ӦРТТЕР ЧОНҒА ХОРҒЫС АҒЫЛБАЗЫН
02.04.2019
Хабарлар
Чыылығ. Хакасия пазының орынӌызы Юрий Курлаев сағыбаан саайларӌа комиссия чыылиин иртірген. Аархы неделяның халғанҷы кӱннерінде республикада нинҷе-де улуғ ӧрт сыххан, че наңмырлар паза хар чағаны улуғ хыйалға ағылбаан. Юрий Курлаев тің таниинаң, 2015 чылдағы осхас киректер полбас ӱчӱн, муниципалитеттерге чахсы тоғынарға кирек.
Тиксі алза, пӱӱл республикада 647 ӧрт сыххан, анда 19 кізі ӱреен паза тоғыс кізі палығлатхан. Улуғ сидіксініс чылығ паза чилліг кӱннер турыбысханы, наңмырлар асхынах чаапчатханы ағылча. Март айда республикада суткада ортымахти 14 ӧрт сыххан. Ӧӧнінде сӧп-сап, хуруғ от кӧйчеткені таныхталған. Аны хоостыра муниципальнай пӱдістер пастарына чуртағҷыларға ӧрттердең тоғыр правилоларға тудынардаңар чарыдарға, саайдаңар чонға тузында искірерге, суғ алчатхан орыннарны иптебізерге, чуртағҷылар сӧп-сапты ӧртебес ӱчӱн кирек оңдайлар тӧстирге чахығ пирілген.
Амғы туста республикада 354 патруль ӧмезі тоғынча, анда 1398 кізі паза 394 техника саналча. 29 мартха теере чазылардағы от 141 хати ӧртке хабылған. Патруль ӧмелері кӱзінең алты ӧрт ӱзірілген, республиканың ӧрттердең тоғыр службазынаң пірге - 40 ӧрт. Чазыдағы ӧрттер аалларзар читпес ӱчӱн, патруль ӧмелері ӧрт сыххан орынзар табырах чидерге киректер. Аннаңар оларның тоғызын чахсыландырарға чахығ пирілген.
Арығлардағы ӧрттерні ілезіне сығарар ӱчӱн авиация тартылар. Аннаң пасха, арығларда ӧрт полдыртпас ӱчӱн паза оларны тузында ӱзірер тоғысты апарар пӧгіннең, чир-чайаан ис-пайы паза экология министерствозында регионның диспетчер службазы тӧстелген.
Хакасияда 25 марттаң 12 майға теере ӧрттердең тоғыр ӧнетін режим кирілген. Ол туста чуртағҷыларға от тамызарға, азых отнаң тузаланарға, сӧп-сапты ӧртирге чарадылбинча.
Чыылығны тоозып, Юрий Курлаев профилактика оңдайынаң чонға телевидение пастыра 2015 чылдағы ӧрттердеңер сюжеттерні кӧзіт пирерге, чуртағҷыларнаң ӧнетін чыылығлар иртірерге, ӧрттердең паза суғлар тазарынаң тоғыр профилактика тоғызын чахсы апарарға чахаан. Хайди таныхталған чыылығда, чылығ кӱннер турыбысханда, суғлардағы пуссар сығарға чарабинча.
Ӧрт сыхса, 101 паза 112 телефоннарҷа сығдырадыңар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы