ПӰӰНГІ КӰННІҢ СУРЫҒЛАРЫ ТАҢДАҒЫЗЫНА САЛЫЛБАЗЫН
19.04.2019
Хабарлар
«Хабар» газетаның ӧӧн редакторы Радион СУНЧУГАШЕВ, Хакасия пазы Валентин КОНОВАЛОВ паза республика пазының пресс-служба управлениезінің пастығы Ирина ЕМЕЛЬЯНОВА
Тоғазығ. Пу кӱннерде «Хабар» газетаның редакциязында Хакасия пазы Валентин Коновалов, хабарӌыларнаң тоғазып, оларның сурығларына нандырған.
Республиканың амғы устағҷызы Валентин Коноваловнаң чалғыс хакас газетазында мындағ чапсых тоғазығ пастағызын на иртті.
- «Хабар» газетаның килкім тархыны па за пӱӱнгі кӱндегі тоғызы республикаа хайди даа кирек, - таныхтаан Хакасияның пазы. - Аннаңар піске хада-пірге аның мыннаң мындархы тилізін пӧгерге кирек.
«Хабар» газетаның ӧӧн редакторы Радион Сунчугашев, газетаның тархынынаң таныстырып, чидіглерібістеңер искір пирген. Редакцияда улуғлар чииттерні ӱгредіп, журналистика киреене кӧніктірчеткен кибір чылларнаң чуртасха киріліп одырчатханнаңар чоохтаан. Журналист паза писатель Анатолий Султреков редакцияда 42 чыл тоғын салған, пӧзік сыйыхтарға турысхан, 2018 чылның салтарлары хоостыра «Чыл журнализі» ат алған.
Хакас газетазы республиканың политика паза халых чон чуртазын чарытча, хакас тілін, культуразын хайраллирында улуғ тоғыс апарча. Ідӧк аның страницаларында аймах нация чоны хайығ чох халбинча. 2015 чылда, тізең, хығырығҷыларнаң пик палғалызар ӱчӱн пос сайты тӧстелген.
Хакасия пазының пресс-служба управлениезінің пастығы Ирина Емельянова, чоохха хозылып, таныхтаан: «Піс Радион Дмитриевичнең хаҷаннаң таныспыс, хада-пірге тоғыс апарчабыс. Аны республикада улуғлапчалар. Хакас тілін ӧтіре пілчеткен устағҷы чииттерні журналистиканың ӧӧн хаалағларына орта чолҷа кӧстеп одырча».
Хабарҷылар Хакасия пазынзар сурығларнаң айланғаннар. Мында оларның ӧӧн сағызын читірчебіс. Ӧӧн сурығлар редакция ӧмезінің чал ахчазына паза техника кирексіністеріне теелче.
Анзы пӧгілер тіп ізендірген Валентин Коновалов.
Амды сурығ-нандырығ оңдайнаң чоох парар. Сурығларның кӧбізі хығырығҷылар адынаң пирілген.
- Мының алнында правительствода хакас тілінҷе паза культуразынҷа тоғысчы ӧме полған, амды оларның тоғызы апарылар ба?
- Пӱӱнгі кӱнде Тиліс чӧбiнiң тоғызы хати тоғынып пастапча. Андар аймах проекттер кірчелер. Кӧзідімге, «Пос кирее», «Хакас культуразы паза тілі». Пасха даа тоғысчы группалар тоғынарлар.
- Республиканың істіндегі паза регионнар аразындағы политиказын кӧрзе, чииттер Хакасиядаң пасха чирлерде тоғынарға халчатханы хоостыра чииттер политиказын алыстырарға киректелче.
- Пу сурығ тиксі Россияа теелче. Ааллардаң городсар кӧсчелер алай ба пасха чирлерзер. Хакасия пу кирекке улуғ алызығлар кир полбас. Че пасха регионнарда ӱгренҷең чииттерні пос чирінзер айландырар тоғысты апарарға кирек.
- «Республиканың кічіг паза ыраххы аалларын хайраллиры паза тилідері» программа тоғынар ба?
- Пу программаны хати кӧрібізерге кирек. Нога фермерлерге ахча позыдыларга кирек? Олар пасхазынаң тиңе, пос хониин тутчатхан кізілер чіли ахча алчалар. Программа, аалда чуртап, мал тутчатханнарга тогынарга кирек. Аннaңaр пу сурыг ам даа кӧрілер. Аал хонии чох аалларны хайраллап полбаспыс нооза.
- Сӧп-саптаңар алызығлар программазы хайди пӧгілче?
- Пӱӱнгі кӱнде олох «Аэросити-2000» регион операторынаң тоғыс апарылча. Шира паза Орджоникидзе аймахтарында тӧлег паазын тӱзіріп алғабыс. Мыннаң мындар муниципальнай пӱдістерге постарына сӧп-сапты сығарар оңдайлар кӧрілер.
- Пии аймаандағы Салғын аал чуртағҷыларына паза пасха аалларға хара тас аныпчатханнар социальнай полызығ пирер оңдайлығлар. Ноға анзы чуртасха кирілбинче?
- Хара тасты анир тоғыс алғыдылчатхан ӱчӱн, разрезтер аал чуртағҷыларынаң социальнай чӧптезіглер азынада пӧк саларга киректер. Налог тӧлеглері муниципалитет паза республика бюджеттерне кірчелер. Харатасчылар чоннaң пір чӧпке килерге хынминчатханы ағырсымнығ сурыға айлан парған. Пӱӱнгі кӱнде партнерлар чӧптезии киректелче.
- Хысхызын Чапаев аалда чон ысха пурлухча. Экологияны арығ тударына хайығ салылар ба?
- Хакасия Минсуғ ойымында орныхча. Хара тас аныпчатхан разрезтер чох таа полған полза, автотранспорт, пос туралары одынылчатханы ӱчӱн киизер тӱдӱн матап кӧдірілче. Ағбанны ибірчеткен посёлоктарзар газ алай чылығ пирҷең суғ трубаларын тартарға киректелче. Че пу чағында ол сурығ пӧгілбес.
Тоғазығда Асхыс аймаандағы 1011 частығ хызыҷахтарның футбол командазы, «Мини-футбол - школазар» президент программазы хоостыра марығда аралазып, Москвадаң чиңіснең айланған, че республика саринаң оларға полызығ пирілбеен, кип-азахты паза маймахтарны чон полызиинаң алғаннарынаңар чоох парған. Олғаннарның іҷе-пабалары республика пазы, чиңісчілерні чеестеп, тоғазығ иртірер сурыныснаң айланчалар. Валентин Олегович тоғазығ хайди даа пу чағында полар тіп ізендірген.
Хакасия пазынаң тоғазығ уғаа чылығ ирткен. Мындағ тоғазығлар хабарҷыларға тузалығ.
Автор :
Елена САГАТАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде