АРЫҒ ХАКАСИЯ ӰЧӰН!
08.07.2019
Хабарлар
Митинг. Ағбан городта от айының 3-ҷі кӱнінде хара тас анир наа разрезтерні азарынаң тоғыр митинг ирткен
Пии аймаандағы Салғын аал хыринда Майрыхтағы разрез наа участокта тоғыстар пастап сыхханнаң сығара республикада «Хара Хакасия», амды «Тіріг Хакасия», чӧрім тоғынып пастаан. Аның араласчылары регион чуртағҷыларын наа разрезтернің тоғызынаң тоғыр кӱрезіг апарарға хығырғаннар. Пу митинг - чӧрім чарлаан кӱрезігнің теестегі хаалаа.
Чиңіс паркының сценалығ ачығында чон толдыра чыылысхан. Хол салғаннарның саны хоостыра тиксі 800-че кізі полған осхас. Сценада «Тіріг Хакасия» чӧрімнің пастағҷыларының пірсі Павел Бурнаков митингтің пӧгіннерінеңер, хара тас разрезтерінің азых оңдайнаң тоғынчатханнарынаң палғалыстығ сидік сурығларны паза оларны пӧгер ӱчӱн наа разрезтерні астырбасха киректелчеткенін чыылған чонға искірген. митингтің пӧгіннеріне чӧпсінчеткен, аның ӧӧн сағыстарынаң чарасчатхан паза мыннаң мындар кӱрезігні апарарға тимде кізілер чоох тутханнар: Салғын аалның улуғ частығ чуртағҷызы Клавдия Канадакова, «Тӧреен чазым» пірігістің кізізі Пётр Трояков, хабарҷы Михаил Афанасьев, Хакасияның Ӧӧркі Чӧбінің депутаттары, КПРФ партия фракциязының кізілері Николай Разумов паза Тайир Ачитаев, халых тоғызынаң айғасчатхан ӧткін чуртағҷылар Ольга Родькина, Алексей Вернигоров, Станислав Угдыжеков паза пасхазы.
Салғыннаң улуғ частығ ла нимес, че ідӧк чиит чуртағҷылар килгеннер, ол санда Александр Чаптыков, Дмитрий Корман паза Андрей Челтыгмашев. Чиит иреннернің чооғынаң, кӧп кізі кил полбаан ікі сылтағнаң: транспорт чох полғаннаңар паза иирде иб аразында хайынарға киректелчеткеннеңер. Иреннер Салғында тӧрееннер, ӧскеннер, аннаңар оларның сағыссырастары пілдістіг. «Разрезтер республика бюджедін толдырчалар паза тоғыс орыннарын пирчелер», - чииттерге тіпчем. Олар ікінҷілес чох нандырғаннар: піс тӧреен аалыбыстаң кӧспеспіс. Оолларнаң чарасчалар фермерлер Леонид Сидоровнаң Денис Чаптыков. Ікі харындастың Салғын хыринда мал хадарҷаң чир полған, разрез ибіре тоғыстар апарыл сыхханда, аны садарға киліскен. Олар пасха чир алғаннар, че анзы ӧӧні нимес. Ферманы мыннаң мындар тилідер пӧгіннер полған! Амды сурығ турча: хайди паза хайда?
Чоох тутчатханнар пу разрезтернің тоғызы чир-чайаанға, чон чуртазына теелчеткені прай республика чуртағҷыларының ағырсымнығ сурии тіп таныхтааннар. Кии паза суғ кірленчеткеніне сағыссырап, митингке килген Ағбан город чуртағҷызы Анастасия Боргоякова. Ол арығ суғны садызарға тимде нимес. «Ағбан суғ хаҷан даа арығ полған, разрезтернің ӱчӱн ол кірленчеткені сағыссыратча, мин суғны садызарға тимде нимеспін», - тіпче ол.
- Республика, хара тас разрезтерінің тилізіне хабазып, ӱрегліг чӧптезіглер итче, - тіпче Данияр Самрин. - Ол чӧптезіглернең разрезтернің ээлері ле парыс алчалар. Піс, тізең, орындағы чон, пір дее туза ал полбаспыс. Колониялар тузы сағысха кірче, хаҷан пай хазналар, чох-чоос хазналарның ис-пайларынаң тузаланып, орындағы чонны пайыт саларға молҷааннар, че ниме салтарында полған? Прай парыс колонизаторларзар тартылған. Разрезтер, миллиард салковайларнаң парыстанып, Аршанзар, Салғынзар, Чаптыхсар чолны даа иптеп полбинчалар. Аннаң пасха мині чирім чир-чайааны сағыссыратча!
«Тіріг Хакасия» чӧрім пастағҷылары митингтің резолюциязын тимнебіскеннер. Аның ӧӧн кирексіністері:
- Майрыхтағы разрезке Алахтайлар аал чӧбінде тоғызын тохтадарға;
- Разрезтерге Ағбан суға паза аның азырыхтарынзар кірліг суғларын позыдарға чаратпасха;
- Майрыхтағы паза Аршандағы разрезтерге тоғыстар соонаң чирні иптир проекттерінең, пӱдіріге чарадығ пічіктерінең таныстырарға чахирға;
- Алахтайлар аалында «Сірер Алахтайлар аал чӧбінің Ӧӧн планынзар чир ис-пайынаң тузаланар, хара тас чыындызын сыныхтир, анир, пайыдар паза аннаң андар тимнир, хайраллир паза тартар, ідӧк суғны арығлачаң пӱдіріглер турғызар пӧгіннең алызығлар кирерінең тоғырзар ба?» сурығлығ референдум иртірерге;
- хара тас аныпчатхан разрезтернең хости орныхчатхан аалларда экологияа, хазыхха, экономикаға ӱрег иділчеткен ӱчӱн, ибіркі чирні, тархын-культураа пай чирні сайбапчатхан ӱчӱн паза орындағы чонның чуртас синін тӱзірчеткен ӱчӱн, чуртағҷыларға компенсация тӧлир сурығны пӧкчең координационнай чӧп тӧстирге;
- регион синінде хара тас аныпчатхан наа разрезтерні астырбас ӱчӱн тоғыс апарарға.
Резолюция Россия Президенті Владимир Путиннің, Федеральнай Чыылығның Федерация Чӧбінің кнезі Валентина Матвиенконың, Хазна Думазының кнезі Вячеслав Володиннің, Правительство кнезі Дмитрий Медведевтің паза Ӧӧн прокурор Юрий Чайканың адына ызылар.
Автор :
Наталья СУБРАКОВА
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
