НАА ШКОЛА ТИРЕҢ ПІЛІСТЕР ПИРЕР
17.05.2019
Хабарлар
Нацпроекттер. Хакасияда «Ӱгредіг» нацпроект хоостыра наа школалар, олған садтары пӱдірілчелер. Республиканың ӧӧн городында иң кӧп ӱгредіг объектінің пӱдірии кӧріл парған. Аны пала кӧп тӧріпчеткенінең паза аалдағы чон городсар кӧсчеткенінең палғалыстырарға кирек. Іди 2017 чылнаң тиңнестірзе, ирткен чылда школаа чӧрчеткен олғаннар саны 1100 азыра кізее хозыл парған.
Амды Ағбанда 1000 олғанға кӧріл парған школаның пӱдірии тоозылча. Анда 1 сентябрьдаң Ағбандағы лицей орнығар. Амды наа школаа физика, химия, математика, орыс тілі паза пасха даа предметтерні ӱгренерінде киректелчеткен оборудование алылча. Ідӧк пу чағында мебель, компьютерлер, азыранҷаң пӧліксер техника оборудованиезі алылар.
Пу наа школа, олғаннарның ӱгредиин чахсыландырар ӱчӱн, Ағбандағы лицейге ӧнетін пӱдірілген. Лицейде робототехника кӧстег чахсы тиліпче, ӱгренҷілер аннаң урок тузында (7 - 11 класстар), уроктар соонда (1 класс) паза хоза ӱгредіг оңдайынаң айғасчалар. Ағаа хоза, анда энергетика клазы азылған. Ол - лицейнің, Сибирьдегі генерирующай компанияның, ХТИ-ның паза ХГУ-ның пірге проекті. 7 класстаң пасти ӱгренҷілер математика, информатика, физика, химия, биология паза робототехника предметтерні тирең ӱгреніп пастапчалар. 2012 чылда лицейде техническай конструированиеҷе паза моделированиеҷе муниципальнай кін азылған. 2016 чылдаң ала лицей «Ӱгредігліг робототехника» тема хоостыра хазнаның нааҷыланыстар площадказы полча. Аннаңар, наа кӧстеглерні маңнаныстығ апарар ӱчӱн, наа школа киректелче.
Пӱӱнгі кӱнге лицейзер 1-ғы классха 75 олған алылған. Амғы туста лицей орныхчатхан школада, тізең, 29 № школа азылар. Пӱдірілчеткен наа школа пӱӱл 1 сентябрьда тоғынып пастир.
Пуох чылда Асхыс аймаандағы Чоғархы Паза аалда школа-ӱгретчі туразы азылар. Ол 20 палаа кӧріл парған. Республикада ол читінҷі школа-ӱгретчі туразы полар.
Чоохтирға кирек, Хакасияда «Демография» нацпроект хоостыра Асхыста паза Хубачарда олған садтары пӱдіриинде оох-теек тоғыстар толдырылча. Ідӧк Ағбанда ікі олған сады тимге сыхча. Олар пӱӱл 1 сентябрьға тимде поларлар. Ағаа хоза, нацпроект хоостыра Ағбанда Литвиновтың орамазында паза Кӧк хайа аалда олған садтары пӱдірілче.
Автор :
Марина Сергеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы