ХАКАСИЯ КОНСТИТУЦИЯЗЫНА АЛЫЗЫҒЛАР КИРІЛЕР
17.05.2019
Хабарлар
Президиум. Хакасияның Ӧӧркі Чӧбі президиумы теестегі чыылиинда читі сурығ ӱзӱрген
Хакасия парламентінің президиумының теестегі чыылиина тимнелген алты сурыға хоза пір сурығ ӱзӱріге сығарылған. Ол республика пазы Валентин Коноваловтың Хакасияның Конституциязына алызығлар кирердеңер чӧбі полған. Президиум кізілері аны пурун ӱзӱрерге чаратханнар.
Республика пазы Валентин Коноваловтың Хакасияның Конституциязына алызығлар кирердеңер чӧбінең таныстырған юстиция киректерінңе паза регион безопаснозынҷа министр Сергей Ромашов. Тиксі алты алызығ кирерге чӧп пирілген. Олар Россияда стратегия планнарын тимнирінең паза оларны чуртасха кирерінҷе нандырығнаң палғалыстығлар. Ол алызығлар хоостыра Россия Президенті регион пазын, субъектте хазна пирген полномочиелерін толдырбинчатса, тоғынар тузы тоозылғанҷа суур полар.
Сілкер айының 13-ҷі кӱнінде Хакасия пазының чӧбін республиканың Конституция комиссиязы ӱзӱрген паза аннаң чарасчатханнаңар чарадығ алған. Аның соонаң, сілкер айынын 14-ҷі кӱнінде, федеральнай инспектор Николай Сайбараковтың устаанынаң республиканың Конституция комиссиязының тоғысчы (эксперт) ӧмезі пу айланысты ӱзӱрерге чыылысхан. Чӧпке кирілген алызығларны тиксі паалаан соонаң алты алызығның пизі сынап таа федеральнай законнар хоостыра Хакасияның Конституциязын тӱзедерге киректепче. Пірсі, тізең, «Хакасия Правительствозынаңар» республика законына килістіре полар тіп чарадыға килген пу тоғысчы ӧме. Хакасия парламентінің конституция законнарын сығарарынча, хазна пӱдіриинҷе комитет кнезі Светлана Могилина тоғысчы ӧменің чарадиинаң Конституция комиссиязы танысхан соонаң на аны депутаттар ӱзӱриине сығарарға чӧптеен.
Чоохтирға кирек, теестегі сессияда депутаттар ӱзӱриине республика пазының Хакасия Конституциязына алызығлар кирердеңер чӧбі ле ӱзӱрілер. Анаң депутаттар, кӧстегліг комитеттер, ол чӧпке тӧстеніп, закон проектін тимнирлер. Конституция закон проекттерін Хакасияның Оӧркі Чӧбі ӱс хығырығда ӱзӱрче.
Президиум ӱзӱрген сурығларның санында хайығ тартхан «Хакасияның хазна должностьтарынаңар паза хазна гражданскай службазынаңар» законына алызығлар кирердеңер закон проекті. Светлана Могилинаның искіриинең, алызығлар Россияның Оӧркі Чарғызының чарадиинча тимнелгеннер. Ағаа хоза пу алызығларны республика парламенті июльға теере алыбыспаза, аны позыдыбызарға айабастар.
Нимедеңер пу алызығлар? Хазна службазын апарған чуртағҷыларның пенсияа хоза тӧлег алар право пар. Пу тусха теере аны нинҷе дее частығ паза хазна службазынаң суурылған даа чуртағҷылар ал турған. Оӧркі Чарғы чарадиинҷа хоза тӧлегні кемге тӧлирін алынҷа кӧр саларға кирек. Алызығлар кирілзе, пенсияа хоза тӧлег хазна службазын апарчатханда тынаға сыххан паза ол орыннаң тынаға парған чуртағҷыларға ла тӧлелер. Че Светлана Могилина закон кӱзіне кіріп пастаан тустаң сығара тоғынып пастир паза мыннаң мындар тынаға сығар хазна должнозындағы паза хазна службазындағы чуртағҷыларға ла теелер теен. Пу тусха теере пенсияа хоза тӧлег алғаннар аны аларына праволарын чідірбестер. Че андағ даа полза, Светлана Могилина, пу алызығлардаңар закон проекті алылза, республика бюджедінің хорадығлары ӱзӱрлелер тіп санапча.
Халғанҷы сурығ хоостыра президиум Хакасияның Оӧркі Чӧбінің тоғызынҷы сессиязын сілкер айының 29-ҷы кӱнінде иртірерге чаратхан.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде