ХАКАСИЯ АНГАРАНАҢ КИМДЕГІ УЛУҒ РЕГИОНДА
16.08.2019
Хабарлар
Ангаранаң Кимдегі улуғ регион - ол пістің хазнаның 12 улуғ регионнарының пірсі, хайзы Россия Федерациязының 2025 чылға теере тиліс стратегиязында кӧріл парған. Пу улуғ регионзар Хакасия, Тува республикалары, Иркутск облазы паза Хызылчар крайы кірчелер.
Петербургтағы чоннар аразындағы экономика форумының пленарнай чыылиинда Россияның президенті Владимир Путин регионнар тилізінің планын тимнирінеңер кирексініс пар тіп искірген. Аның таниинаң, Минсуғдағы ойым чирде чылның 300 кӱні айас полча, анзы аал хонии промышленнозының пик комплексін тӧстирге паза инвестициялар тартарына оңдай пирче. Ол Россияның Европа чардығын паза Ыраххы Востокты піріктірчеткен, Хыдат чирінің рыноктары, Азиянаң Тиңіс талай регионындағы паза Европадағы хазналарны піріктірер.
Чыылығда тилідерге кирек отрасльдаңар чоох парған - ол туризм, промышленность, пӱдіріг паза аал хонии кластерлері.
Хакасияның аал хонии паза ас-тамах министрінің орынӌызы Александр Башков аал хонии отрасльында хой, сӱттіг паза иттіг маллар, палых, ӧзімнер ӧскіреріне хайығ айландырарға кирек теен. Хой ӧскіреріне пістің республикада прай оңдайлар пар: чир-чайаан, оттығ чазылар, хысхыда хар асхынах чаапча, хойларны чыл ибіре хадарарға чарир. Пӱӱнгі кӱнге Хакасияда тӧлліг хойларны ӧскірчеткен ікі хоных, хойлар тутчатхан 250 азыра пос хонии, 220 азыра кресен-фермер хонии пар.
1 августха республикада тиксі 383219 пас хой саналған. Хакасияда иттіг маллар тутчатхан 350 азыра кресен-фермер хонии тоғынча, тӧлліг маллар ӧскірчеткен - 2 хоных, сӱттіг маллар - 28 КФХ.
Хакасияда форель палыхты ӧскірчеткен 2 хоных тоғынча, хайзы чылда садыға 680 тонна палых ӧскіріп алча. Кӧллерде паза тулғорларда палыхтар ӧскірчеткен 20 азыра кресен-фермер хонии саналча. Александр Башков чир тамаан ӧскірерінде теплица комплекстері тилізіне хайығ айландырарға кирек теен.
Республикада чир тамаан ӧскірерінең 40 азыра кресен-фермер хонии айғасча. Ӧзімнернең айғасчатхан хоныхтарның кӧбізі тоңастығлар салча, хайзының 90 % мал азиина парча, халғаны 10 % - гречиха.
Ангаранаң Кимдегі улуғ регионның тилізіне цифровизация теелче. Хакасияның правительствозы кічіг аалларға Интернет паза телефон палғалызын тартарынаңар сағыссырапча. Чыылығда цифровизация тоғызы хайди парчатханын сыныхтағда тутчатхан саннығ платформалар кирерінеңер, ИТ-парктар паза искіріглерні сыныхтапчатхан кін тӧстирінеңер чӧп кірген.
- Пістің республика Ангаранаң Кимдегі улуғ регионда аралазар ӱчӱн, Хакасия правительствозы октябрьға теере пічіктер тимнебізерге кирек. Пу улуғ тоғыста республика экономиказының конкурент пол поларын ӧскірерге, транспорт инфраструктуразын чахсыландырарға кирек, - таныхтаан Хакасияның пазы Валентин Коновалов.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы