ТЕЕЛБЕКТЕ - ЧОННЫҢ ХЫЛИИ, КИРТІНІЗІ, КИБІРІ
10.04.2019
Хабарлар
«Саяночка» ансамбльның чалтырама теелбегі
Марығ. Ағбанда С.П.Кадышевтің адынаң культура кінінде «Хакасиядағы чоннарның теелбектері» I республика марии ирткен.
Ирткен неделяда тӧреен чир-суубыстың аймах пулуңнарынаң чайаачы ӧмелер, чыылызып, ӱс номинацияҷа устарынаң сынасханнар: чон теелбегі, стилизованнай теелбек, соло паза дуэт. Полған на номинацияда араласчылар, частары хоостыра ікі чарылып, марығласханнар: 8-10 частығлар паза 12 - 15 частығлар. Марығда тиксі 30 ӧме, 600 азыра олған араласхан. Таныхтирға кирек, республика синінде мындағ марығ пастағызын на иртірілче. Аннаңар Хакасияда чуртапчатхан чоннар анда хайди даа аралазарға кӱстенгеннер. Олар пос чонының культуразын, чуртасха кӧрізін, хылиин теелбек пастыра кӧрігҷілерге читір пирерге харасханнар.
Залда чон толдыра. Сизінгенде, кӧрігҷілернің санында араласчыларның туған-чағыннары, арғыстары кӧп полған. Че андағ даа полза, чыылған кізілер полған на ӧмені чылығ удурлааннар. Полған на нацияның кип-азаан, теелбегін кӧрерге морсымнығ полған. Сценада хакастарның, орыстарның, шорларның, немецтернің, хырғыстарның, поляктарның паза кореецтернің хайхастығ теелбектері кӧрігҷілернің чӱреен тибіреткен.
Олғаннар хайдағ чахсы артисттер! Олар олаңай ла теелбектенминчелер. Полған на теелбек алынҷа чоох. Палалар, сценаа сыхсох, кӱлімзіреп ала хайхастығ чоохтарын кӧрігҷілерге читіріп пастапчалар.
Бондарев аалның «Казачий пляс» ӧмезі сценада уғаа морсымнығ кӧрінген. Хыс-ооллар пір дее туртухпин плесет салғаннар. Ооллар хыстарны теелбекте кірлектендірзе, оларның сіліг кӧгенектері часхы порчолар чіли пызыңнасханнар.
Кореецтернің диаспоразы марығда пос чонының чарых ӧңніг кип-азаанаң кӧрігҷілер хараан айдырған. Олар сценазар сыххандох, залда сымзырых пол парған. Сценадағы абахайлар прайзының хайиин тартханнар. Пасхаҷыл теелбекті кӧрерге хайдағ чахсыдыр! Хыстар кӱлімзіреп ала веернең кииде хоостар «сиипчелер». Веер теелбек тузында хустың ханаттарына тӧӧй кӧрін парча, анаң кӧрзең - драконға тӧӧй арах. Кічіг палаңахтар даа сценадаң харах албин одырғаннар. Залдағы олғаннар, іҷелерінзер айланып, сурығлар пиргеннер: «Іӌең, пу кемнер андағ? Ноға оларнын теелбектері андағ пасхаҷыл?» Абахайлар теелбектерін тоосханда, кӧрігҷілер оларға матап айа сапханнар.
Гала-концерт иирде пасталғанда, прайзы чиңісчілернің аттарын адирын чидікпин сахтаан. Чоохтирға кирек, Гала-концертке узын иң не пӧзік синде кӧзіткен ӧмелер сыхханнар. Аннаңар анда араласханнары чиңісчілернің санында пол парарына ізенгеннер. Че марығның ӧӧн сыйии Гран-прині Ағбандағы «Фантазия» ӧме утып алған. 12 - 15 частығ оол-хыстар пастағы республика мариинда чиңісчі полыбысханына тың ӧрінгеннер.
«Стилизованнай теелбек» номинацияда 8 - 10 частығларның аразында I степеньніг лауреаттар полыбысханнар «Фантазия» ансамбль паза «RomAnn dance company» балет; II степеньніг лауреат - «Империя» ансамбль. Пуох номинацияда 12 - 15 частығларның аразында I степеньніг лауреаттар - «Ритм» эстрада теелбегінің ансамбльы паза «Чосон» кореецтернің диаспоразы; II степеньніг лауреаттар - «Фантазия» ансамбль паза «RomAnn dance company» балет; III степеньніг лауреат - «АРТ» теелбек студиязы.
Соло, дуэт номинацияда 8 - 10 частығларның аразында II степеньніг лауреат дипломынаң «Дебют» ансамбль сыйыхтатхан.
12 - 15 частығларның аразында I степеньніг лауреаттар - «Саяночка» чон теелбегінің ансамбльы паза «Фантазия» ансамбль.
«Чон теелбегі» номинацияда 8 - 10 частығларның аразында I степеньніг лауреат - «Фантазия» ансамбль; II степеньніг лауреат - «Стрекоза» олған студиязы; III степеньніг лауреат - «Империя» ансамбль. 12 - 15 частығларның аразында I степеньніг лауреат - «Саяночка» чон теелбегінің ансамбльы паза «Ізеніс» казактарның халых организациязы; III степеньніг лауреаттар - «Виктория» эстрада теелбегінің студиязы, «Колибри» танц-клуб паза «Синегорье» чон ансамбльы.
Марығ соонаң олғаннар, тараспин, удур-тӧдір сағыстарынаң ӱр ӱлескеннер. Оларның хоос устағҷылары, полған на палаа чылығ сӧстер чоохтап, олғаннар алнында наа пӧгіннер турғысханнар.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде