ЧИҢІСЧІЛЕРГЕ - СЫЙЫХТАР
23.07.2019
Хабарлар
Спорт. Хакасияда меспектіг хоккей ойнапчатхан командалар аймах марығларда араласчалар. Оолағастарның, улуғларның маңат тимненіс кӧзітчеткен командалары кӧрігҷілерге ӧрініс сыйлапчалар
Пістің республикада спорттың аймах кӧрімнерін тилідеріне улуғ хайығ салылча. Ол санда меспектіг хоккей ойнирға тартылчатханнарға. Олғаннарға орындағы «Саяны» команда чахсы кӧзідім полча. Андар кіріп алары, Хакасияны тиксі махтаға сығарары - полған на чиит хоккеисттің пӧгіні. Аннаңар даа республика первенствозында паза чемпионадында араласчатхан командалар чиңіс тударға, маңат ойын кӧзідерге парчан кӱстерін салчалар.
Чиңіс тутханнарны хайдағ-да оңдайнаң таныхтиры хаҷанох кибірге кір парған. Пу наада Ағбандағы олимп резерві училищезінің актовай залында Хакасияның иң артых командалары пазох чыылысханнар. Оңарылыстығ, мында орындағы «Саяны» команданың хоккеисттері прайзының хайиинда полғаннар. Олар чииттернең чоох-чаахнаң турыбысчатханнар, тоозылбас-парбас сурығларына хынып нандырчатханнар.
Сыйыхтар аларға килген спортсменнерзер алғыстас сӧстерінен айланған Хакасияның спорт министрі Владимир Кретов. Владимир Константинович иң пастап «Саяны» команданы, меспектіг хоккейңе Россия чемпионадының пӧзік лигазында ойнап, чиңіс тутханынаң паза суперлигазар сығып алғанынаң чылығ алғыстаан. Анаң пу хоккей сезонында «Саяны» командаа суперлигада ойнирға киліспезін улуғ хомзыныста искірген. Сылтағ - ахча табылбинчатханында. Меспектіг хоккейңе Россия чемпионадының суперлигазында ойнир ӱчӱн, 60 млн салковай тӧлирге киректелче. Анҷа кӧп ахча пістің республикада пӱӱнгі кӱнде табылбинчатхан осхас. Че пу ағырсымнығ сурығ хайди даа пӧгіл парарына прайзы ізенче.
Анаң ол 2018-2019 чыллардағы хоккей сезонында Хакасия первенствозында араласхан олғаннар командаларына сыйыхтар читірген. Іди 2005-2006 чылларда тӧреен оолағастарның командалары аразында чиңіс тутхан Ағбандағы «ДЮСШ-2005» командаа холдаң холға чӧрчеткен Кубок, полған на хоккеистке алтын медаль паза Аарластығ пічік пирілген. Ікінҷі орында Кӧк хайа аалдағы «Саяны-Кӧк хайа» команда пол парған. 13-14 частығ саарбахтар, кӧксілерінде палыңнапчатхан кӱмӱс медальны сыйбастырып, ӧріністерін чазырбинчатханнар. Нымырттығ поселоктағы «Саяны-Энергия» команданың оолағастары хола медальнаң таныхталғаннар. Ағбандағы кӱстіг командаларнаң тиңни ойнааны олар соондағы марығларда уламох чахсы тудынарына ізеніс пирче.
Меспектіг хоккейҷе Хакасия чемпионады «А» паза «Б» подгруппаларға пӧлілген. «А» подгруппада Ағбандағы «Штурм» команда пастағы орынға сыххан. Ікінҷі орында ідӧк Ағбанның «ДЮСШ плюс» командазы пол парған. «Химик-2002» команда - ӱзінҷі орында. Пу команда Ағбан пилтірі поселоктаң.
«А» подгруппада иң чахсы хоккеисттер адалғаннар, сыйыхтар алғаннар. Іди иң чахсы хаалха хадағҷызы полыбысхан Павел Нечепурук - «Штурм» командадаң; иң чахсы защитник Сергей Родин - «ДЮСШ плюс» командадаң; иң чахсы полузащитник Кирилл Бутенко - «Химик-2002» командадаң; иң чахсы нападающай Денис Кукин - «Штурм» командадаң.
«Б» подгруппада Хакасияның чемпионы полыбысхан Ағбандағы «Авангард» команданың иң чахсы хоккеисттері (алнында, сол саринаң) Никита САГАЛАКОВ паза Анатолий АНЦИФЕРОВ
«Полярник» команда. Ікінҷі орында - Ағбандағы «ДЮСШ-2003» команда. Хола медальларға турысханнар Ағбан городтың «Авангард» команданың хоккеисттері.
Мында иң чахсы спортсменнерге саналғаннар: хаалха хадағҷызы Анатолий Анциферов - «ДЮСШ-2003» команда; иң чахсы защитник Алексей Терентьев - «Полярник» команда; иң чахсы полузащитник Никита Сагалаков - «ДЮСШ-2003» команда; иң чахсы нападающай Геннадий Рязанов - «Полярник» команда.
«Саяны» команданың хоккеисттері Дмитрий Бутаков, Николай Верещагин, Руслан Гавричков, Иван Касаткин, Олег Селиверсткин, Виталий Шнайдер «Россияның спорт узы» атха турысханнар. Денис Казаковха паза Вячеслав Курбановха «Тиксі Россия синіндегі категориялығ марығ чарғыҷызы» удостоверение читірілген.
Хакасияның спорт министрі Владимир Кретов, меспектіг хоккейҷе Хакасияның федерация президенті Юрий Шпигальских, «Саяны» команданың хоккеисттері паза сыйыхтарға турысхан спортсменнер хада сомға суурынғаннар. Анаң, ізіг чей ізіп, 2018-2019 чыллардағы хоккей сезоны хайди тоозылғанын сағысха киргеннер.
Автор :
Анатолий СУЛТРЕКОВ
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
