КОНЦЕРТКЕ ХЫҒЫРЧАБЫС
21.08.2019
Хабарлар
Ӱлӱкӱн. Хакасияда Россияның хазна флагы кӱнін пайрамнығ концертнең таныхтирлар
Россияның хазна флагы ХVII-ХVIII чӱс чылларның хырығларында, Россия кӱстіг хазнаа айланчатхан туста, тӧстелген тіп саналча. Ах-тигір кӧк-хызыл чалама пастағызын на I Петрның пабазы Алексей Михайлович хан полчатхан туста «Орёл» орыс чааҷы корабльында кӧдірілген. Че ӱс ӧңніг чаламаның «законнығ пабазына» I Петр хан саналча. Ол 20 январьда 1705 чылда указ сығарыбысхан, хайзына «садығ судноларында» ах-тигір кӧк-хызыл флаг кӧдір турарға кирек.
22 августта 1991 чылда Москвада Ах тура ӱстӱнде ӱр чыллар хазна тании полған хызыл флагтың орнына пастағызын на ӱс ӧңніг флаг кӧдірілген. Ол кӱн РСФСР-ның теестегі нимес сессиязында пу ӱс ӧңніг чаламаны Россияның официальнай хазна флагына санирдаңар чарадығ алылған. 20 августта 1994 чылда Россия президенті Борис Ельцин «Россия Федерациязының Хазна флагы кӱнінеңер» указта хол салған, хайзынңа флаг кӱнін 22 августта таныхтиры турғызылған. Ол тустаң сығара Россия Федерациязының Хазна флагы кӱні кибірли хазнаның прай регионнарында аймах мероприятиелер иртіріп таныхталча.
22 августта 17.00 часта Ағбанның Пастағы май ачығында Россия флагының 350 чылына чарыдылған пайрамнығ концерт иртер.
Мероприятиені В.Г.Чаптыковтың адынаң Хакас республика филармониязының «Каданс» хоры паза Хакас Республиканың чон артизі Герман Танбаев Россия Гимнін паза Хакас Республика Гимнін толдырып азарлар.
Концерт программазы иң чахсы патриотическай паза национальнай сарыннардаң пӱтче. Орыс паза хакас тілінең вокаллығ композицияларны В.Г.Чаптыковтың адынаң Хакас республика филармониязының ырҷылары, Алтай Республиканың паза Хакас Республиканың саблығ артизі Артур Марлужоков паза Олег Гриценко, С.П. Кадышевтің адынаң Культура паза чон чайаачызы кінінің ырҷызы Ирина Кулагашева толдырарлар.
Республика чуртағҷыларын чапсых хореография номерлерінең «Ынархас» теелбек студиязы ӧріндірер.
Автор :
Олеся ШЕРЕШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы