НАА ӰГРЕДІГ ЧЫЛЫ ЧАҒДАПЧА, ІЗЕПТЕГІ АХЧА ХОРАПЧА
14.08.2019
Хабарлар
Школаа тимненіс. Чайғы тоозылча, ӱр ниместең наа ӱгредіг чылы пасталар. Ол, тізең, паланы школаа тимнепчеткен сӧбірее хорадығлығ тус
НИМЕ ШКОЛАА КИРЕКТЕЛЧЕ?
Пӱӱл палаа школаа киректелчеткен ниме-ноо паазы, ирткен чылнаң тиңнестірзе, 2 %-ке ӧс парған. Анзы «Платформа ОФД» сан пирістернең айғасчатхан организациянын танығларынаң. Іди Москвада ӱгренҷее киректелчеткен школа чыындызы - 15 муң салковайға тур парча, регионнарда, тізең, ол сан сала тӧбін - ортымахти алза, 10,7 муң салковай. Че ниме кірче пу школа чыындызынзар? «Платформа ОФД» операторлары санға алғаннар мындағ ниме-нооны: оолағастарға - ыстаннаң кӧгенек, хызыҷахтарға - юбканаң блузка, кроссовка алай туфля, рюкзак, канцелярия паза столда турчаң лампа.
Іди пу искіріг хоостыра мин іҷе-пабаларнаң ӧнетін чоохтасхам. Оларның таниинаң, школа чыындызынаң столда турчаң лампаны хыйа алыбызарға чарир, ол полғанына ла киректелбинче, че ол сананысха хосчаң ниме илееде. Мында чоох парған ӧӧнінде кип-азахнаң ӧдіктердеңер. Іди прайзы даа полған на палаа ӱзер кӧгенек (блузка) алча, ідӧк алыстыра кис чӧрҷең ыстаннар (юбка-кӧгенектер). Пу ла кип-азахха илееде ахча парыбысчатхан осхас, че анзынаң пасха спортнаң айғасчаң костюм кирек. Алынҷа чоох ӧдіктердеңер. Анзынаңар іҷе-пабалар улам на чӱрексініснең чоохтапчалар. Амғы туста полған на ӱгренҷее ӱсче аймах ӧдік аларға килісче. Ол школаа чӧрер, школада алыстырар паза физкульура урогында кизер ӧдіктер.
Че олох туста Олғаннарға кӧстелген ниме-нооны сығарчатхан предприятиелер ассоциациязының президенті Антонина Цицулина «Комсомольская правда» газетадағы искірігде паланы школаа хай-хай ниик паанаң тимнеп аларға чарир тіпче. Аның сананыстарынаң, ниме-нооны иң ниик паанаң алза, пӱӱл оолағастарны школаа 4533 салковайға тимнеп аларға чарир, хызыҷахтарны - 3833 салковайға. Мин чоохтасхан іҷе-пабаларның кӧбізі пу саннарнаң чараспинча, че олох туста палаларын школаа тимнирге нинҷе ахча хорапчатханын чоохтап полбинча. Ӧнетін санабинчабыс тіпчелер. Итсе-де, аалда чуртапчатхан ӱс палалығ іҷе Светлананың чооғынаң, ағаа прай палаларын 1 сентябрьға тимнебізерге 5 муң салковай чит парчаттыр.
- Мин ӧӧнінде канцелярия алчам. Чоох чоғыл, иң ниик турчатханнарны. Кӧп нименең туғаннар, таныстар полысчалар. Олар палалары кискен кип-азахты ағыл пирчелер. Хомай нимес киптер. Ідӧк ирткен чылда кискен кип-азах халча. Че чидіспеен нимені аларға килісче, - тіпче ипчі.
Че полғаны ла мындағ полызығнаң тузаланминча, аннаңар кӧбізіне школа тузы - ол хорағ тузы.
ХАКАСИЯДАҒЫ ПААЛАР
Школаа киректелчеткен ниме-ноо паазын тиңнестірер ӱчӱн, Ағбанда хай пірее садығ тураларынҷа чӧр килгем. Сынны чоохтаза, ол саннарға пазым ағырыбысхан. Канцелярияны ла алып алза (ручка, тетрадьтар, альбом, линейка паза даа пасхазы) минің сананызымнаң 2000 салковайға чағын сых парған. Іҷелер пу саннаң чарасчалар, че піреезі пу ахчаа ідӧк школаа чӧрҷең портфель алып алчаттыр. Мин кӧргенде, рюкзактар паазы 500 салковайдаң пасталча. Че иң ниик пааға турчатханнар кӧрімге уғаа порттар.
