ХООС СӦСТЕРНІ ЧІБЕКТИ ОЙЛАТЧА
ХАБАРҶЫ ТОҒЫЗЫ
1977 чылда Анатолий Султреков, институтты тоозыбызып, «Ленин чолы» газетаның редакциязында істеніс чолын пастаан. Хакас оолны, таң кибір хоостыра, таң сыныхтағ оңдайынаң, пічіктер пӧлиинзер кир салғаннар. Газетада санаҷаңнар: чиит кізі мында сыдасса, хайдағ даа пӧлікте тоғын полар.
Пір чыл пазынаң чиит оол армияа хабылған. Служба тузында чааҷы-хабарҷы полған. Армия соонаң аны чииттер пӧлиинің устағҷызына турғысчалар. 1980 чыллардаңар чоохтаза, саблығ устың сағызында «Саяны» стадионда ирткен чоннар аразындағы килкім марығлар халғаннар. Кӧзідімге, меспектіг хоккейче марығлар 19.00 часта пасталҷаңнар. Тоғазығ соонда, 22.00 часта, пресс-конференция полҷаң. Ағаа Чоғархы Согразар чазағ парарға килісчең. Анатолий Егорович, хараазын ӱс-тӧрт час узуп алып, тоғысха чапсынчаң. Материалны хачыларға иртенӧк пирібізерге кирек нооза. Итсе-де, ол тоғыс ӱчӱн журналисттер турыстығ сыйыхтар алҷаңнар.1982 чылда хабарҷы тоғызына тӱгеде пирін салған кізіні CCCP-ның Журналисттер пірігізіне алғаннар.
«Ленин чолы» газетаның редакциязында чир-суғҷыбысха хабарҷылар Елена Абдинанаң, Фадей Иптышевнең, Илья Бурнаковнаң, Каркей Нербышевнең, Иван Капчигашевнең, Александр Черпаковнаң, Анатолий Угдыжековнаң, сомҷы Гаврил Чеменевнең пір туста тоғынарға ӱлӱс тӱскен. Олар хада тоғынчатхан чиит арғызын хайдағ даа чорыхтардаң тоғырланмасха, чапсых тоғазығларда аралазарға ӱгреткеннер.
ПИСАТЕЛЬ ЧОЛЫ
Анатолий Егорович, «Ленин чолының» редакциязында прай кӧңнін салып тоғынза даа, литературадаңар ундубачаң. Узын тилідерге пӧгініп, ол 1984 чылда Москвада ирткен РСФСР-ның чиит писательлерінің семинарында араласхан, анда дипломға турысхан. 1987 чылда тыс пілбес кізі Москвадағы А.М.Горькийнің адынаң Литература институдының Пӧзік литература курстарынзар ӱгренерге кірібіскен. Аны тоозыбысхан соонаң Анатолий Егоровичті Россияның Писательлер пірігізіне алғаннар.
1980 чылларда Анатолий Султрековтың чоохтары ӧӧнінде чиит писательлер чыындыларында сых турҷаң. 1994 чылда, тізең, ол «Аба чӱрек» киндені чарыхха сығарыбысхан. Ол тустаң сығара саблығ ус хынчатхан хығырығҷыларын наа чайаачы тоғыстарынаң тӧреміл ӧріндірерге кӱстенче. 1995 чылда аның «Чатхан ӱні» ӱгредіг пособиезі сыхча, 1996 чылда - «Кӱңӱр ағас» улуғ чоох. 2000 чылда «Алып хыстар чолы» паза «Сыйыхха - хызыл чистектер» кинделерні «тӧрітче».
Чир-суғҷыбыстың чарыхха сыххан тоғыстарынаң «Мыкайла» паза «Чиңіс ӧрінізі» улуғ чоохтарын алынҷа таныхтирға кирек. Пастағызы драматург Михаил Еремеевич Кильчичаковтың чуртас чолына чарыдылған. Аның ӱчӱн Анатолий Султреков республикадағы Улуғлар чӧбінің чарадиинаң 2010 чылда «Чыл кізізі» пӧзік атха турысхан. «Чиңіс ӧрінізі» киндеде Сеулда ирткен Олимп ойыннарында хола медаль утып алған кӱресчі Сергей Карамчаковтаңар чоох парча. Пу улуғ чоох ӱчӱн 2017 чылда чир-суғҷыбысха Хакасия пазынын - Хакасия правительствозы кнезінің Николай Доможаковтың адынаң хоос литературадағы сыйии читірілген.
СӦБІРЕ
Писатель Анатолий Султрековтың чидіглері кӧп, че, аның сӧстерінең, хада хонғаны Екатерина Алексеевна, хыс фамилиязы Карамчакова, полбаан полза, чуртазында кӧп ниме киліспесчік, неке. Олар 1978 чылда сентябрьда хоных хон салғаннар. Ирепчі, аат хус чіли ынағ чуртап, Александр паза Саяна палаларын чон аразына кир салған. Пылтыр Султрековтар рубин тойын иртірерге пӧгінгеннер. Аны 40 чыл чуртап салған ирепчі таныхтапча. Че чайғызын Екатерина Алексеевна ӱр ағырған соонда ах чарыхтаң парыбысхан. Писатель хынған ипчізінің чарых омазын чӱреенде ал чӧрче.
Пӱӱнгі кӱнде Анатолий Егоровичтің ӧӧн ӧрінізі Аделина, Рома, Настя паза Каскар пархаҷахтары полчалар. Аделина пӱӱл школа тоосча, тай ағазы иркечегі хайдар ӱгренерге кіріп алардаңар матап чӱрексінче. Анаң пасха пархаларының теезі чидер.
Пу наада чӱгӱрік перолығ писатель наа кинде чарыхха сығарыбысхан. Ол «Кӧӧленіс кӧглері» чыындының ікінҷі чардығы. Пастағы чардығы 2018 чылда сыххан.
Чоохтазығның халғанҷызында саблығ ус теен:
- Мағаа чуртаста чахсы даа, хомай даа ниме кӧрерге киліскен. Хомайны ундутчам, чахсыны ла сағызымда ал чӧрерге кӱстенчем. Ирт парған чылларыма хомзынминчам, кӱзім парда, хынчатхан хығырығӌыларымны мыннаң мындар наа чайаачы тоғыстарымнаң ӧріндір турарға пӧгінчем.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |