ПУШКАЛАР САЛЮТТАРДА ЛА АТСЫННАР
20.03.2019
Хабарлар
Россиянин арачыланыс министрі Сергей Шойгуның пастаанаң тиксі Россияда «Сирийский перелом» чаа-патриот акциязы иртірілче. Аны хоостыра Сириядағы чаада чоннар аразындағы террористтернің холға кирілген тиріглері таарлалған поезд Москвадаң Владивостокка теере парча. Ыраххы Востоктаң ол Москва облазындағы «Патриот» парксар айланар. Позының чорығында «Сирийский перелом» пазылған поезд полған на городта тохтап турар. Акция хоостыра городтарда чуртағӌыларнаң тоғазығлар, митингтер иртірілче, чон Сириядағы чаада боевиктер тузаланған трофей тиріглерін кӧріп алча, поезднең хада парчатхан чааӌылар ансамбльлары концерттер кӧзітчелер.
18 мартта Ағбандағы тимір чол вокзалынзар чон уғаа кӧп чыылыс парған. Перронзар кізілерні наа вокзал туразынҷа тимір парын сыныхтаҷаң ікі рама ӧтіре позытчалар, чон узун теесте тығылыс турған. Перронда ідӧк кізі толдыра, прайзы поезд килерін сағыпча. Иргі вокзал туразы алнында улуғ нимес сцена турғызылых, анда экранда Сириядағы чаалазығларның кизектері кӧзіділче. Стройда юнармеецтер турчалар, ідӧк чааҷыларның ӱбӱрҷең оркестрі кӧглер толдырча. Пу акция Илбек Ада чаадағы Чиңістің 74-ҷі чылына чарыдылча.
Мына трофей тиріглерін апар чатхан поезд перронның пастағы чолынҷа чиде тӱсті. Аалҷыларны хакас кибірінҷе хыстар айраннаң удурлапчалар. Эшелонның пастығы полковник Павел Олексюк поезд Ағбан станциязар читкеннеңер Россияның Тирігліг кӱстерінің Ӧӧн политическай управление пастығының пастағы орынҷызы генерал-майор Алексей Цыганковха рапортнаң искірген. Аның соонда митинг азылған, пастағы сӧс Алексей Цыганковха пирілген.
- Россияның арачыланыс министерствозы пастаанаң «Сирийский перелом» акция хоостыра тимнелген поезд 23 февральда Москвадағы Казанскай вокзалдаң сыххан. Позының чорығында ол 29 муң километр иртер. Севастопольдаң Мурманскка теере, Москвадаң Владивостокка теере 61 городта полар. Ағбанзар читкенӌе, ол 22 городта пол парыбысхан, поездті 240 муң кізі удурлаан. Полған на городта чонның чаа-патриот кӧрізі таныхталған. Улам пӱӱн пістің хазнада Крым Россиязар айланғаннаң пис чыл таныхталча. Хакасияның столицазын да ікі чааӌылар частьы орныхча. Тимір-чолӌыларның Познанскай бригадазы, Илбек Ада чаада саблығ чол иртіп, Хызыл Знамя орденнең сыйыхтатхан. Зенитно-ракетнай бригада Хакасияны паза Хызылчар крайының ӱстӱнзархы чардығын киидең ізестіг хадарча. Пу ікі бригада иң чахсы частьтар санында.
Ам поезд мында ікі час турар, анда кӧзідіглер азылар. Платформаларда террористтернің кӧп техниказы турча: пір иргі танк, аны Грузия боевиктерге садыбыстыр, зенитно-ракетнай установ калар, пилот чохучухчатхан аппараттар паза пасхазы даа. Центральнай паза Іскеркі чаа округтарының ансамбльлары кӧрігҷілерге концерт кӧзідерлер. Контрактча чааӌы службазына пазынарға сағынчатханнарны ӧнетін пунктсар хығырчабыс, - чоохтаан генерал.
Улуғ нимес чооғын тоозып, Алексей Цыганков юнармеецтер Артём Андреевке, Вера Филатоваа паза юнармеецтернің штаб устағӌылары Ирина Бугаеваа паза Юрий Фёдоровха арачыланыс министерствозының алғыстас пічіктерін читірген. Ідӧк ол Хакасия пазының орынӌызы Юрий Курлаевке «Россияның армиязы» книганы сыйлап пирген. Ол арачыланыс министрінің Хакасияа сыйии полған.
Генералның соонӌа Юрий Курлаев чоох тутхан:
- Хакасия пазының адынаң, иртiрілчеткен акция ӱчӱн, Россияның арачыланыс министрі, пістің чир-суғҷыбыс Сергей Кужугетович Шойгуға улуғ алғыс читірчем. Пу чаа-патриот акциязы Илбек Ада чаа дағы Чиңістің 74-ңі чылына чарыдылча. Пістің хазна чоннар аразындағы терроризмнең тоғыр Сирияда кӱрезіг апарча. Андағы чаада олаңай, амыр чуртағҷылар, улуғ частығлар, палалар хыйалланчалар, ӱрепчелер. Поезд боевиктер туза ланған трофей тиріглерін ағылды, чон кӧрзін - хайдағ хорғыстығ тиріглернең олар чоннаң тоғыр чааласчалар. Ідӧк пу мероприятиені тимнеен оргкомитет кізілеріне алғызым читірчем. 60 азыра городча поезд иртер, полған на городта чуртағҷылараны чапсып удурлирлар. Мындағ хорғыстығ тиріглерні кӧріп, кізілернің сағызында амыр чуртасха паза ӧңненіске пик ізеніс халча. Мыннаң мындархы чуртаста пушкалар салюттарда ла атсыннар.
Чооғын тоозып, Юрий Курлаев эшелонның пастығы Павел Олексюкка паза аның орынӌызы Владимир Зазуляа Хакасия пазының алғыстас пічіктерін читірген. Ідӧк ол Хакасияның сыйиин «Патриот» паркка читірерге Олексюкка пирібіскен.
Митингте ідӧк чоох тутханнар республиканың Ветераннар чӧбі кнезінің пастағы орынӌызы Юрий Седых, Хакасияның юнармеецтер отрядының командирі Павел Кирпиченко паза эшелонның пастығы Павел Олексюк. Хакасияның ӧӧн городына Олексюк улуғ алғызын читірген, поезд пірее кічіг станцияларда тохтап парза, техническай службалар ағаа чахсы полыс туртырлар. Хайди ол таныхтаан, Илбек Ада чаадағы Чиңіске Хакасия турыстыра хозым иткен, аның чирінде 100 азыра госпиталь тоғынған, кӧзірілген 70 азыра предприятие мыннаң фронтха тиріглер, ух-тар пасха даа ни ме-ноолар ысхан. 70 муң азыра кізі Хакасиядаң чааға парыбысхан, кӧп кізі айланмаан. Ам Сирияда чоннар аразындағы терроризмнең тоғыр чаа парча, пістің чааӌыларыбыс анда постарының матыр хылиин кӧзітчелер. Майор Роман Филипповтың махачы тудынызы прайзына кӧзідім полар. Боевиктер, аны ибіріп, чағдап килгеннерінде, ол «Это вам за па цанов!» тіп, позын паза ыырӌыларны гранатанаң чара чачырадыбысхан.
Митинг тоозылғанда, оркестр хазна гимнін толдырған. Мындағ пайрамнығ мероприятие тузында юнармеецтер санына наа оол-хыстарны алғаннар. Наа юнармеецтерні алғыстап, оларға «Юнармия» значоктарын читірерінде араласханнар генерал Цыганков, Курлаев паза пасха даа устағӌылар. Наа алылған юнармеецтер турыстыра тудынардаңар хорнаң сӧс пиргеннер.
Чыылысхан чон платформаларда турчатхан террористтернің тиріглерін чапсып кӧрген. Чааӌыларның ансамбльлары кӧрігӌілерге устарын кӧзіткеннер. Прай мероприя тиелер тоозылғанда, «Сирийский перелом» пазылған поезд чорығын іскер узаратхан.
Мындағ чаа-патриот акциязы чииттерні Чир-сууна хынарға, аннаң поғдархирға чахсы ӱгретче. Амды Илбек Ада чаадағы Чиңістің 74-ӌі чылы чағдапчатханда, пу чир ӱстӱнде паза хайдағ даа чаалар, чаалазығлар полдыртпас сағыс полған на кізіде тӧріпче полар. Юрий Курлаевтің сӧстері уғаа сын полар: «Пушкалар салюттарда ла атсыннар!»
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы