АЙДАС, ДАНИЛА!
23.04.2019
Хабарлар
Поғдархас. Хакас национальнай гимназияның ӱгренҷізі Данила Ачитаев, физкультураҷа матлама тимненізін кӧзідіп, Россияда иң чахсылар санында пол парған.
Ульяновскта физкультураҷа тиксі Россия олимпиадазының халғанҷы чардығы пайрамни чабылған. Салтарлар хоостыра, Хакасиядаң парған чиит спортсмен иң чахсы салтарлығ араласчылар санына кір парған. Ол сыйыхтығ орынға турысхан. Таныхтирға кирек, Хакасиядағы ӱгренҷілер аразында пу пастағы андағ улуғ чидіг. Олимпиаданың халғанҷы чардығында Россияның 64 регионынаң 200 азыра олған араласхан.
Данила олимпиаданың региондағы чардығында ікі хати чиңісчі полған паза ікінҷі хати кӱзін тиксі Россия синінде сынады. Аны национальнай гимназияның физкультура ӱгретчізі Николай Крикьянц тимнеен.
Спорт марии теория чардығынаң паза практика сынағларынаң пӱткен. Ӱгретчілерге, тізең, ол туста «тегілек столлар» паза мастер-класстар ирткен.
Таныхтирға кирек, тиксі Россиядағы ӱгренҷілернің олимпиадазы - ӱгренҷілернің ӧӧн марии. Ол 24 предмет хоостыра иртче.
Аның тӧстегҷілері таныхтапчалар, олимпиаданың халғанҷы чардығының чиңісчілеріне паза сыйыхтығ орын алғаннарға профильнай кӧстеглерҷе Россияның прай даа вузтарынзар ізік азылар.
Автор :
Марина СЕРГЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы