ХАДА-ПӀГЕ ТУДЫНЫП, ПАСХАЗЫНА КӦ3ӀДӀМ ПОЛЧАЛАР
31.05.2019
Хабарлар
Халғанӌы саң. Майның халғанҷы кӱннерінде Ис аалдағы школада ӱгренҷілерге халғанҷы саң 50-чі хати сыңыраан. Пӱӱл пайрамнығ линейкада 50 чыл мының алнында школа тоосханнар араласханнар
Пу кӱннерде мин ачых-чарых омалығ пис оолның іҷезі Галина Терентьевна Карамашеванаң (хыс фамилиязы Боргоякова) танызып алғам. Чалахай кӧңніліг ипчі, редакциязар ааллап киліп, чиит тузын сағысха кирген.
50 чыл мының алнында Галина хызыҷах хада ӱгренчеткеннернең, школа тоозып, улуғ чуртасха тимненчеткеннер. Ол туста школаның директоры Фёдор Алексеевич Тюкпиеков, ӱгретчілер Мария Фёдоровна Тачеева, Василий Иннокентьевич Сайбараков, Лидия Фёдоровна Ткаченко ідӧк чиит полғаннар. Андада Ис аалның кӧрімі дее пасха полған...
Эк, чыллар хайди табырах чӱгӱрчелер... Нинҷе дее чыл ирт парзын, чӱрек ле кирібинче. Амды 1969 чылда Истегі школаны тоосхан ӱгренҷілер аға-ууҷалар полғлап парғаннар. Че чиит тузын олар сағыстарында хайраллапчалар. Школа тоосханнаң илееде тус ирт парған даа полза, ирен-ипчілер хада-пірге тудынчалар. Олар, чыл сай тоғазып, олған тузындағыох чіли, пос тусты хатхы-кӱлкіде иртірчелер. Андағ тоғазығларның пірсінде Галина Терентьевнаның хада ӱгренген арғыстары пӱӱл олар ӱгренген школаның 50-ҷі выпускниктерін хайди даа алғыстирға пар килерге кирек тіп чарат салғаннар. Часхының чылығ кӱннері пасталыбысханда, Галина Терентьевна, школазар ааллап парып, піс пӱӱл выпускниктерні алғыстирға килербіс тіп ӱгретчілерге искірген.
22 майда, чииттегі чіли чыылызып, олар чалахай кӧңніліг Истегі школазар линейкаа парарға тимненібіскеннер. Піреезін хада парарға ӱр чӧптирге киліскен. Че андағ даа полза, 1969 чылдағы 24 выпускниктең пайрамнығ линейкаа Юрий Чочиев, Людмила Троякова, Дина Кученова, Юрий Тодышев, Николай Топоев, Зоя Тинникова, Зинаида Межекова, Владислав Топоев, Зинаида Топоева, Алексей Топоев, Сергей Топоев, Галина Боргоякова парғаннар. Школада ӱгретчілер паза ӱгренҷілер оларны чидікпин сахтааннар. Пайрамнығ линейка хыызында парчатханда, чон, школаның пастағы сығарызын кӧр салып, оларны чалахай удурлаан. Чоохтирға кирек, аалның чуртағҷылары, пӱӱл халғанҷы саңа школаның пастағы сығарызы килерін піліп алып, ідӧк ӱлӱкӱнге тимненібіскеннер.
Аннаңар 2019 чылның 50-ҷі выпускниктеріне халғанчы саң сыңырирын кӧріп аларға чон кӧп чыылған. Олар пӱӱнгі ӱс выпускниксер паза 50 чыл мының алнында школа тоосхан ипчі-иреннерзер харах албин кӧргеннер. Хаҷан-да выпускниктер полған аға-ууҷалар ӱгретчілерге, школа тоосчатхан хызыҷахтарға чылығ сӧстерін читіргеннер. Олар, ӱлӱкӱнге азынада тимненіп, улуғ чуртассар чол азарға тимненібіскен Алинаа, Елизаветаа, Светланаа сыйыхтар, чахайахтар сыйлааннар. Паза олар хызыҷахтардаң, школаның 100-ҷі линейказы полза, тӧреен аалынзар хайди даа киліп, ол тӧлге 1969 чылда школа тоосханнардаң чолабит читірерге сурынғаннар. Андағ сурынысты истіп, хызыҷахтар хайхап парғаннар. Паза школаның пастағы сығарызының сурынызын хайди даа толдырарға сӧс пиргеннер.
Линейка тоозыл парғанда, оларны, улуғ аалҷыларны чіли аарлап, пай стол кистінзер одыртханнар. Прайзы, оларзар кӧріп, хайдағ ынағ класс полтыр тіп морсынған.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы