ЭКОНОМИКА СУРЫҒЛАРЫН ӦТІРЕ ПІЛЧЕ
23.07.2019
Хабарлар
ХакНИИЯЛИ-ға - 75 чыл. Пу кӱннерде институттың улуғ наука тоғынҷызы, экономика наукаларының кандидады Валерий Константинович Шулбаев тӧреен кӱнін таныхтады
Валерий Шулбаев 1945 чылда 21 июльда Таштып аймаандағы Аңчул аалда тӧреен. 1963 чылда Валерий Шулбаев, Хакас облазының национальнай школазын тоос салып, Ағбандағы киис ӧдіктер тікчең фабрикада слесарь полып тоғынған.
Соонаң пограничнай войсколарзар службаа хығыртылған. Армия соонаң оол тоғызынзар айланған, 1968 чылда Иркутсктағы аал хонии институдынзар ӱгренерге кіріп, аны 1972 чылда тоосхан. Аннаң сығара Ағбандағы город чӧбі исполкомында істен сыххан.
Іди, город тилізіне хозым иткен ӱчӱн, ағаа «Отличник бытового обслуживания» танығ наукаларының кандидады читірілген. Олох туста ағаа Валерий ШУЛБАЕВ СССР Госпланының производство кӱстерін ӱгренерінӌе чӧп аспирантуразында ӱгредіг алар оңдай пирілген. 1985 чылда ол, аспирантураны тоозып, «Аймахтар экономиказы, производство кӱстерінің орнығары» темаӌа кандидат диссертациязын маңнаныстығ арачылаан.
1982 чылда Валерий Шулбаев ХакНИИЯЛИ-зар тоғысха кірген. Пастап ол улуғ наука тоғынӌызы, анаң экономика паза социология пӧлиинің устағӌызы, институттың учёнай хачызы полған. Россияның наука академиязының Сибирьдегі пӧлиинің наука-істезігліг проекттерін чуртасха кирерінде ӧткін араласхан.
1992 чылда Валерий Константинович хазна службазында істеніп пастаан. Ол Хакасияның экономика хазна комитеді хачызының орынӌызы полған. 2005 чылда, республикаа улуғ хозым иткен паза тоғызында чахсы чидіглерге читкен ӱчӱн, Хакас Республиканың правительство кнезінің Аарластығ пічиинең таныхтатхан.
1998 чылда, наука тоғызынзар айланып, ХакНИИЯЛИ-ның экономика паза социология пӧлиинде улуғ наука тоғынӌызы полыбысхан, амға теере анда істенче. Валерий Шулбаев Хакасиядағы промышленностьтың ағырсымнығ сурығларын істесче.
Учёнай 70 азыра наука тоғызын пас салған, ол санда монографиялар: «Хакасия в 90-е годы ХХ века: проблемы социально-экономического развития», «Размещение промышленности в Хакасии». Ағаа хоза, Валерий Константинович ӧменең істесчеткен наука істезіглерінде араласча. Ол тоғыстар хоостыра ідӧк илееде монография чарыхха сыххан. Кӧзідімге, «Аскизский район: история и современность» (2004 ч.), «Лесное хозяйство Хакасии: история и современность» (2009 ч.) паза аннаң даа пасхазы.
2016 чылға теере Валерий Шулбаев Хакас хазна университедінің экономика паза управление институдында ӱгретчі полған. Ол, менеджмент кафедразының доценті полып, студенттерге промышленностьнаң палғалыстығ сурығларӌа курстар апарӌаң.
Валерий Константинович ипчізі Наталья Алексеевнанаң хада оол паза хыс ӧскір салғаннар, пархалары пар.
Автор :
Ольга ЛУШНИКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде