетада аралазып, сыйыхтығ орынға сығып алар оңдайлығлар. Олох туста Сергей Вадимович позының ӱгренңілері санынаң піреезі сыйыхтығ орынға сығып аларына ізенізін чідірбинче.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы