ӦӦНІ - ПУРУНҒЫ ХУМАРТХЫЛАРНЫ ХАЙРАЛЛАП ХАЛАРЫ
16.08.2019
Хабарлар
Россияның наукалар академиязының Материальнай культура тархыны институдының паза Хакасия правительствозының аразында мындағ чӧптезіг идерінеңер сурығ хаҷанох турған. Хакасия пазы Валентин Коновалов, анда хол салар алнында чоох тудып, республикадағы археология хумартхыларын соондағы тӧлге хайди даа хайраллап халарға кирек теен. Ідӧк ол Хакасия пурунғы хумартхыларға иң пай регион тіп поғдархаснаң чоохтанған. Наталья Фёдоровна республика пазының сӧстерінең чарасхан. Материальнай культура тархыны институдының директорының орынҷызы оларның ученайлары Хакас Республикада илееде кӧп чыллар тоғын парирлар тіп таныхтаан. Амды оларныңох археологияча наука тоғынҷылары республикада хара тас предприятиелері тоғынчатхан орыннардағы пурунғы тустардағы хумартхыларны арачылап халарға пӧгінчелер. Аннаңар олар правительствоның чыылығ иртірчең залынзар Алтай аймаандағы Хызыл салда аалдаң ырах нимес табылған пурунғы чірчелерні кӧзідерге ағылғаннар. Чоохтирға кирек, 2018 чылда РАН-ның археология экспедициязы «Хызыл салдадағы 11-чі кӱрген» хумартхы таста істезіглер иртірген. Ол тоғыстарнаң Андрей Поляков устаан. Ученай кізі чыылған чонға хайди тоғыстар апарылғанынаңар чоохтаан. Ідӧк Андрей Владимирович Аршаннарда хара тас аныпчатхан предприятиелері тоғынар орыннарда хайдағ археология хумартхылары табылғанынаңар чарытхан. Ол орыннарда алнындағы вектегі скифтер тузындағы кӱрген паза анда 11 пурунғы сыырат табылтыр. Амды оларны ал халар ӱчӱн, археологтар істезіг тоғыстарын апарчалар.
Чыылған чонның алнында Хакасияның ӧӧн музейінің директоры Андрей Готлиб чоох тутхан. Ол ікі чыл пазынаң Россияда археология науказының 300 чылы таныхталар тіп искірген. Пастағы археология экспедициялары, істезіглері пістің кічіг чир-суубыснаң пасталғаннаңар поғдархаснаң чоохтаан. Аның сӧстерінең археология, тархын наукаларының тоғынҷылары чарасханнар.
Таныхтирға кирек, амғы туста археология істезіглері ирткен орыннарда табылған пурунғы хумартхылар пасха регионнарзар апарылбинчалар. Пістің чир-суубыста табылған тиксі пурунғы ниме-ноолар Л.Р.Кызласовтың адынаң чир-суғ ӱгренчең музейге пирілчелер. Аннаңар полған на істезіг тоғыстары соонда Хакасияның ӧӧн музейінің фондында пурунғы экспонаттарның саны хозылып одырча. Хызыл Салдадаң ырах нимес орныхчатхан кӱргеннерде археология істезіглері иртірілген соонаң, чир-суғ ӱгренчең музейге 44 пурунғы ниме-ноолар пирілген. Амды оларны музей тоғынҷылары істезерлер.
Чӧптезіг алыл парған соонаң пістің ученайларның тоғызы уламох тӱзімніг парар тіп ізенчебіс, тееннер залдағылар.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы