ӦҢНЕН, АСХЫС ПОСЕЛОК!
06.08.2019
Хабарлар
Ӱлӱкӱн тузында
Ӱлӱкӱн. Ирткен чечіме кӱнде Асхыс аймаандағы Асхыс поселоктың 70 чылына паза Тимірчолҷылар кӱніне чарыдылған пайрам ирткен
Хынчатхан кічіг чир-сууның тӧреен кӱнін таныхтирға поселоктың прай даа чуртағҷылары чыылысханнар.
Пайрам азылғанда, поселоктаңар сарын толдырылған. «Кто, если не мы» сарынның кӧӧ хоостыра ырҷылар поселокты паза аның чуртағҷыларын махтааннар.
Чир-суғҷыларын алғыстирға Асхыс поселок чӧбінің пазы Сергей Энграф сценаа сыххан.
- Асхыс поселоктың аарлығ чуртағҷылары, прай чӱреемнең сірерні пістің поселоктың 70 чылынаң алғыстапчам. Мында тӧреен паза Асхыснаң чуртазын палғалыстыр салған чонға пістің поселоктаң сіліг чир чоғыл. Ӱлӱкӱн аймах тӧллерні піріктірібіскен. Піс тархыныбысха поғдархапчабыс. Че ӧӧні - поселок чуртағҷылары, оларның кӧбізі чуртазын тимір чолнаң палғалыстырыбысханы. Прайзын ідӧк Тимірчолчылар кӱнінең алғыстапчам, - чооғында таныхтаан Сергей Михайлович.
Ідӧк ӱлӱкӱнге килген чонға алғыстас сӧстерін Асхыс аймаа пазы Абрек Челтыгмашев паза аймахтың депутаттар чӧбінің кнезі Вячеслав Симаткин читіргеннер.
- 70 чыл аразына нинҷе-де тӧл алыс парған. Че поселок тӧстелгеннең Асхыс станциязының чуртазы тимір чолнаң пик палғалыс парған. Аймах тилізі тимір чол предприятиелері тилізінең палғалыстығ. Анзы налогтарнаң парыс кіргені паза кізілернің истіг чуртазы. Ікі чыл мының алнында Хызылчардағы тимір чолның устағ-пастаа профессиональнай ӱлӱкӱнні мында таныхтирға чаратхан. Аннаң сығара поселок илееде чахсылан парған. Тимірчолчыларның тоғыстары асхынах полбазын, прай предприятиелер тоғынзын, чал ахчазы турыстыра ползын тіп алғапчам.
Прай чуртағӌыларны поселоктың 70 чылынаң алғыстапчам, - алғыстаан Абрек Васильевич. Чооғын тоозып, Абрек Челтыгмашев Асхыс поселок пазы Сергей Энграфха алғыстас пічиин читірген.
- Асхыс поселок аймахтың тилізінің ӧӧні полча. Аарлығ ветераннар, 70 чыл тархынын сірер тӧстеезер. Сірер чох мында пір дее ниме полбасчых, - таныхтаан Вячеслав Иванович.
Аймахтың прай аал чӧптерінің пастары адынаң чуртағҷыларны Асхыс аал чӧбінің пазы Марина Анжиганова алғыстаан. Аның чооғынаң, хонҷых ікі аалны кибірлер, сӧбірелер піріктірче. Ікі аал пір атнаң адалча. Оларның устағҷылары удур-тӧдір чахсы полызысчалар.
Чаа соондағы ӧзӧгістіг 1949 чылда Асхыс чирінде тимір чолны пӱдірердеңер чарадығ алылған. Ол таарлағларны, пӱдіріг материалларын паза пассажирлерні тартарына киректелген. Прай чон кӱзінең Ағбан - Сталинск тимір чол пастыра Хакас чирі прай хазнанаң палғалысхан. Пу пӱдірігде, Хакас автоном облазы чуртағҷыларынаң пасха, хонҷых Хызылчар крайынаң, Тувадаң килген кізілер араласханнар. Прай чон кӱзінең мында тимір чол, элеватор, туралар, школалар паза олған садтары пӱдірілгеннер. Килген кізілер палаткаларда чуртааннар.
Аннаң сығара мында чуртас хайнап сыххан, Асхыс поселок пӱт парған. Аның чуртағҷыларының саны ӧзіп одырған. Сидік туста таңдағы тимірчолҷылар ӧскеннер. 1949 чылда поселокта кӧп пала тӧреен. Пӱӱл оларға 70 час тол парған. Пӱӱнгі кӱнде поселокнаң тиң частығ 47 кізі чуртапча. Улуғ пайрамда оларны чеестееннер. Олар чон алнына сыхханнарында, чыылған кізілер, турып, айа сапханнар.
Анаң сценаа пазох Абрек Челтыгмашев сыххан.
- Пӱӱл пістің аймаабыс 95 чылын ӱлӱкӱннеді паза Асхыс поселок 70 чылын таныхтапча. Піс, Ағбандағы тимір чол устағӌыларынзар айланып, турыстыра тоғынӌыларны сыйыхтир ӱчӱн оларның аттарын адирға сурынғабыс. Ідӧк мағаа Хакасия правительствозының Аарластығ пічіктерін читір пирерге чахығ пирілген, - таныхтаан Абрек Васильевич.
Хакасия правительствозының Аарластығ пічиине Асхыс поселоктың тынағдағы чуртағҷызы Виктор Плаунов турысхан. Асхыс аймаа администрациязының Аарластығ пічиинең сыйыхтатханнар санында тимірчолҷылар Александр Сагатаев, Анатолий Аев, Владимир Бастаев, Людмила Боргоякова, Владимир Тардыбаев паза пасхазы полғаннар.
Ӱлӱкӱнде алтын той паза наа ла хоных хонған ирепчілерні чеестееннер. Пӱӱл Асхыс поселок чуртағҷылары Владимир Петрович паза Людмила Семёновна Черныхтар сӧбірезі хоных хоғанының 50 чылын таныхтады. Ирепчі ынағ, удур-тӧдір пілізіп чуртапча.
Мендельсон маршы ойнап сыхханда, сценаа наа ла хоных хонғаннар Сергей паза Анастасия Богдановтар сыхханнар. Владимир Петрович оларға часкалығ, пілізіп чуртирға алғаан.
Полған на сӧбірее пала тӧреені - улуғ ӧрініс. Асхыс поселокта, аның 70 чылында, пу наада ікі ыңаачах Савелий Тинников паза Вероника Арбузова тӧрееннер. Сценазар оларның іҷелері Александра Тинникова паза Светлана Арбузова сыхханнар. Поселоктың наа ла тӧреен чуртағҷыларына нымзах ойнаҷахтар паза хазых ӧзерге алғас сӧстері читірілген.
Че мыннаң алғыстастар тоозылбааннар. Асхыс поселоктың кӧп чуртағҷызы сыйыхха турысхан. Кӱн тооза аалға толдыра сарыннар чайылған. Ідӧк ӱлӱкӱнде волейболча, футболча, стол теннизінҷе паза арғамҷы тартарынҷа марығлар иртірілген. Пайрам поселок чуртағҷыларына улуғ ӧрініс сыйлаан.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде