РЕГИОННАРНЫ ПІРІКТІРЧЕТКЕН ЧӦРІМ
12.03.2019
Хабарлар
2019 чыл - Театр чылы. Россия президенті Владимир Путиннің чарадиинаң 2019 чыл Театр чылы тіп чарлалған. Аның иң улуғ проекті Театр марафоны полча. 5 мартта тиксі Россиядағы чӧрім Хакасияа читкен.
ХАКАСИЯ - РОССИЯ ТЕАТРЫНЫҢ КІНІ
Ағбан. Драма театры. Залда сымзырых. Прайзы Театр чылының таниин сығарарын сағыпча. Аны Ағбанзар А.В.Луначарскийнің адынаң Кемеровтағы драма театры ағылған. Сіліг кӧг толдырылған соонда сценазар орыс драма театрының артизі Ольга Изотова сыххан. Ол Хакасия тиксі Россиядағы театр марафонында араласчатханын искірген. Чайаачы устың сӧстерін кӧрігҷілер ізіг айа сабызынаң удурлааннар.
Марафон Театр чылының иң улуғ проекті полча. Аның ӧӧн пӧгіні - хазнадағы театрларны піріктірері. Улуғ чӧрімде 85 регион, 100 театр араласча. Акция оңдайларынҷа чыл тооза чайаачы ӧмелер, гастрольларға теести сығып, театрдаң театрға чыл таниин читірчелер. Марафон 18 январьда
Владивостокта пайрамни азылған, 5 мартта пістің республиказар читкен.
Марафонға чарыдылған мероприятиеде Хакасия пазының орынҷызы Татьяна Курбатова, культура министрі Леонид Ерёмин, Орыс драма театрынын директоры Юлия Трошкина, артисттер, кӧрігҷілер араласханнар. Пастап залдағы чонзар Россияның театрлар деятельлерінің Кемеров облазындағы пӧлиинің кнезі Алексей Разуков айланған. Саблығ ус, Театр чылының таниин кӧзідіп, чоохтаан:
- Киӌее ле пу танығ Кузбасс чирінде полған. Аны кӱнніг Хакасияа читіріп, піс ӧрінізібіснең паза хомзынызыбыснаң ӱлесчебіс. Театр марафоны - улуғ пайрам, ол Кемеров облазында ирткеніне ӧрінчебіс. Че полған на регионға ӱс ле кӱн пирілче, анзы уғаа асхынах, театр искусствозына хынчатхан улус марафонның татхынын «хаап халарға» маңнанминча. Республика чуртағӌыларын Театр марафонынаң алғыстапчабыс, ӱс кӱнге Хакасия Россия театрының кіні полчатханын чарлапчабыс.
Чоох тутхан соонда Алексей Разуков ырахтынох пызыңнапчатхан танығны Татьяна Курбатоваа читірген. Татьяна Анатольевна, кемеровтағыларны алғыстап, тиксі Россиядағы чӧрім кӧрігҷілернің кӧңнін кӧдірер, часка сыйлир тіп ізенізінең ӱлескен.
ТЕАТР ЧЫЛЫНЫҢ ТАНИИ
Хакасияның культура министрі Леонид Ерёминнің чарадиинаң пайрамнығ мероприятиее килген хабарҷыларға Театр чылының таниин алынҷа кӧзіткеннер. Ырахтын ол веерге тӧӧй кӧрін парған, сынында античнай амфитеатрны таныхтапчаттыр.
РЕГИОННАРНЫ ПІРІКТІРЧЕТКЕН ЧӦРІМ
Пурунғы гректер театрының хоозы танығның пір саринда кӧзіділ парған. Че аның ікінҷі сари уламох чапсых чазалған. Анда Россия регионнарының гербтері киртіл партырлар.
Хабарҷылар сурынызынаң Леонид Валентинович Хакасияның ӧӧн таңмазын, таап, кӧзіткен. Республика гербі Театр чылы танииның алтынзар орныхчаттыр. Хайди чоохтаан Леонид Ерёмин, анзы Хакасияның искусствозы хазнабыс культуразының тӧстее полчатханын таныхтапча. Пасха регионнарның чайаачы устары ол сағыснаң чараспастар, неке, че полған на кізее пос чирі аарлығ полчатпас па.
Алексей Разуковтың даа, Леонид Ерёминнің дее чооғынаң, Театр чылының таниин тударға чӱрексіністіг. Аны регионнаң регионға, холдаң холға театр искусствозынаң айғасчатхан улус читірче. Аннаңар танығдаң кізілернің чылии, арығ сағыстары, ӧріністері тарапчатхан чіли пілдірче.
АМҒЫ ЧУРТАСХА ЧАҒЫН ОЙЫН
Театр чылы таниинаң пасха Кемеровтағы артисттер Хакасиязар ӱс ойын ағылғаннар. 5 мартта олар драматург Александр Островскийнін «Доходное место» пьесазы хоостыра чайалған драманы кӧзіткеннер. 6 мартта кічіг частығ кӧрігҷілерні «Машаҷах паза аба» нымахнаң таныстырғаннар. Халғанҷы кӱнде кізілернін кӧңнін «Шикарная свадьба» кӱлкістіг ойын кӧдірген. Прай спектакльларны театрның ӧӧн режиссеры Антон Безъязыков турғысхан.
Ағбанда кӧзіділген ойыннардан «Доходное место» спектакльны таныхтирға кирек. Режиссер, А.Островскийнің матырларын пӱӱнгі кӱнзер «кӧзірібізіп», амғы чуртастың ағырсымнығ сурығларын кӧдірче. Тирең пілістіг, иптіг оңдайлығ Жадов кізілерге туза ағыларға пӧгінче. Матырның кӧрізінең, чиновниктерге туюххан ахча албасха, прай кӧңнін салып тоғынарға кирек. Че аның сағызынаң хынчатхан ипчізі Полина даа чараспинча. Жадовнаң хада тоғынчатхан Онисим Белогубов пасха оңдайлығ. Ол Юсов паза Вишневский пастыхтарының алнында чойырхапча, оларның полызиинаң ахчалығ тоғысха кіріп алча.
Антон Безъязыков орыс драматургтың пьесазын толдыразынаң даа артыс салған. Аннаңар, спектакльны кӧріп, уламох чапсыпчазың: ХІХ вектен сығара пістің хазнабыста пір дее ниме алыспаан полар чи.
Тоғысха туған паза таныс хоостыра ла кіріп аларға чарир. Пастыхтың алнында чойырхабазаң, тоғыста ӧспессің. Жанр хоостыра А.Островскийнің пьесазы кӱлкістіг ойын полча, А.Безъязыков аны хоостыра трагедия чайап салған. Спектакль турғызып, режиссер сурығ турғысча: хыйға, кӱстенҷік улусха тоғыс табылбаза, ӱлгӱде Белогубов осхастар ла полза, чуртас чахсы саринзар алызар ба? Хазнабыстың таңдағызы хайдағ полар? Ол сурығларға нандырығны посха тілирге кирек.
Кемеровтағылар ойыннар кӧзідібіскен соонда чорыхха М.Ю.Лермонтовтың адынаң Орыс драма театры сыххан. Артисттер Театр чылынын таниин Тағлығ Алтайға читіргеннер. Олар харындас чонны «Месяц в деревне» наа ойыннаң, «Сапогтығ хоосха» нымахнаң паза «Детектор лжи» кӱлкістіг спектакльнаң таныстырғаннар. Театр марафоны мыннаң узарадылған, пу кӱннерде ол Тува чиріне читкен.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы