ЧОЛЫҢАР АЗЫХ ПОЛЗЫН!
16.08.2019
Хабарлар
Чииттер форумы. 18-22 августта Чебоксары городта «Тӱрктернің алтыны» тиксі Россиядагы чииттер форумы иртер
Чииттер форумы. 18-22 августта Чебоксары городта «Тӱрктернің алтыны» тиксі Россиядағы чииттер форумы иртер
Пу форум пӱӱл тӧртінҷі хати иртер. Анда аралазар ӱчӱн, федеральнай синде улуғ таллағ ирткен. Тиксі 150 чиит, ӧткін оол-хысха оң полған. Хакасияда таллағны сигіс кізі иртіп алған. Олар Н.Ф.Катановтың адынаң Хакас хазна университедінің студенттері, ӱгретчілері полчалар. Ідӧк чыл сай форумға «Асхыр» чииттернің халых пірігізінің ӧткіннері чӧрчелер. Чорых алнында оларнаң Хакасияның национальнай паза территориальнай политика министрінің орынҷызы Нина Челтыгмашева тоғасхан.
- Чииттерге піс Хакасиязар наа сағыстығ айланарға алғапчабыс. Анда, аймах чоннаң танызып, опытнаң алыссыннар. Ідӧк политиктернең, эксперттернең тоғазығларда, ӱзӱріглерде ӧткін аралассыннар. Паза чон аразында иптіг тудынзыннар, республикабысты турыстыра кӧзітсіннер, - чооғында таныхтаан Нина Гавриловна.
Чебоксарызар парчатхан чииттернің полғанының на позының проекті пар, хайзынаң ол анда форум араласчыларын таныстырар паза аны арачылир. ХГУ-ның студенті Элина Кичеева хакас культуразын Интернетте сабландырар проект тимнеп салған. Чиит хыстың соцсетьтерде позының страницалары пар, ідӧк блогын азып алған. Амды ол сомға алай ба видеоға суурып алған ниме-нооны Интернетсер сығарча.
- Хакас кип-азахтығ абахай хыстарны, аймах чазанӌыхтарны суурарға хынчам. Оларны Интернетсер сығарыбысчам. Турциядағы саблығ журнал минің сомнарымны позының сайттарында удаа сығарча. Мындағ оңдайнаң, кӧмес тее полза, хакас чонның культуразын сабландырарға кӱстенчем, - чарытхан Элина.
«Тӱрктернің алтыны» форумда аралазып, чиит хыс позы айғасчатхан нимедеңер чоохтап
пирерге пӧгінче паза позына наа пілістер алып аларға сағынча.
Татьяна Чепсаракова ирткен чылда пу форумда араласханох. Андада пастаан сағызын ол читіре толдыр полбаан, аннаңар пӱӱл хатап чорыхха сығарға тимненче. Аның проекті ідӧк Интернетнең палғалыстығ. Ол тӱрк чоннарның пірге сайтын тӧстеп аларға кӱстенче. Анда полған на чон тойлары, кибірлері хайди иртчеткенін сомға алай ба видеоға суурып, сайтта сығар турарҷых.
- Сағынчам, мындағ сайт тӱрк чоннарына уғаа чапсых, хынығ паза, ӧӧні, тузалығ полар, - чоохтаан Татьяна.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы