ХЫЙҒАЛАР, ӦТКІННЕР ПАЗА ЧАЙААЧЫЛАР
09.04.2019
Хабарлар
Дарья МИКРЮКОВА, Александр СЕМЕРИКОВ, Татьяна НИКИТИНА
Марығ. Чыл сай Ағбанның чииттері аразында «Формула успеха» марығ иртірілчс. Анда пӧзік паза ортымах ӱгрсдіг алчатхан студенттер марығласчалар.
Ирткен неделяда Ағбанның чииттер ӧргезінде «Формула успеха» марығның финалына сыхханнарның аразында «Выпускник-2019» паза «Выпускница-2019» атха турыстығ студенттерні таллааннар. Пӱӱл ол 14-ӌі хати иртірілче. 12 апрельде Космонавтика кӱні таныхталчатханнаңар, марығ хан тигірге чарыдылған.
Институт-колледжтер тоосчатхан чииттер, «Хан тигір волонтерлары» полып, чуртасха кирер аймах проекттерінеңер искіргеннер. Пастап хыстар паза ооллар постарынаңар хысхаҷахти чоохтап пиргеннер. Пӱдірігҷі, ӱгретчі, энергетик, программист поларға тимненчеткен чииттернің чоохтарынаң нименең айғасчатханы, чайаачы оңдайы пілдістіг пол парча. Кӧзідімге, Н.Ф.Катановтың адынаң Хакас хазна университедінің студенті Александр Семериков музыка ноталары хоостыра чуртазынаңар искірген. Андох ӱгренізін тоосчатхан Софья Мельник «Чуртас формулазын» сағын таап аларға пӧгінче.
Аннаң андар чиит специалисттер пӧзік чидіге чидер проекттерін арачылааннар. Александр Семериков «Город-транспорт-чон» проектінеңер чоохтаан. Городта музыкалығ, ретро, чуртас тамыры, кӱлкістіг паза пасха даа автобустарны чуртасха кирер сағысты читірген.
Жюри араласчылары проекттер авторларына сурығлар пир турғаннар. «Андағ автобус осхас велосипедтерні чӧргіскен ползабыс чи?» - Александрға сурығ пирілген. «Мин андағ оңдайны «холдаң холға пирілчеткен велосипедтер» адирҷыхпын. Кирек орынзар читкен кізі аны халғысча, пасхазы аннаң андар тузаланча. Интернет пастыра велосипедтерні сыныхтағда тударға кирек полар», - нандырған ол.
ХГУ-ныңох студенті Евгений Долгополов Ағбан чуртағҷыларының иблерінзер садыт тураларынаң ас-тамахты паза пасха киректелчеткен нимелерні читір турар сервиснең таныстырған. Профессиональнай технологиялар, экономика паза сервис колледжінің студенті Анастасия Игнатьева чон чыылысчатхан орыннарда, олох автобус тохтағларында, холдаң холға пирілчеткен книгалар сеерчектерін турғызар сағыснаң ӱлескен. Аның проекті «Книганаң - чолда» адалча.
Чурт хонии паза сервис техникумынын студенті Кирилл Митрофанов, городтағы эмектерні чох идіп, «Тесланың башнязын» пӱдір саларға чӧп пирген. Че жюри ол чонға хорғыс ағылар тіп ікінҷілебіскен.
Тиксі сағыстарны чуртасха кирер оңдай чоғыл,неке. Че финалисттерні Ағбанның муниципальнай чурт фонды, ТЭЦ, «Абаканэнергосбыт», «Премьер», 29 №школа, Хакасскай муниципальнай банк организациялар ӱгредіг соонаң постарынзар тоғысха алар ӱчӱн чоохтазығ иртерге хығырғаннар.
Халғанҷы марыға 8 чиит кізі ирткен. Че чиңісчілер Дарья Микрюкова, Татьяна Никитина паза Александр Семериков полыбысханнар. Прайзына сыйыхтар читірілген. Чииттер, тізең, чуртастарындағы теестегі хырығны иртібіскеннер тиирге чарир.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде