ӦБЕКЕЛЕРІБІСНЕҢ ПІР ТЫНЫСТЫҒ ПОЛАРЛАР
02.08.2019
Хабарлар
Ӧрініс. Сағып алдыбыс - «Читіген» театрның тӧстегҷізі Василий Ивандаевтің сағызы 30 чыл пазынаң тол парды. Аның «палазы» позының чуртынзар кірер
Хаҷан мындағ ӧріністіг хабарны искенде, ноға-да пастағы сағыс тустар палғалызынзар айланған. Уғаа орта чарадығ алыбысты Хакасияның пазы Валентин Коновалов - Ағбандағы Л.Р.Кызласовтың адынаң чир-суғ ӱгренҷең иргі музейнің оң сариндағы чардығы «Читіген» театрға пирілді.
Чоныбыстың ӧрінізі хайдағ улуғ полар - прайзы хынчатхан, махтапчатхан, поғдархапчатхан театрыбыс тӧреен чирібісте ӧкіс пала полбиныбысты. Пірдең, хайдағ килістіре орын пирілді - Пушкиннің орамазында хас-хаҷанох азылған музейде ӧбекелерібістің пурунғызы хайраллалған, кӧзідіге сығарыл турған. Хакасиязар килген аарлығ аалҷыларны, олаңай чорыхчыларны музей позынзар тудығ чох тартчаң, пурунғыдағы экспонаттарнаң саңай хайхатчаң, тузалығ піліс пирҷең.
Амды аның оң чардығында пістің чайаачы устарыбыс ойыннарынаң кӧрігҷілерні матап хатхыртып турарлар алай сағысха тӱзіртерлер - хайди чуртапчабыс амғы оой нимес туста? Анзы «Читіген» театрның тӧстегҷізі Василий Ивандаевтің ӧӧн сағыс-пӧгініне уғаа килістіре. Василий Иванович кічіг формалығ театр тӧстир алнында пістің редакцияда полҷаң, сағыс-кӧрізінең ӱлесчең, ол-пу сурығлар хоостыра чӧптесчең. Піс, хабарҷылар, аның кӧңнін кӧдірерге харасчаңмыс, пастағы хаалағларны алғым чарытчаңмыс, аннаң хада сидік оңдайларны тобырчатхан артисттерні махтаҷаңмыс.
Пӱӱнгі кӱнде ирткен туснаң амғы чуртас ағыны пірік парды тиирге чарир. Иргі музейде пістің пурунғыларыбыстың чуртас чолы, хоных тилізі, чир-чайаанның кӧрімі алысханы алғым чарыдылҷаң. «Читіген» театр ол пӧгінні мыннаң мындар узаратча, хакас тілінең пазылған ойыннар пастыра чоныбыстың кибір-чозахтарын хайраллап халар сурығларны кӧдірче, чуртас ағынынаң соона халбасха кӧӧктірче, наа чидіглерге хығырча.
Тустар палғалызы паза иргі музейде, уламох аның подвалында хайраллалған паалаҷаа чох ис-пайыбыс «Читіген» театрның артисттеріне, «Айланыс» ӧменің ырҷы-кӧгҷілеріне пос салынар оңдай пирбес. Чир-суғҷыларыбыс уғаа кибірліг чон. Уламох ортын паза улуғ частығлар. Аннаңар оларның пірдеезі «Ээліг орында иртіре хылынып, пурунғыларыбысха хамах пастыра пирдіріп алдым» тіп чоохтанарға хынмас, азанар.
Амды «Читігеннің» устағ-пастаан паза чайаачы усты тимнегліг хатығ тоғыс сағыпча. Иң пастағызы - кирек пічіктерні тимнирі, анаң музейнің кӧзідіг залын театрға килістіре алыстырары. Че 30 чыл сыдасханда, пір-ікі чыл пілдіртпин ирт парыбызар. Хайди ізендірче театр директоры Ирина Чустугешева, кӧрігҷілернің кӧңнілеріне кірген, паар-чӱректерін тибіреткен иргі ойыннарны наа орында хайди даа хати турғызарға, чоныбысха ӧрініс сыйлирға харазарбыс.
Хаҷаннаң сӧӧ тартылған сурығны килістіре пӧгібіскен ӱчӱн, Хакасияның пазы Валентин Коноваловха, Хакасияның культура министрі Леонид Ерёминге, Улуғлар Чӧбінің кнезі Пётр Воронинге алғызыбыс читірерге кирекпіс. Амды «Читіген» театрның позының чурты парда, пістің чайаачы устарыбыс уламох улуғ кӧдірілісте тоғынарлар, аймах кӧрім-марығларда аралазып, сыйыхтығ орыннарға сығарлар, тӧреен чирібісті тиксі сабландырарлар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы