ХЫЙҒА ЧООХТАРЫНАҢ, СІЛІГ ОМАЛАРЫНАҢ ЧОННЫ ХАЙХАТХАННАР
23.04.2019
Хабарлар
«Мисс Абахай-2019» атха Алина АСКАРАКОВА турысхан. I вице-мисс Абахай Кристина КОЛЬЧИКОВА полыбысхан (оң саринаң), II вице-мисс Абахай - Александра МАЙНАГАШЕВА
Марығ. Ағбанда 21 апрельде «Мисс Абахай» марығ ирткен. Анда хыйғазынаң паза сілиинең 12 хыс сынасхан.
АБАХАЙЛАР МАРИИ ПІСТІҢ ЧОННЫҢ ИҢ ХЫНЧАТХАН МЕРОПРИЯТИЕЗІ ПОЛЧА ТИИРГЕ ЧАРИР. АНЗЫН ЗАЛҒА ТЫҒЫРАМА ЧЫЫЛҒАН КІЗІ КИРЕЧІЛЕЕН. КӦРІГҶІЛЕРНІҢ ИЛЕЕДЕЗІ - ЧИИТ ХЫСТАР. КЕМ-ДЕ ХАКАС АБАХАЙЛАРЫНА ӦКЕРСІНЕРГЕ КИЛГЕН, КӦБІЗІ ӦӦРЕЗІНІҢ, ПИҶЕ-ТУҢМАЗЫНЫҢ ӰЧӰН «АҒЫРАРҒА». СИЗІНГЕНДЕ, «АҒЫРЧАТХАН» УЛУС ЧӰРЕКСІНГЕН. АНЗЫ ТИКТЕҢ НИМЕС. МАРЫҒЛАСЧАТХАН ХЫС ПОЗЫН ХАЙДИ КӦЗІДЕР, РОДТЫ ІДӦК ПААЛИРЛАР. АНДАҒ ОҢДАЙНАҢ, АБАХАЙ ПОЗЫНЫҢ НА ӰЧӰН НИМЕС, РОДЫНЫҢ ӰЧӰН ТУРЫСЧА.
Марығны Хакасия пазының пастағы орынчызы Андрей Асочаков асхан.Ол чоохтаан: «Хакастар ипчі чонны хаҷан даа аарлачаңнар. Олар чоныбыстың кибірлерін, хайраллап, ӧсчеткен тӧлге читірчелер. «Мисс Абахай» марығ иртірілчеткені ӧріністіг. Ол хыстарға постарының хыйғазын паза узын кӧзіт пирерге оңдай пирче. Прайзына чиңіс алғапчам, че, минің кӧрізімнең, мындағ пайрамда араласханы даа улуғ чидіг полча».
Чалахай иирні Игорь Шалгиновнаң Вероника Албычакова апарғаннар. Олар кӧрігҷілерні хыстарнаң таныстырғанда, пілдістіг пол парған - марығ хазыр парар. Пӱӱл араласчыларның санында «Тигір хуры» фольклор ансамбльының солизі Кристина Кольчикова, «Кӱн чахайағы» ӧменің теелбекчізі Татьяна Кулумаева, искусство институдының студенті Лина Асочакова, спортха хынчатхан Анита Иптышева полғаннар. Ідӧк марығның финалына психолог Регина Черебеева сыххан. Регина узын ікінҷі хати сынаан, 2017 чылда ол «Мисс Этностиль» атха турысхан, пӱӱл чиңіс тударға пӧгін салған, неке. 16 частығ Светлана Кузургашеваны абахайларның пайрамында аралазарға чаҷазы чӧптеп алтыр.
Істезігҷі поларға сағынчатхан Алина Аскаракова пылтыр «Хакасияның пастағы короназы» атха турысхан. Программист Александра Майнагашева олған теелбек ӧмезінең хада Россияның аймах городтарында пол килерге маңнанған. Менеджер Алина Алахтаеваның сағынған сағызы - «Мисс Абахай» марығда аралазып, чиңіс тударға. 17 частығ Яна Арчимаева «Ынархас» теелбек студиязының солизі полтыр. Елена Немежикова ӱгредии хоостыра ӱгретчі, пос туста халых тоғызынаң ӧткін айғасча. Полина Килижекова право сферазында істенче.
Сынап таа, «Мисс Абахай» марығның финалына иң сіліг, хыйға паза таланттығ хыстар сыхханнар. Кем чиңіс тудар ни?
Тиксі алза, марығ пис чардыхтаң пӱткен. Минің кӧрізімнең, иң сидік, олох туста хынығ ікінҷі чардығы полған.
Араласчыларға, национальнай кип-азахтығ сығып, хакас тілінең родтарынаңар чоохтап пирерге паза жюрині пос тимнеен ас-тамахнаң сыйлирға киректелген.
2017 чылда пайрамға сыххан хыстар пос тілін уйан пілчеткенінең кӧрігҷілерні хомзындырғаннар. Пӱӱл таң, финалға саңай хакастапчатхан абахайларны таллап алған сылтаанда, таң, сылағай чир-суғҷыларыбыс мероприятиее іди матап тимненгеннер, прайзы даа чахсы кӧрінген. Піреезі сӧстерін ундут салза, кӧрігҷілер ізіг айа сабызынаң ағаа хабасчаңнар. Татьяна Кулумаеваны алынча таныхтирға кирек. Ол, Пыдырах суғдаңар тахпахты толдырып, залдағы чонның чӱрее-паарын хайылдырған.
Тимнелген ас-тамахтаңар чоохтаза, хаарған палыхтың паза пызылахтың аймағы таңнатхан. Ідӧк столда хан, мӱн, сосха паза хой иді полған.
Антракт тузында кӧрігҷілерге чиисті амзап алар оңдай пирілген. Кізілер, хыстарның узын пӧзік паалап, пӱӱл ноға пірдеезі талған тимнебеен полчаң тіп чоохтасчатханнар.
Ідӧк марығның чайаачы чардығы хынығ ирткен. Лина Асочакова ӧӧрелерінең хада, хомыснаң «Ат чарызы» композицияны толдырып, кӧрігҷілернің кӧңнін кӧдірген. Алина Аскаракова хобырахнаң чахсы ойнапчаттыр. «Кӱн чахайағы» ансамбльнаң хада сығып, Ағбанның чуртағҷызы «Ӧбекелерібістiң чахии» кӧӧні чӱрекке теерте толдырған. Кристина Кольчикова прайзын кееркестіг ӱнінең аптаан. Яна Арчимаеванаң Александра Майнагашева залдағы чонны теелбектерінең хайхатханнар.
Кибір хоостыра халғанҷы чардығында хыстар иирде кисчең кӧгенектіг сыхханнар. Прайзы порчо осхас сіліг, «Мисс Абахай» атха турыстығ. Анзы минің кӧрізім, жюри чи хайди санапча полчаң?
Сизінгенде, ӱзӱріг хазыр парған, марығның салтарларын пір час сахтирға киліскен. Че залда сыбыхтасчалар: «Килчелер». Амды абахайларның абахайының адын піліп аларбыс.
Прай хыстарға дипломнар паза аймах сертификаттар читірілген. «Кӧрігҷілернің иң хынчатхан абахайы» атха Татьяна Кулумаева турысхан, Регина Черебеева ікінҷі хати «Мисс Этностиль» полыбысты, Яна Арчимаева - «Мисс Талант».
Амды ӧӧн сыйыхтар халды. Оларны Хакасия пазының пастағы орынҷызы Андрей Асочаков читірген. Андрей Серафимович, конверт азып, ікінҷі вице-миссті адады. Ол - Александра Майнагашева. Пастағы вице-мисс Кристина Кольчикова полыбысхан. Халғанҷы конверт халды, залда сымзырых, кізілер тынминыбысхан чіли пілдірген. «Мисс Абахай-2019» атха Алина Аскаракова турысты! Улуғ залда суум-саам, чир-суғҷыбыстың ӧӧрелері, аның ӱчӱн ӧрініп, хысхырысчалар. Алина - айдас хыс! Пӱӱл пазох чиңіс тутты! Амды хакас абахайы узын тиксі Россиядағы «Жемчужина Востока» марығда кӧзідер. Ол Омскта иртер.
Мероприятиенің халғанҷызында «Мисс Абахай» марығның директоры Тимур Тюкпеев чоох тутхан. Ол таныхтаан, пу марығда 16 - 24 частығ хыстар араласчалар. Пазағы чылда ипчі чонның сурынызынаң «Миссис Абахай» иртірілер. Анда 25 - 34 частығларға устарын кӧзідерге оңдай полар. Тимур Тюкпеевтің сӧстерін кізілер ізіг айа сабызынаң удурлааннар. Сизінгенде, 2020 чылда кӧрігҷілернің піреезін сценада кӧрерге килізер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы