ПРАЙЗЫ ЧАХСЫ ТИМНЕНІС КӦЗІТКЕН
06.08.2019
Хабарлар
- Мағаа ӱр ниместе Омск облазында поларға киліскен. Андар ГТО комплекстің нормативтері хайди толдырылчатханын кӧрерге хығырғаннар. Анда спорт уғаа маңат тиліпче. Че мындағ чахсы, харахтар ӧріндірчеткен стадионнарға тоғаспаам, - чӱреен пазын полбинча Хакасияның спорт министрі Владимир Кретов, марығ асчатхан, аймахтардаң чыылысхан командаларны маңат тимненіс кӧзідерге, чиңіске матап сіренерге алғапчатхан туста.
Анаң марығлар пасталыбысхан. Таныхтирға кирек, Хакасияның прай аймахтары кибірге кір парған спорт фестивальында араласпады. Іди кічіг ааллар аразындағы марығ парадында Боград паза Пии аймахтары чох полғаннар. Анзы хомзыныстығ. Арға-мӧрійде нинче кӧп команда араласча, марығ анча хынығ паза хазыр иртче нооза.
Хаҷан Ширадағы стадионзар Таштып аймааның командазы кір килгенде, суулас кӧдірілген - 2016, 2017, 2018 чылларда ирткен мындағ марығларда олар ізестіг чиңіс тут турғаннаңар чарлалды нооза. Аннаңар даа полбас па, колоннаның алнында ізестіг хаалапчатхан Сергей Карамашев холларын аар-пеер матап пулахтатчатхан. Сергей Васильевич Таштып аймааның спорт управлениезінің пастығы полча.
1970 - 1980 чылларда, ниик атлетиканаң айғазып, ол, Сибирь паза Ыраххы Восток зоназының марығларында аралазып, чиңістер тутчаң, Хакасияны сабландырчаң.
Аның сӧстерінең Таштып аймааның піріктірілген командазына Пиче хол, Харой паза Сипчул кічіг аалларның спортха хынчатхан чуртағҷылары кірген осхас. Пиче хол аалдағы чииттернің футбол командазы мындағ марығларда тӧреміл араласча, чиңістер тутча. Амды даа маңат тимненіс кӧзідерге киректер тіп ізенче. Итсе, андағох сағыснаң килгеннер пасха даа аймахтарның командалары. Марығ ээлері дее ибде чиңіс тударға, стадионзар чыылысхан чир-суғҷыларына ӧрініс сыйлирға матап кӱстенерлер. Ибде стенелер дее полысчалар тіп тиктең не чоохтаспинчалар нооза.
Олох арада орындағы чуртағҷылар пасха аймахтардаң килгеннерні, маңат тимненіс кӧзітчеткеннерні махтапчалар, тыыда хысхырысчалар. Хаҷан Шира аймаа ӱчӱн турысчатханнар марыға сыхсалар, амыр одырчатхан кізі табылбинча - прайзы азах узына тура хонча, чир-суғҷыларын чиңіске оңнығ кӧӧктірбинчелер, матап хысхырысчалар.
- Алтай аймааның командазы чыл сай даа мындағ марығларда чахсы тимненіс кӧзітче, сыйыхтығ орынға сығып алча. Хомзыныстығ, Пии аймаа пӱӱл араласпинча. Анда даа маңат спортсменнер парлар, сыйыхтар ал турчаңнар, - ӱлесче позының сағыстарынаң марығның ӧӧн чарғыҷызы Николай Свириденко.
Хакасияның кічіг ааллары аразындағы спорт фестивальы ниик атлетика эстафетазынаң пасталған. Марығ чарғыҷызы ниик атлетикаҷа чоннар аразындағы класстығ спорт узы, Европа паза тилекей чемпионаттарының араласчызы Вадим Трунов полған.
Эстафетада 2 ипчі, 2 ирен араласхан. Оларның полғанына ла, 100 метр чӱгӱріп, эстафета ағазын пасхазының холына пирібізерге киректелген. Мында Алтай аймаа ізестіг чиңіс тутхан. Анзы за оңарылыстығ. Пу аймахта ниик атлетика, волейбол маңат тиліпче. Ікінҷі орынны Таштып аймаа холға кирген. Марығ ээлері ӱзінҷі орында пол парғаннар. Чарғыҷы-искірігҷі, орындағы чуртағҷыларның кӧңнін кӧдірерге харазып, Шираның командазы таштыптағылардаң кӧмес-кӧмес соона халдылар теенде, кӧрігҷілер аразында ӧрчіліг суулас тараан.
Кибірге кір парған спорт фестивальында араласхан командалар постарының тимненістерін мындағ кӧрімнерче сынадылар: волейбол, теннис, ағаснаң тартызары, мини-футбол, арғамҷынаң тартызары, ниик атлетика (эстафета) паза сӧбірелернің спорт марии (эстафета, дартс). Спорттың хайдағ кӧріміне кізілер артых хынчатханын орта паалирға сидік - стадионның трибуназында одыр салып, прай даа тоғазығ-марығларны кӧріп алар оңдай полған. Теннис ле пасха орында иртірілген. Аннаңар аал чуртағчылары спорт пайрамының ӧткін араласчылары ӱчӱн матап «ағырчатханнар». Пірее хати сарыс-талазығлар даа пасталыбысчаңнар. Анзы ӧӧнінде мини-футбол мариина теелген: пір саңай ікі команда ойнап турған. Аннаңар кӧрігҷілер, уламох улуғ частығлар, хайдағ команда гол кирібіскенін сах андох орта сизінмин халчатханнар.
- Хакасияның 8 аймааның алтызы спорт фестивальында араласча. Прай 126 кізі тимненістерiн марығда сынапча. Мындағ тоғазығ-марығларны хайди даа иртір турарға кирек. Спорт - ол хазых чуртасха тартылғаны. Пӱӱн мында марығласханнары пасхаларын кӧӧктірерлер. Анзы спортнаң айғасчатханнар санын тӧреміл кӧптелтір турар, - сала даа ікінҷілебинче Хакасияның спорт министрі Владимир Кретов.
2-3 августта Шира аалның нааҷыли тимнелген «Урожай» стадионында ирткен спорт фестивальында сыйыхтығ орыннар піди ӱлестірілгеннер: 1 орын - Таштып аймаа, 2 орын - Шира аймаа, 3 орын - Асхыс аймаа.
Ідӧк спорттың алынҷа кӧрімнерінде чиңістер тутхан командалар, маңат тимненіс кӧзіткен кізілер сыйыхтарға турысханнар. Марығ ээлерінің командазын арға-мӧрійге тимнеен Николай Чебодаев спорт фестивальының салтарларына чӧпсінче. Мындағ тоғазығ-марығлар тузында тимнегліг тоғыстың хай пірее читпес сарилары ілезіне сыхча тіп таныхтапча ол. Анзы, тізең, соондағы спорт фестивальына чахсы тимнен салар оңдай пиреріне ізенче тренер. Андағох сағыс тутчалар пасха даа аймахтардаң килген командаларның устағҷылары.
Автор :
Анатолий СУЛТРЕКОВ Сомнар Дмитрий СУНЧУГАШЕВТИ
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