Амғы туста школа формазын таап аларында сидіксініс чоғыл. Оларның аймаа садығ рыногында улуғ. Че мин кип-азахты «ACOOLA», «Gloria Jeans» садығ тураларында паза ӧӧн садығ рыногында кӧргем. Пу ӱс садығ аразында иң аарлығ паалар «ACOOLA» садығ туразында полған, че тігілгенінең дее олар артыхтар. Анда кӧгенек паза блузка 1299 салковайға турча, ыстанны олох пааға алып аларға чарир, юбканы - 799 салковайға, кӧгенекті -1999 салковайға.
Глория Джинсте паалар сала тӧбін: кӧгенек паза блузка - 700 салковай, юбка - 500, ыстан - 800. Че иң ниик паалығ школа формазы рынокта полған: кӧгенек - 500 салковай, блузка - 600, юбка - 500, ыстан - 700, ыстаннаң жилет - 1400. Хайди садығҷы таныхтаан, пӱӱл школа формазын олар постары, алып, ағылғаннар. Аннаңар оларның паалары ирткен чылдағызынаң сала тӧбін. Іди колготкалар, бантик, галстук ахчазын хозыбысса, паланы 1 сентябрьға тонандырыбызарына 2 муң салковайча хайди даа кирек.
Че ӧдіктердеңер чоохтирға сидік. Пірее іҷе-паба палаларына чахсы теерідең тігілген ӧдіктер алчатса, пасхазы арған маймахтарда тохтапча. Оларның паазы, тізең, илееде пасхалалча.
ІҶЕ-ПАБАЛАР ЧӦПТЕРІ
Кӧбізі палаларын наа ӱгредіг чылына халғанҷы туста тимнеп пастапча. Аннаңар ол улам на сидік тусха айлан парча. Палаларны школаа тимнирінҷе чӧптернең іҷе-пабалар ӱлесчелер.
Лариса БЫТОТОВА:
- Пӱӱл мин канцелярияны май-июнь айларда алып пастаам. Аннаңар амды ол саринаң піс тимдебіс. Че тонандырчам халғанҷы туста. Чайғызын палалар табырах ӧсчелер, пір ай азынада алған нимедең ӧс парыбызарға айабастар. Халғанҷы туста кӧгенекті сала тӧбін паанаң алчам, олар пір чылға сыдасчалар. Че ӧдіктерге харанминчам. Палаа истіг паза чылығ поларға кирек, ол аның хазиина кӧні теелче нооза.
Ідӧк 1 сентябрьға чахайахтар албинчам. Аның орнына конфеттер ал пирчем. Чахайахтар аарлығ паза, салых парып, тастал парчалар. Айастығ. Конфет, тізең, соонаң даа чиил парча.
Светлана ЧЕРТЫКОВА:
- Минің оолахтар. Школаа тимнепчетсем, оларға костюм албинчам. Аарлыға турчалар. Пиджагы, тізең, 1 сентябрьға ла кизілче, че соонаң ибде тузазы чох чатча. Палалар аны олаңай кӱнде кизерге хынминчалар. Аннаңар жилетнең ыстан алчам. Че пасха іҷелернең, хозылып, пірее ательеде школа формазын тіктірзе, улам на ниик сых парча.
Сергей САГАЛАКОВ:
- Наа ӱгредіг чылына піс нинӌе-де ле ручка паза тетрадь ал салчабыс. Пасхазын сентябрь-октябрь айларда, оларның паазы сала тӧбін тӱс парза, алчабыс.
Амғы туста тетрадь-ручка аймаа илбек. Олғаннар прай нимені хоостығ, сомнығ аларға сіренчелер. Че аймах матырларнаң сомналған тетрадьтар паза портфельлер олаңай нимелердең хай-хай аарлыға садылчалар паза олар табырах чархандыр сыхчалар. Аннаңар андағ нимелерні піс ипчімнең хада палалар чох алчабыс.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы