ЧОН АЛНЫНЗАР - КӦГЛЕРНЕҢ
10.04.2019
Хабарлар
Культура. Республикада Композиторларның паза чайаачы чонның декадазы парча. Апрель айда Хакасияның композиторлар пірігізі чонға ойыннар турғысча.
Апрельде «Чирім пайы - тӧреен чирібіс ис-пайы» композиторларның паза чайаачы чонның декадазы пасталчатханнаңар Хакасияның чон артизі, композиторлар пірігізінің кнезі Герман Танбаев искірген.
- «Чирім пайы» кӧглер чыындызының ікінҷі чардығы чарыхха сыхты, - чоохтаан Герман Гаврилович. - Пылтыр пу чыындының пастағы чардығы сыххан. Амды, 2018 чылның салтарларын идіп, чонны наа книганаң ойын-концерттер пастыра таныстырарбыс. Книга Президент гранттарының фонд ахчазына сығарылған. Декада, тізең, 10 кӱн иртер.
17 апрельде Хакасияның композиторлар пірігізі Н.Ф.Катановтың адынаң Хакас хазна университедінең хада «Айтыс» тахпахтар мариин (0+) студенттер аразында иртірерлер. Чайаачы чуртас ӧӧнінде фольклордаң пасталча тіп таныхтапча композитор. Хакас хазна университедінең хада-пірге тоғыс апарып, чиит чайаачыларны ілезіне сығарар пӧгіннең мындағ марығ иртірілче. Ол 15.00 часта ХГУ-да пасталар.
20 апрельде 16.00 часта С.П.Кадышевтің адынан культура кінінің улуғ залында «Хысхылых» кӧглер сыйииның лауреаттарына чарыдылып, концерт (0+) иртер. Чонның кӧңніне кірчеткен композиторларның сарыннарын кӧрігҷілерге читірерге кирек. 2018 чылда чуртасха наа сарыннар паза проекттер кіргеннер. Марығда ӧменең аралазарға чарир.
23 апрельде 14.00 часта Н.Г.Доможаковтың адынаң национальнай библиотекада «Чирім пайы» аудио-ноталығ ікінҷі сығарыстың презентациязы (0+) иртер.
24 апрельде 15.00 часта Хакас хазна университедінде Хакасия композиторларының кӧглерін иң чахсы толдырчатханнарның (0+) марии полар.
Чайаачылар 25 апрельде Ширазар чол тударлар, культура туразында «Чирім пайы» чыындының презентациязын иртірерлер. Ол Шира аймааның Культура туразында полар. Ырҷылар чонны наа сарыннарнаң таныстырарлар. Ойын 17.00 часта (0+) пасталар.
Кӧглер декадазы 27 апрельде тоозылар. С.П.Кадышевтің адынаң культура кінінің улуғ залында 16.00 часта наа кинденең (0+) таныстырып, улуғ ойын апарарлар. Анаң кӧглер киндезі республика библиотекаларына тарадылар.
Герман Гаврилович Танбаев пу проектте араласхан композиторларға паза ырҷыларға прайзына алғызын читірче. Мындағ оңдайнаң, проект чуртасха киріліп, наа сарыннар чонға читче. Халых чон, тізең, оларны паалапча.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы