ХАРАТАСЧЫЛАР ПАРЫСТАРЫ ХАКАСИЯДА САНАЛЗЫН!
16.04.2019
Хабарлар
Кӱн сурии. Хакасияның Ӧӧркі Чӧбінің бюджетче паза налог политиказынҷа комитет кнезі Олег Иванов хара тас аныпчатхан разрезтернің хайди налог тӧлепчеткеннерін чарытча.
Олег ИВАНОВ республика бюджедінің парызын ӧскірердеңер сағыссырапча
- Пӱӱнгі кӱнде Хакасия бюджедінің парызын ӧскірерге кирек. Читкіҷе парыс полза, кӧрілген хорадығларны толдырарынҷа сидіксіністер чох полар. 2019 чылда парыс 30 миллиард салковайға тиңнелче, хорадығлар - 32 миллиардха. Пістің хазна ӧдізібіс килкім. Пӱӱл графикті сайбабас ӱчӱн, 2,8 миллиард салковай хазна ӧдізін тӧлеп саларға кирек! Че ағаа хоза 2 миллиард салковай бюджет дефициді пар. Пу син ахчаны республикаа 30 миллиард салковайға хоза тоғынып аларға киректелче!
ЧЕ СИДІК ТУС ПОЛЗА ДАА, ХАКАСИЯ, ӦДІСКЕ ПАЗА КІРБИН, БЮДЖЕТ ПАРЫСТАРЫН ӦСКІРЕРІНҶЕ ТОҒЫНЧА, ЧАЛ АХЧАЗЫН ТӦЛИРІНЕ, БЮДЖЕТ УЧРЕЖДЕНИЕЛЕРІНІҢ ТЕЕСТЕГІ ХОРАДЫҒЛАРЫНА СЫДАНЧА. 5 апрельде, тізең, республика хазна ӧдізінің 400 миллион салковайын тӧлеп салған.
Парыстар - ол, иң пастағызын, парысха налогтар тӧлелчеткенінең парыстар, НДФЛ. Алындағы чылларда парыстарча . политика сала саба апарылған. Ӧӧн кӧстег кічіг паза ортын пос киреене иділген. Сынында кічіг паза ортын пос кирее бюджетке 1 миллиард салковайдаң даа асхынах парыс пирче алай Хакасияның 23 миллиард салковай пос парызынаң 800 миллионча салковайы ла. Чоохты кӧні апарза, ӧӧн парысты пирчелер хара тас предприятиелері, алюминий сығарызы паза энергетика. Килкім бизнестегілернең тоғыс тиңни апарылбинча.
Мин харатасчыларға хайығ айландырарға кирек тіп санапчам. Ноға? Хакасияда чылда 24 миллион тонна хара тас анылча. Азынада сананыстар хоостыра, организацияларның парызынаң республика бюджедінзер 2018 чылда 2,3 миллиард азыра салковай кірген. Парысха налог (ол парыстың 17 процентіне тиңнелче) республика бюджедіне ле тӧлелче. Хара тас предприятиелері аны пасхали тӧлепчелер. Кем хайди тӧлеп полча алай кем хайди тӧлирге хынча. Кӧзідімге, СУЭК. 2018 чылда ол 13 миллион тонна хара тас анып алған. Республика бюджедіне ол 651 миллион салковай парысха налог тӧлеп салған. Пістің сыныхтағ, хатығлас органнары паза халых чоны анзына хайығ айландырбинча. Прай ниме амыр.
Олох туста Майрыхтағы разрез, 3 миллион азыра хара тас анып, республика бюджедінзер 1,2 миллиард салковай парысха налог тӧлеен. Аршаннардағы разрез, ол синӧк хара тас анып, 142 миллионҷа салковай налог тӧлеен. Республика бюджедін «ибіре» чӧрчеткеннері іле кӧрінче.
Сынап пасха разрезтер, ол санда Аршаннардағы, СУЭК-тың паза «Русский уголь» компанияның разрезтері, Майрыхтағы разрез чіли, налог тӧлеен ползалар, республика бюджедінзер тиксі 9,6 (24 миллион тонна \ 3 миллион тоннаа) х 1,2 миллиард салковайға) миллиард салковай кір турарчых. Хакасия сидіксіністер чох хазна ӧдізі ӱчӱн саназарчых, бюджет учреждениелерін сала иптіг тударчых, социальнай хорадығлар алғыдыларчых, ахча тиліске парарчых.
Аршаннардағы разрез устағ-пастаа минзер парысха налогты орта санир оңдай табарға полызығ сурап айланған. Ӱгрет салыңар тіп пасчалар. Итсе, олар пу сурыға нандырығны пілчелер - тиксі парыстарыңны республикада кӧзідіңер! Парыстың чардығы Кипрде, Виргинскай олтырыхта алай Люксембургта халбазын! (Олег Альбертович «Аршаннардағы разрезтің» тиксі пӱдізін Арбитраж чарғызында ілезіне сығарылған пічіктернің хобырғанында кӧзітче: анда «Аршаннардағы разрез» ООО-ның 100% ээзі Zimber Investments Limited (Кипр). Халғанҷызының ӱлӱстері піди чарыл партыр: 15% Suala Holding Limited (БВО - Британскай Виргинскай олтырыхтар), 10% Bluenut Trading Ltd (БВО) паза 75% Gratonex Investments Limited (Кипр). Gratonex Investments Limited компанияның 100 % ээзі - RUTEK Alliance S.A. (Люксембург). Анзын киречілепче пу ссылкада пирілген схема: https://kompromat1.news. Андағ оңдайнаң Аршаннардағы разрез аныпчатхан хара тас Рутек пастыра садылчатханы ілезіне сығысхан.
Ағаа хоза, пар пасха сидік сурығлар. Орындағы паза республика ӱлгӱлерінең чон чуртазына паза экономикаа кирек проекттерні чуртасха кирерінҷе хада-пірге тоғынардаңар чӧптезіглерге прай разрезтер устағ-пастаа парбинча, парза даа, хабазығ синін хызырчалар. Че Майрыхтағы разрез устағ-пастаа Пии аймаанаң хада ӱс чыл тоғынар чӧптезігде хол саларға тимде. Чӧптезіг хоостыра 2019, 2020 паза 2021 чылларда Пии аймаа (чылда 2 миллион салковай), Алахтайлар аал чӧбі (6 миллион салковай) паза Кирбі аал чӧбі (2 миллион салковай) хабазығ аларлар. Ол ахчаа орамаларда чарытхы тартылар, спорт паза ойын площадкалары турғызылар, суғ скважиналары сабылар, ФАП, спорт паза культура туразы пӱдірілер паза пасха даа тоғыстар толдырылары кӧрілче. Пілдістіг, пу чӧптезіг разрез хара тастығ наа участокта тоғынарға пӧгінчеткенінең палғалыстығ.
Автор :
Пазып алған Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде