АҢНИРДАҢАР ЗАКОНЗАР АЛЫЗЫҒЛАР КИРІЛЧЕ
19.03.2019
Хабарлар
Чыылығ. Республиканың Оӧркі Чӧбінде «Хакасияда аңнирдаңар паза аң-хусты хайраллирдаңар» законға алызығлар киреріне чарыдылған чыылығ «тегілек стол» оңдайнаң ирткен.
Таныхтирға кирек, «Хакасияда аңнирдаңар паза аң-хусты хайраллирдаңар» законҷа халғанҷы туста кӧп талазығ парча. Оӧнінде олар аңҷыларның паза аңҷыларға лицензия пирчеткен органнарның аразында полча. Аннаңар «тегілек столда» аралазарға республикадағы аңҷылар хоныхтарынаң айғасчатхан идінҷектерні хығырғаннар. Хакасияда тиксі 32 аңнир орын саналча. Закон алызығларын ӱзӱрерінде 8 аңҷылар хониинаң айғасчатхан идінҷек араласхан.
Пастап чыылған чонның алнында Оӧркі Чӧптің экологияҷа паза чир-чайаан ис-пайы комитеттің кнезі Валерий Старостин чоох тутхан. Ол, коррупцияны чох идер ӱчӱн, законзар алызығлар кирерге кирек тіп таныхтаан. (Ирткен чылда аңнирға лицензиялар ахчалығ идінҷектерге паза ӱлгӱдегілерге ле пирілче тіп суулас кӧп полған. -Авт.) Хайдағ тӱзедіглер кирілерін Хакасияның аң-хусты паза ибіркізін хайраллирынҷа хазна комитедінің кнезі Владимир Лебедев чарытхан. Законзар кирілчеткен алызығлар хоостыра аңнирға лицензиялар наа оңдайнаң ӱлестірілер. Чарыда чоохтаза, лицензияларның 30 % хысхызын пӱӱрлерні чох итчеткен аңҷыларға пирілер, 40 %-ті - чайғызын аңнарға от тимнеп, хысхызын оларны азыраан аңҷыларға. Халғанҷы 30 %-ті пасха аңҷылар аразында ӱлӱс тартып ӱлестірілер.
Чоохтирға кирек, наа алызығлар пірее аңҷыларның кӧңніне кірбеен. Оларның санында Харатас городтың чуртағҷызы Андрей Терских. Устағ-пастағдағылар чоох тутхан соонаң тынағдағы ирен позына сӧс пирерге сурынған. Ол, пір дее туртухпин, пос кӧрізін чыылған чонға читірген. Андрей Николаевич тӱзедіглердең саңай тоғыр. Ол иргі оңдайнаң лицензияларның 70 %-ті олаңай аңҷыларға паза 30 %-ті пӱӱрлерні чох итчеткен аңҷылар аразында ӱлестіріл турғанда чахсы полған тіп таныхтаан. Аның чооғынаң, амды аңнирға чарадығ алып аларға сидік полар. Андрей Николаевичтің кӧрізінең, наа закон уламох коррупцияа тилир оңдай пирче. Чыылыға килген аңҷыларның піреезі тынағдағы аңҷынаң чарасхан.
Сынны чоохтаза, законға кирілчеткен тӱзедіглер аңҷылар аразында кӧп сурығ тӧрітче. Кем сыныхтир аңҷы чайғызын сынында аңнарға от тим-неен алай чох? Оларның тоғызы хайди паалалар? Пу сурығларны ӱзӱрчеткенде, аңҷылар хониинаң айғасчатхан идінҷектер амғы туста сомнарға киртінерге чарабас тіп таныхтааннар. Амды кізілер фотошоп идерге чахсы пілчелер. Андағ чоох пар сыхханда, чыылығда араласхан хазна. комитедінің тоғынҷылары паза Ӧӧркі Чӧптің депутаттары, закон алыл парза, ӧнетін комиссия тӧстелер тіп молҷааннар. Ол алызығларны чуртасха кирерінҷе тоғыс апарар. Анда аралазып, аңҷылар законнарны тимнепчеткеннерге пос кӧрізін читір поларлар. Ӱлгӱдегілер Андрей Николаевичті комиссияда аралазарға хығырғаннар. Ол, тізең, закон алыл парза, кӧрінер тіп сӧлеен.
Чоохтирға кирек, «Аңнирдаңар» законға кирілчеткен алызығлар кӧп аңҷының хайиин тартхан. Тӱзедіглер халғанҷы сессияда пастағы хығырығда алыл парғаннар. Амды ол Оӧркі Чӧпте аннаң андар ӱзӱрілер. Че пу алызығлар аңҷылар аразында ікінҷілес тӧрітче. Аңнирға чарадығның 30 %-ті ӱлӱс тартып ӱлестірілзе, 19 муң аңҷының 170-ны ла лицензия алып алар тіп кӧбізі хомзынча. Паза олаңай аңҷыларға лицензия асхынах нимес пирілер тіп ӱлгӱдегілернің молҷааны оларны чӧпсіндірбеен. Хайзыда, тізең, алызығларнаң чарасча. Андағ аңчыларнын кӧрізінең, чылдаң чылға лицензиялар саны аңҷыларниның асхынах полча. Анзы пілдістіг. Полғаны на ла лицензия пирзе, тайғада аң-хус халбас нооза. Чыылығда даа араласхан аңҷыларның кӧбізі наа алызығлар аңҷыларға даа, аң-хусха даа туза полар тіп ізенген. Че сынында кирек хайди поларын тус кӧзідер.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы