ЧАСКА ХУЗЫ СООНҶА
02.04.2019
Хабарлар
Хакасия пазының пастағы орынҷызы Андрей Асочаков хакас драма театрының директоры Владимир ЧУСТЕЕВКЕ сертификат читірче
Культура. Ағбанда 27 мартта Чоннар аразындағы театр кӱні алғым таныхталған
ПАЙРАМНЫҒ КӰНДЕ - ААРЛЫҒ СЫЙЫХТАР
Театр искусствозына чарыдылған ӱлӱкӱн 1961 чылда тӧстелген. Аны тиксі тилекейде артисттер, режиссерлар, драматургтар, театр хоосчылары, гримёрлар, билетёрлар паза театрнаң палғалыстығ пасха специалисттер таныхтапчалар. Театр кӱнін пайрамниры пістің республикада хаҷанох кибірге кір парған, кӧрігҷілер аны сағыпчалар, азынада билеттер садысчалар. Анзын 27 мартта драма театрының улуғ залына тығырама чыылған чон киречілеен.
Чалахай иир алғыстастарнаң азылған. Пастап сӧс Хакасия пазының пастағы орынҷызы Андрей Асочаковха пирілген. Андрей Серафимович, театрларның прай тоғынҷыларын профессиональнай ӱлӱкӱннең алғыстап, республикада чайаачы кӧңніліг, театрға прай чӱреенең хынчатхан улус чуртапча тіп искірген. Ол поғдархаснаң таныхтаан:
- Хакасия - улуғ нимес республика, пасха регионнарнаң тиңнестірзе, чуртағҷылар саны даа кӧп нимес. Іди дее полза, пістің республикада тӧрт профессиональнай театр. Оларның чайаачызынаң Россия регионнарының даа, хырығ озариндағы хазналарның даа кӧрігҷілері чахсы таныстар. Ағаа хоза, Хакасияда пос кӧңнінең спектакльларны ойнапчатхан 213 ӧме саналча, оларның 12-зі «Чон театры» пӧзік атха турысхан. Прайзына хазых, часкалығ поларға алғапчам. Хынчатхан кӧрігҷілерні чайаачыларыңнаң ӧріндіріңер, хаҷан даа залға толдыра кізі чыылыс турзын.
Чооғында Андрей Асочаков «Читіген» театрға алынҷа хайығ айландырған. Пӱӱл Хакасия пазы Валентин Коноваловтың чарадиинаң иң чиит театр ӧмезіне республика музейінің иргі туразының чардығын пирібізерлер. Андағ оңдайнаң Ағбанда Пушкиннің орамазы, 96 тура адресче «Читігеннің» позының сценазы полар. Пу хабарны залдағы чон ізіг айа сабызынаң удурлаан.
Хакасия театрларына чылығ сӧстерні Хазна Думазының депутады Надежда Максимова читірген. Чайаачы устарны ӱлӱкӱннең алғыстап, Надежда Сергеевна оларға наа чидіглерге чидерге, хынығ ойыннарнаң чапсыдарға алғаан. Хакасияның культура министрі Леонид Ерёмин алғыстас чооғында театр искусствозы кізінің чуртазын чазапча, сағысха тӱзірче, таңдағызына ізеніс пирче, аннаңар ол хаҷан даа кирексіністе полар тіп таныхтаан.
Алғыстас сӧстері соонда чайаачыларға сыйыхтар читірілген. Прай театрларға профессиональнай ӱлӱкӱнде 250 муң салковайға сертификат сыйлалған. Ол ахчаа чайаачы ӧмелер наа оборудование турғыс саларға пӧгінчелер.
Орыс драма театрының устары Ольга Изотованаң Фарит Загидулин «Хакасияның саблығ артизі» пӧзік атха турысханнар. Артисттернің ӱчӱн ӧрініп, пайрамға килген улус матап айа сапхан.
Ольга Изотова Орыс драма театрында 2003 чылдаң істенче. Таланттығ ипчі аймах омалар чайирға кӱс. 2006 чылда ол «Таланты и поклонники» актер тоғыстарының мариинда «Иң артых ипчі рольы» номинацияда утып алған, 2012 чылда, тізең, «Судьба инородца» фильмде ученай Николай Катановтың ипчізі Александраның рольын толдырған.
Фарит Загидулиннің тӧреен-ӧскен чирі Асхыс аймаандағы Кызлас аал полча. Чир-суғҷыбыс Хызылчардағы искусство институдын тоосхан соонда Хакас драма театрында істенген. 2004 чылда ол М.Ю.Лермонтовтың адынаң Орыс драма театрынзар тоғысха кірген. Пос туста актер орыс таа, хакас таа тіллерінең пьесалар пасча. Оларны хоостыра турғызылған ойыннар «Читігеннің» паза Орыс драма театрының репертуарына кірчелер.
Аарластығ пічіктернең «Нымах» кӧклӧ театрының артисттері Рима Зайнуллинанаң Юлия Рысюкова таныхталғаннар. Хакасия пазының алғыстас пічиине Орыс драма театрының артисттері Виктор Арканов, Денис Энгель, Елена Израэльсон, олох театрның кип-азах тікчең узы Лина Маганакова турысханнар. Хакасияның культура министерствозының Аарластығ пічии актерлар Валентин Ульчугачевке, Наталья Сарлинаа, Павел Шнягинге, Георгий Сагалаковха, Валерий Боргояковха, Светлана Саможиковаа, хоосчылар Влада Чаптыкованаң Сергей Майнагашевке, режиссер Баатр Колаевке паза даа пасхазына читірілген.
ТЕАТР КАПУСТНИГІ
Театр тоғынҷыларының иң артыхтарын таныхтабысханда, капустник пасталған. Пӱӱл ӧӧн ойынны Хакас драма театры тимнеен. Аны артисттер «Вслед за синей птицей» адап салтырлар. Сценазар М.Метерлинктің «Синяя птица» пьесазының ӧӧн матырлары Тильтильнең Митиль сыхханнар. Харындас-пиҷе фея Берилюнаның чахиин толдырып, часка хузын паза веерге тӧӧй танығны тілепчелер. Палалар турғысхан пӧгінні толдырыбыссалар, прайзы часкалығ чуртир.
Чолда Тильтильнең Митильге «Читігеннің» самурайларына, Орыс драма театрының тонағҷыларына, «Нымахтың» наа спектакльны турғысчатхан чайаачы ӧмезіне, Шира кӧлге пір дее чит полбинчатхан Хакас драма театрының артисттеріне тоғасчалар. Полған на тоғазығ - алынҷа ойын.
Кибір хоостыра капустникке ойыннарны театрларның чиит артисттері тимнееннер. Таланттығ чир-суғҷыларыбыс, кӧрігҷілерні ӧріндірерге пӧгініп, прай кӧңнілерін салғаннар. «Читіген» театр артист уғаа нандырығлығ тоғыс полчатханын кӧзіткен. Тиктең нимес «камикадзе» сӧс «комик» сӧстең тӧстелтір. Ідӧк кӧрігҷілер піліп алғаннар: «Читігенде» рольны хомай толдырыбыссаң, харикири идерге килізер. Ол сылтағнаң хакас театрында артисттер саны асхынах полтыр. «Читігендегілерні» кӧріп, залдағы чон ээріп хатхырчатхан.
Орыс драма театрында «Джентльмены удачи» хоос фильмнің матырлары істенчеттір. Олар Театр чылының таниин Горно-Алтайсксар ызыбысханнар. «Нымахтағылар» спектакльлар хайди тӧстелчеткенін кӧзіткеннер. Кізілер сағынчалар: полған на режиссер хынығ пьесаны, пӧзік устығ актерларны таап аларға кӱстенче. Сынында ойынны чайирында ӧӧні бюджет полтыр. Ахча чидіспинчетсе, «Алтын маска» сыйыхха турысчаң спектакльны турғызарға сидік.
Прайзының кӧңнін Хакас драма театрындағы артисттер кӧдіргеннер. Максим Султреков паза Виктор Сагалаков, «Абаҷахнаң ежиктің чоохтазии» саблығ мультфильмнің матырларына хубулып, чоох апарчалар. Аның тузында Виктор Сагалаков Шира кӧлде хаҷан даа полбааны «ілезіне сығыс килген». Анзы сын ма, чох па, пілбес, че ол хабар кізілерні чапсытхан.
Чалахай иирнің халғанҷызында Тильтильнең Митиль часка хузын таап алғаннар. Ол иир тооза, артисттерге кӱс пиріп, кӧрігҷілерге ӧрініс сыйлап, драма театрының улуғ залынҷа учух чӧртір.
АЛНЫНДА - ФЕСТИВАЛЬЛАР ПАЗА ПАЙРАМНАР
Театр кӱніне чарыдылған пайрамнығ иир уғаа чахсы ирткен. Че капустникке кил полбаан улусха хомзынарға кирек чоғыл. Пӱӱл кӧрігҷілерні Театр чылына чарыдылған улуғ паза хынығ программа сағыпча.
23 - 27 апрельде Ағбанда «Ах иб» республика фестивальы иртер. 3 - 10 июльда республика «Чир чайаан» Х чоннар аразындағы фестивальны удурлир. Олох туста Л.Р.Кызласовтың адынаң чир-суғ ӱгренҷең музейде Хакасиядағы театр искусствозының тархынына чарыдылған кӧзідіг тоғынып пастир паза А.А.Бахрушиннің адынаң театр музейінің пӧлии азылар. Кӱскӱзін «Нымах» театр 40 чылын таныхтирға тимненче, Орыс драма театры, тізең, 80 чылын. Саблығ ӧменің пайрамы 6 ноябрьда иртер. Ідӧк пӱӱл театрлар хайди даа кӧрігҷілерні наа ойыннарынаң ӧріндірерлер паза пасха регионнарзар гастрольларға сығарлар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы